Vuoruhit mánáidgirjjiid julev- ja máttasámegillii

Sámediggeráđđi lea meannudan 2020 giđa girjjálašvuođaohcamušaid, ja vuoruha addit doarjaga mánáidgirjjiide julev- ja máttasámegillii. Árran julevsáme guovddásj lea ožžon juolluduvvot 350.000 kruvnnu.

Árrán julevsáme guovddáža direktevra Lars Magne Andreassen. Priváhta govva

Sámediggi lei ožžon logenár ohcamuša smávit lágádusain ja eará girjjálašvuođaaktevrrain. Ohcanvuđot 2020 girjjálašvuođabušeahtta lea 2,85 millijovnna ruvnno.

OŽŽON VUOSTTAŠ GEARDDE

Trøndelága fylkkagirjerájus ja Árran julevsáme guovdásj oažžuba doarjaga rámmašiehtadusaid bokte ovddidit mánáidgirjjiid mátta- ja julevsámegillii. Dál lea vuosttaš geardde go Árran julevsáme guovdásj oažžu rámmašiehtadusa fuolahit mánáidgirjjiid julevsámegillii.

­– Mii leat hui giitevaččat doarjagiin, mii lea dehálaš álgu dán prošektii, mas mii galgat maiddái ovttasbargat Hammari gielddan. Mii oaidnit ahte fertet čohkket návccaid oktii vai nagodat čađahit dán prošeavtta ja oaidnit stuorra dárbbu čábagirjjálašvuhtii, mii galgá leat álki lohkat mánáide, muhto maiddái alit dásis, muitala Árran julevsáme guovddáža direktevra Lars Magne Andreassen SÁMi magasiidnii.

OVTTASBARGU

Direktevra muitala dán leat dušše álgu ovttasbargui Hápmira gielddain ja lohká sin almmuhan girjjiid ovdal ovttasbarggus Davvi-Trøndelága fylkkagirjerájuin.

– Sii leat leamaš issoras čeahpit almmuhit girjjiid ollu jagiid. Muhto dál sávvat mii bargat systemáhtalaččat báikkálaččat. Ja leat hui ilus go Sámediggi veahkeha min johtui. Go mii geargat dáinna prošeavttain, de geahčadit fas makkár ahkejoavkkuid vuoruhit čuovvovaččat, čilge son.

PLÁNAT EAI NOGA

Andreassen lohká sin vuos fertet boahtit johtui ođđa ovttasbargguin, muhto lohpida ahte girjeprošeavttat eai noga. Plánat sis leat ollu boahtteáigái.

– Mii fertet iskat makkár girjiide lea dárbu ja makkár girjjiid olbmot sávvet min jorgalit. Mii árvvoštallat maiddái boahtteáiggis galgatgo vuoruhit oahpponeavvuid jorgaleami. Buot lea dieđusge gitta das man ollu ruhta mis lea, loahpaha son.

Sámediggeráđi Henrik Olsen (NSR). Govven: Åse M.P. Pulk/Sámediggi

FÁTMMASTIT VIIDÁT

Ohcamušat ledje girját ja fátmmastit viidát čáppagirjjálašvuođa, go ledje ohcamušat sihke mánáid, nuoraid ja rávisolbmuid várás. Maiddái fágagirjjálašvuohta lea gokčojuvvon dán ohcanvuorus, go duodjegirjjit Várjjat guovllus leat ožžon doarjaga.

– Go girjjálašvuođaohcamušaid vuođul dán vuoru juolluduvvo váile 2 millijovnna girjjálašvuhtii, de dat duođašta alla dási girjjálašvuođaohcamušain, dadjá sámediggeráđđi Henrik Olsen (NSR) preassadieđáhusastis.

Rámmašiehtadusa bokte jorgaluvvojit moanat girjjit sihke mátta- ja julevsámegillii, ja nu šaddá čáppagirjjálašvuođa fálaldat mátta- ja julevsámegielat mánáide.

– Dát doaibma lea earenoamáš bures lihkostuvvan máttasámis gos leat ilbman ollu mánáidgirjjit máttasámegillii maŋemuš jagiid, dadjá Olsen.

Sámediggi oaidná maiddá stuorra dárbbu nuoraid girjjálašvuhtii, ja dán ohcanvuorus leat juolludan doarjaga máŋgga prošektii, main vuoruhit nuoraidfálaldaga. Thomas Hansen oažžu juo goalmmát ja maŋemuš girjái Jápmingilvu-trilogiijas doarjaga.

Boahtte ohcanáigemearri Girjjálašvuođabuvttadeami doarjjaortnegis lea golggotmánu 1. beaivvi 2020.

Juolludeamit

Rámmaohcamuš: Julevsáme mánájgirje – Árran- julevsáme guovdásj – lulesamisk senter oažžu kr 350.000. Julevsámegillii, jorgaleapmi, mánáid várás.

Nilla ja Ádegáhttu – Halloween Bárus SA – Samisk Forlag oažžu kr 171.250. Davvisámegillii, originála, mánáid várás.

Bearral Gollegiella jietnalágádus oažžu kr 320.000. Davvisámegillii, jorgaleapmi, nuoraid ja ollesolbmuid várás.

Ozan luopmániid maid mu eadni ii čoaggán – Gollegiella jietnalágádus oažžu kr 260.000. Davvisámegillii, dikta, originála, nuoraid ja ollesolbmuid várás.

The Hunger Games: Mockingjay THOMAS HANSEN SÁNIT oažžu kr 330.000. Davvisámegillii, jorgaleapmi, nuoraid várás.

Rámmaohcamuš: Maanagærjah jarkostimmie – Trøndelag fylkesbibliotek oažžu kr 230.000. Máttasámegillii eanaš, jorgaleapmi, mánáid várás.

Tullflyer minsttár – UNJARGGA GIELDA / NESSEBY KOMMUNE oažžu kr 100.000. Fágagirji, davvisámegillii, nuoraid ja ollesolbmuid várás.

Unjárgga gákti – UNJARGGA GIELDA oažžu kr 200.000. Fágagirji, davvisámegillii, nuoraid ja ollesolbmuid várás.

Buohkat leat ožžon juolluduvvot dan supmi maid ledje ohcan.

Oktiibuot: kr 1 961 250

Čále cealkámuša

Your email address will not be published. Required fields are marked *