Válljejuvvon Sámi Parlamentáralaš Ráđi stivrii

Beaska Niillas (NSR) lea mannan duorastaga válljejuvvon Sámi Parlamentáralaš Ráđi (SPR) stivrralahttun. Silje Karine Muotka lea stivrras go lea Sámediggepresideanta. Muđui leat SPR stivrras Sámediggepresideanta Håkan Jonsson, Sámediggepresideanta Tuomas Aslak Juuso, Anni Koivisto ja Per Olof Nutti.

VÁLDÁ OVDDASVÁSTÁDUSA: Beaska Niillas (NSR) lea mannan duorastaga válljejuvvon Sámi Parlamentáralaš Ráđi (SPR) stivrralahttun. Preassagovva: Árvu/Sámediggi.

Beaska Niillas muitala SPR bargu leat okta dain sin vuolggasajiin álbmogin bargat riikkarájáid rastá. Son deattuha ahte ovttasbargu stáhtarájiid badjel lea juoga mainna sis lea guhkes hárjáneapmi ja man sii vuoruhat hui dehálažžan iežaset politihkas. 

– Beaiveálgu-julggaštus čujuha midjiide dehálaš áššiid maiguin dáhttut bargat. Buorre ovttasbargu ja hárjáneapmi riikkarájáid rastá bargat lea čoavdda rádjahehttehusaid njeaidimii. Boahtte áigodaga mis leat stuorra áigumušat ja mis lea buorre politihkka mainna sáhttá ovdánahttit sihke SPR`a ja Sámi boahtteáigái. Mun searvvan dása áŋgirvuođain ja illudan bargagoahtit, dadjá Beaska Niillas, parlamentáralaš jođiheaddji Norgga Sámiid Riikkasearvvis preassadieđáhusastis.

NANNET JA OVDÁNAHTTIT

Sámi Parlamentáralaš ráđis (SPR) leat 21 lahttu mat válljejuvvojit Sámedikkiin Norgga, Ruoŧa ja Suomabeale. Norggabeale leat Beaska Niillas (NSR), Maren Benedicte Nystad Storslett (NSR), AIli Guttorm (NSR), Toril Bakken Kåven (Nkf) ja Ronny Wilhelmsen (Bb) válljejuvvon Sámedikki dievasčoahkkimis. Dáid lassin leaba Sámediggepresideanta Silje Karine Muotka (NSR) ja dievasčoahkkinjođiheaddji Tom Sottinen (Bb) lahttut.

– Mii oaidnit SPR hui dehálažžan, de mii leat ilus ahte Beaska Niillas váldá dán ovddasvástádusa. Mii jáhkkit ahte son sáhttá leat mielde nannet oktasaš Sámi ovttasbarggu. Sus lea guhkes hárjáneapmi ovttasbargat rájiid rastá ja son dovdá sámi servodaga bures, maiddái dain eará riikkain. Mii dáhttut nannet ja ovdánahttit SPR, ja Beaska Niillas lea rivttes olmmoš dán barggus, dadjá Maren Benedicte Nystad Storslett, parlamentáralaš nubbijođiheaddji Norgga Sámiid Riikkasearvvis.

SPR doaimmahanorgána lea stivra. Stivrras leat dat golbma Sámediggepresideantta ja okta lahttu juohke Sámedikkis. Dán áigodahkii lea Sámediggepresideanta Silje Karine Muotka SPR-presideanta. Jođiheapmi molsašuvvá dan golmma Sámedikki gaskkas jeavddalaččat.

GIITEVAŠ JA MOVTTA

Silje Karine Muotka lohká rájáidgaskasaš ovttasbarggu lossa vuoruheapmin Beaiveálgu ovttasbarggus ja leamaš dehálaš ášši NSR:ii maiddái válggasteamis. 

ILUS: Sámediggepresideanta lea ilus Beaska Nillasa áŋgiruššama ovddas . Preassagovva: Árvu/Sámediggi

– Lean ilus go Beaska Niillas lea sávvan váldit ovddasvástádusa SPR stivrras min bealis. Sus leamaš erenomáš váibmu buot sámi áššiide dan rájes go álggii politihkket. Lean hui giitevaš ja movtta su áŋgiruššama ovddas. Mis lea sierra kapihttal Beaiveálgu-julggáštusas gos riikkarájáid goarideapmi lea fáddán. Nubbi mii lea dehálaš ášši lea Giellagáldu vuoruheapmi, gos mii ain dárbbašit návccaid, dadjá Silje Karine Muotka.

Čále cealkámuša

Your email address will not be published. Required fields are marked *