Presideantadoaimmas eamiálbmotráđđeaddin: Aili lea ođđa barggus

ILUS ÁLGIT: Aili Keskitalo lea ilus go álgá ođđa ja beroštahtti bargui. – Beasan buktit iežan hárjáneami bargui, ja erenoamážit surggiin biras ja dálkkádat mat leat áigeguovdilat ja gos mis leat hástalusat, ja mun illudan searvat dása, muitala Aili Keskitalo. Virgi masa álgá lea ođas ja eamiálbmotsuorgi lea maiddai oalle ođas Amnesty International Norge organisašuvdnii, …

ILUS ÁLGIT: Aili Keskitalo lea ilus go álgá ođđa ja beroštahtti bargui. – Beasan buktit iežan hárjáneami bargui, ja erenoamážit surggiin biras ja dálkkádat mat leat áigeguovdilat ja gos mis leat hástalusat, ja mun illudan searvat dása, muitala Aili Keskitalo.

Virgi masa álgá lea ođas ja eamiálbmotsuorgi lea maiddai oalle ođas Amnesty International Norge organisašuvdnii, čállet sii. Fáttát mat sáhttet šaddat áigeguovdilat Keskitaloi gieđahallat leat vuoiggalaš ruoná molsun, sámiid cielaheapmi neahtas dahje veahkaváldi lagasoktavuođain sámi birrasis. Keskitalo álgá ođđajagimánu loahpas ja sus šaddá kantuvra Guovdageainnus, čállá Amnesty Norge preassadieđáhusas.

ILLUDA ÁVKKÁLAŠ BARGUI

Aili lea ruovttus Guovdageainnus go SÁMi ođasmagasiidna oažžu su ságaide. Vuosttažettiin lea son hui ilus dán fálaldaga dihte.   

– Mun lean ilus go lean ožžon ávkkálaš barggu gos sáhtán bargat iežan hárjánemiin, ja ahte sin mielas lea dohkálaš ahte barggan ruovttubáikkis, kantuvrras Guovdageainnus.

  Mainna galggat bargat?

– Galggan bargat eamiálbmotáššiiguin, dálkkádat- ja birasáššiiguin. Munnje lea vejolašvuohta viidásit bargat iežan beroštumiin, eambbo vuoiggalašvuođa oažžut máilbmái ja atnit mu máhtu eamiálbmotrivttiid ja sámi servodatáššiid oktavuođas. Mun lean ilus go sáhtán leat mielde Amnesty Norge ođđa vuoruheamis, dadjá Aili Keskitalo.

Lea go gelddolaš bargu?

– Mu mielas lea gelddolaš ahte Amnesty Norge háliidii viiddidit iežas vuoruheami ja fátmmastit eamiálbmogiid. Leat máŋga birasorganisašuvnna mat leat beroštan sámi áššiin, muhto eai nu galle olmmošvuoigatvuođaorganisašuvnna, ja dasa livčče dárbu, muitala Aili.  

Ja mii de livčče du oassi?

– Mun jáhkán mun sáhtán leat mielde hukseme Amnesty 

Norge bargonávccaid ja gelbbolašvuođa eamiálbmotáššiin. Galggan maiddai bargat biras- ja dálkkádatáššiiguin, mii lea hui áigeguovdil, ja mii diehtit ahte sámi vuoigatvuođat leat garra noađi guoddime “ruoná molsuma” olis, loahpaha Aili Keskitalo.