Viimmat de besse deaivvadit fas

Corona bissehii sámi vuorrasiid deaivvademiid, maid Árvvesjávrri suohkan láve lágidit sámi vuorrasiidda, geat eai orobuorrásiidsiiddas. Dál viimmat besse fas deaivvadit.

Ingvard Larsson, Karl Henrik Nilsson ja Roger Eriksson vuosttas háve siste fas deaivvadeamen eará vuorrasiiguin dan rájes go coronadávda leavvagođii njukčamánus. Buot golbmasa mielas lei somá go fas besset deaivvadit.

Eallilan olbmot lávejit deaivvadit juohke nuppe vahkus, iešguđetge báikkiin. Mannan maŋŋebárgga deaivvadedje sii Árvasis, sámesearvvi visttis, ja dat lei vuosttaš geardde go deaivvadedje siste, njukčamánu rájes go corona-dávda covid-19 leavvagođii miehtá Ruoŧa ja olles máilmmis.

Okta sis gii lei váillahan vuorrasiid deaivvadeami lei 68-jahkásaš Roger Eriksson. 

DOVDÁ OLUSIID: Roger Nilsson muitala ahte son lea Sohpparis ássan guhká ja  lea bargan bussevuodjin. Son lohká iežas dovdat olbmuid sihke Kárášjogas ja Guovdageainnus, ja jearahaddá mus dovddan go duon ja dán olbmo.

– Lea nu suohtas boahtit dáid deaivvademiide, muitala son. Dáppe mii beassat muittašit doložiid ja hállat dološ fearániid birra, lohká son.

SÁGAT EAI NOGA

Roger Eriksson, Ingvard Larsson ja Karl Henrik Nilsson leat gáfestallamin ja borramin bulláid go mun boađán Árvasii. Ságat eai noga, vaikko mun gaskkalduhtán sin ságastallama. Eriksson muitala ahte son ii leat massán galle vuorrasiid deaivvadeame dan rájes go lea álggahuvvon.

SEARRA BEVDDIIN: Ingvard Larsson ja Leif Brännström hálešteaba, albmát čohkkájit sierra bevddiin ja nissonat fas nuppe geahčen. 

– Dáppe beasat gullat ságaid ja maid earát leat hommán ovddit deaivvadeami rájes, muitala Roger Eriksson.

GEATNEGAHTTON

Árvvesjávrri suohkan lea sámegiela hálddašangielda, ja láhka geatnegahttá gieldda addit giellafálaldaga sámi boarrásiidda. Mariann Lörstrand Blind lea Árvvesjávrri gieldda giellabargi ja son álggahii deaivvademiid ođđajagimánus 2018. 

ÁLGGAHII DEAIVVADEMIID: Mariann Lörstrand Blind lea gieldda giellabargi ja son dat álggahii vuorrasiid deaivvadeami. Son muitala ahte lávejit boahtit gaskkal 10 ja 20 sámi vuorrasa deaivvadeapmqi, dán gearddi ledje logis boahtán. 

Son muitala ahte vuorrasat leat hui ilus go fas besset deaivvadit. Geasset leat moddii deaivvadan olgun, ja dál deaivvadit vuosttaš geardde siste. Coronadávda sáhttá ain leavvat, danin fertejit váruhit ahte eai čohkká menddo lahkalagaid, eaige beasa boahtit jos leat buohcamin dahje nurvos. 

ČÁJEHA GOVAID: Ságat eai noga, ja olbmot čájáhaddet govaid ja besset gullat ságaid go eai leat beassan deaivvadit njukčamánu rájes. Ann Sofia Nyström čájeha govaid Mariannii.

Čále cealkámuša

Your email address will not be published. Required fields are marked *