Násttit sáhttet ofelastit

Nástealbmi lea stuorát go maid sáhttit oba govahallatge. Dieđusge dat maid mii oaidnit čalmmiiguin lea dat maid mii sáhttit tulkot. Dihtetgo ahte dolin, ovdal go diimmuid ja kompássaid ledje hutkan, de dádjadedje olbmot násttiid vehkiin luonddus?

Eatnašat dieđusge leat gullan dan birra juoga skuvllas jo, muhto nugo munge, ledjen áibbas vajálduhttán man gelddolaš muitalusat nástealbmái čatnásit! Muitibehtetgo mii ofelasttii golbma viisá Jesusa riegadanbáikái? Na Betlehemnásti!

Otná SÁMi magasiinnas sáhtátge lohkat earet eará nástealmmi birra ja dan mearkkašumi birra sámiide. Mo dološ guođoheaddjit geavahedje nástealmmi johtimis, sii oidne gos bohccot livvo ja goas johttájedje viidáset ja gos guhte násti lei guhtege áigái. Nástealbmi lei min máttuid diibmu ja kompássa. Jus dán áigge galggašeimmet máhttit lohkat ja tulkot nástealmmi ja dádjadit ruoktot dan vehkiin, mo jáhkát dan mannat? Dálá badjeolbmot gal dáidet ain veahá ávkkástallat násttiiguin?

Somá go Sámis leat ain eambo girječállit, vaikko eai čálege sámegillii. Musihkkár Anders Somby lea čállán iežas vuosttaš romána dárogillii ja girji álmmustuvai golggotmánu vuosttaš beaivvi. Son lea bloggen 17 jagi, ja liiko bures čállit. Son lea almmuhan romána iežas lágádusas ja lea jo plánemin nuppi ja goalmmát girjji. Romána lea rihkuskomediija. Su gehppes rihkusrománas lea olu guoimmuheapmi, imašlašvuohta ja mystihkka. Sávan girjjiid jorgaluvvot sámegillii, go mis váilot dakkár gelddolaš šaŋŋerat sámegillii.

Mii beassat maiddái lohkat 73-jahkásaš Lars Stenberga birra, gii lea vuovdesámi boazodoaluin bargan. Go son šattai bajás, son dovddai ahte vuovdesámit eai adnon albma sápmelažžan. Son gulai maiddái oahpaheaddjis ahte vuovdesámit galget jávkaduvvot, juoga mii lea báhcán su vuorjat, vaikko navddii iežas nagodit dan vajálduhttit go ollesolbmo ahkái joavdá. Son ii leat vuosttaš iige maŋimuš Ruoŧa beale sápmelaš, gii lea šaddan vásihit dakkár unohisvuođaid mánnávuođas. Mii sávvat, ahte ii ádján šat beare guhká ovdal go duohtavuođakommišuvdna guorahallágoahtá buosttuvuođaid Ruoŧa bealde maid.