DAVVI-NORGGA BÁNA: Stuorradikki mearrádus dahkkojuvvui 56 jienain beali ja 30 jienain vuostá. Govvejeaddji: Ørn E. Borgen / NTB.
Opposišuvdna duolmmai ráđđehusa go Stuorradikki eantlohku mearridii maŋŋebárgga, ahte Davvi- Norgga bána huksenbarggut galget álggahuvvot.
– Stuorradiggi dáhttu ráđđehusa álggahit barggu ollašuhttit Davvi-Norgga bána, lohká evttohusas, mii mearriduvvui 56 jienain beali ja 30 jienain vuostá.
JOHTALUSMINISTTAR BÁGGEHALLÁ
Nu bággehalláge oktasaš-johtalusministtar Knut Arild Hareide (KrF) álggahit barggu ruovdemáđija prošeavttain, mii galgá guhkidit toga-johtalusa Fuoskkus Romssa gávpogii. Dasa ministtar ii liiko veahášge, ja lohká ruovdemáđija eahpevásttolažžan ja eahperealisttalažžan.
– Mu vuorjašuhttá dat, ahte mii ráhkadit vuordámušaid maid jáhkán áibbas eahperealisttalažžan ollašuhttit, dadjá Hareide NTBii.
375 KILOMEHTERA – 120 MILJÁRDDA KRUVNNU
Son jáhkká 375 kilomehtera guhkkosaš togagaskka šaddat sakka divraseabbon go gaskal 104 ja 120 miljárdda kruvnnu, nugo lea meroštuvvon.
– Mun jáhkán, ahte Davvi-Norga ferte jurddašit vuđolaččat, sihtetgo duođaid dán ruovdemáđija. Dat dáidá šaddat olu, olu divraseabbon, dadjá son.
BARGIIDBELLODAT JORGGIHII
Bargiidbellodat (A) lea ovdal jienastan sullasaš evttohusa vuostá, muhto jorggihii mannan vahku riikačoahkkima maŋŋil, mii mearridii hukset Davvi-Norgga bána.
Ledje Sosialisttalaš Gurutbellodat (SV), Guovddášbellodat (Sp) ja Ovddádusbellodat (FrP), geat ovddidedje evttohusa. Sii ožžo doarjaga maiddái Ruoksadis (R) ja Birasbellodagas Ruonát (MDG).
OPPOSIŠUVDNA DUHTAVAŠ
Sosialisttalaš Gurutbellodaga nubbijođiheaddji Torgeir Knag Fylkesnes lea hui duhtavaš Stuorradikki mearrádussii.
– Davvi-Norga bázášii bána haga periferiijan, gos dálkkádatgássaid luoitimat galget geahppánit ja energiijabevttolaš fievrrideapmi galgá lassánit. Bána veagas rahpasit stuorra vejolašvuođat ealáhusaide ja olbmuide. Mii šaddat oassin ruovdemáđii-Norggas, dadjá Fylkesnes kommentáras NTBii.