Valjis sámit Hámmárfeasttas ávvudeamen.

Ávvudeaddjit lassánan beliin Mearrasámis

- Dán jagi lei Hámmárfeasttas beali eanet beroštupmi sámi álbmotbeaivái ovddit jagiid ektui, illuda Gula-mearrasámisearvvi nubbinjođiheaddji Dagrun Sarak Sara.


Gula -mearrasámesearvvi Dagrun Sarak Sara isidiinnis Oddvar Sarain eaba lean lágidan sámi álbmotbeaivvi Hámmárfeasttas guđa jahkái, de dál lei fas áigi.


Sátnejođiheaddji Alf E. Jakobsen ávvudeamen Sámi álbmotbeaivvi ovttas guovllu sámiiguin.

Sullii 120 mearrasámi ledje čoagganan vuorkádávvirii herskostallat sihke badjesámi biđđosiin ja “mearrasámi biđđosiin”  mii lea ges guollemálli, man sievjjohas Eirik Bæivi fitnodat lei gohkken. 


Sámenuora guovttos Forsølskuvllas Brage Paulsen (15) Regine Rakfjord (16) leaba vuosttaš geardde sámi álbmotbeaivedoaluin. 
- Dát lea eanet erenoamáš go norgga álbmotbeaivvi ávvudeapmi!

Sátnejođiheaddji Alf E. Jakobsen logai leat buorre oaidnit ahte dál lea dáppe rittus ge sámevuohta ná bivnnut šaddan, go diehtit dáruiduhttima garra historjjá. Ieš ii lean gal gávtti coggan vaikko logai iežas sápmelažžan. 


Marion Palmer muittuhii ahte vuosttaš sámi romána ”Beaiveálgu” lea čállon Fálesnuoris, gos Anders Larsen orui  1910 go barggai oahpaheaddjin. Gula-searvvi jođiheaddji June C Pedersen olgeš ravddas.

Dattege ledje valjis gávttehas mearrasámit boahtán maiddái ránnjágielddas, Fáles-nuoris. Sii dadje iežaset fertet dál hárjehallat ovttas ávvudit Hámmárfeasttain, go boahttejagi gielddat šaddet oktan. 


Elly Johansen Borssis Fálesnuoris njuorrasii oalát go gulai ávvudoaluin iežas ádjá vielja luođi, mas son ii ba diehtán ge. Sutnje šattai sámeálbmotbeaivi erenoamážin. 

Girječálli Marion Palmer logai iežas hearvás divttaid mearrasámevuođas, ja mo sii mánnán Fálesnuoris suoli ohppe ”suollemasgielas” muhtun sániid, numo ”ábigollá” mii lea su jiellatsámegielsátni, mearrarusta. 

Mearrasámegiella, lávlagat ja luođit čudje, gáktehealmmit šleŋgo ja illugatnjalat golge ávvubeaivve Oarje-Finnmárkku rittus,Sámi ja máilmmi davimus gávpogis, Hámmárfeasttas.

 

 

 

 

 


76-jahkásaš Ingulf Nilsen Jáhkogohpis, 
Sievjju sullos bođii fanassáhtuin gávpogii sámástit ávvudoaluin. Lei Sievjju gávttiin vel čiŋadan.