– Urban Mining ii leat Nurrisa molssaeaktu

Vaikko Norgga ealáhusministtar Torbjørn Røe Isaksen oaidná Urban Mining -doaimmas ávkki, de ii loga dan goassege nagodit gokčat dán áigge veaikedárbbu, iige de šatta Nussira ruvkedoaimmaid molssaeaktun.

– Lea olu veaiki birrajođaldagas, ja go atnit veaikki ođđasit Urban Mining -vugiin, de sáhttit geahpedit ollislaš birasdeattu. Dattege ii leat dat doarvái, vaikko ođđasit ávkkástalašeimmetge 100 proseanttain el-dávviriin, maid geavahit. Leat golbma siva dasa, vuosttažettiin ahte muhtun veardde veaiki jávká ođđasit ávkkástallamis. Dasto dárbbašuvvo eanet ahte eanet veaiki, go máŋga geafes riikka huksegohtet vuođđostruktuvrra dađistaga go ekonomiija buorrána. Veaiki lea dehálaš oassi sin barggus. Loahpas vel dárbbašit veaikki ođđa ruoná buktagiidda, nugo bieggamilluide, el-biillaide ja el-girdiide, lohká Ealáhus ja guolástusministtar Torbjørn Røe Isaksen SÁMi ođasmagasiidnii.

 Lea ruhta uhcit Urban Mining prošeavttaide

Vaikko Austrálias čájehit geahččaleamit ahte Urban Mining (sirret veaikki geavahuvvon el-buktagiin ja geavahit veaikki ođđasit) lea sihke beaktileappot, buhttásat ja eambbo gánnihahtti go ruvkedoaimma, de ii oro Norgga ráđđehus áigumin duođas vuoruhit Urban Mininga.

– Departemeanttas leat ealáhusortnegat fitnodagaide, geat dáhttut bargat Urban Miningain. In dieđe man buorre márkan lea smávva fabrihkaide, go Norggas leat juo ollu fitnodagat geat barget ođđasit ávkkástallamiin, nugo Norsk Gjenvinning ja Tomra. Muhto jus oktage oaidná dán buorrin vejolašvuohtan de han dat lea hirbmat buorre, lohká Røe Isaksen.

Ii bisset Nussira

Áidna mii dál sáhttá Nussira bissehit, lea jus Nussir ii čuovo eavttuid, oaivvilda Røe Isaksen. Iige son bala Nussira ruvkedoaimmaid rihkkut eavttuid.

– Iskosat čájehit ahte lea unnán várra ahte partihkkalat levvet eará sadjái go gosa daid vurkejit. Dasto lea unnán vejolašvuohta ahte bázahusaid vurkemis leat negatiivvalaš váikkuhusat ja ahte nuoskkida vurkenbáikki olggobealde. Leat eavttut partihkkaliid leavvamii, ja dat gozihuvvo čađa gaskka. Dat mearkkaša ahte ii galgga olu leavvat vurkkodanbáikki olggobeallai, ovdalgo šaddet bissehit vurkema, lohká Røe Isaksen.

Čále cealkámuša

Your email address will not be published. Required fields are marked *