Stáhtaministtar reagere Selbu-dáhpáhussii

Stáhtaministtar Erna Solberg ii loga dohkálažžan vealahit ja olgguštit geange čearddalašvuođa vuođul. Dán lohká son sámiid vuostásaš čoahkkima oktavuođas mii dáhpáhuvai Selbus.

– Sámiid vealaheami ferte duođas váldit, čállá stáhtaministtar Erna Solberg Stuorradikki politihkkáriid neahttaforumis.

Bággii stáhtaministara reageret

SV stuorradiggepolitihkar Lars Haltbrekken dat lea hásttuhan stáhtaministara cealkit oaivilis sámiid vuostásaš čoahkkima  birra. Dán mánu álggus lágiduvvon čoahkkimis lei Organisasjonen for etniskog demokratisk likeverd (EDL) bovdejuvvon logaldallin. Dan organisašuvnna vásihit sámit rasisttalaš organisašuvdnan. Čoahkkimii ledje eananeaiggádat bovdejuvvon. Lágideaddjit vigge caggat čoahkkimii searvamis sámi eananeaiggáda, gii maiddái dáhtui searvat čoahkkimii. Lars Haltbrekken čálii Stuorradiggepolitihkkáriid neahttaforumis:

– Vašši min iežamet eamiálbmoga vuostá ii leat nohkan. Selbu čoahkkin lei eananeaiggádiid várás, muhto sámi eananeaiggáda vigge caggat boahtimis, ja go loahpas luite sisa, de lei eaktun ahte son ii váldde sáni saji nu ahte  provosere earáid. Sámediggi lea ovttajienalaččat cealkán ahte eai dohkket dan mii dáhpáhuvai. Sáhtán go jearrat lohká go stáhtaministtar ge dán dohkketmeahttumin? 

Čállosis Haltbrekken  maid čujuha  dasa, ahte Sámediggi ge ohcala stáhtaministara ja ovddasvástideaddji politihkkáriid reageret dáhpáhussii, man Sámediggi oaidná vealaheapmin sámiid vuostá.  

Ii dohkket 

Stáhtaministtar Erna Solberg lea vástidan čállosa ja lohká ahte ii dohkket vealaheaddji olggušteami etnisiteahta vuođul.

Boazodoalli- ja eananeaiggát Lars Elias Bransfjell lei  Selbu-čoahkkimis. Bransfjell mielas lei unuhas go  eai áigun fuollat sápmelaččaid čoahkkimii.. Govva: Priváhta

– Dáhpáhus masa Haltbrekken čujuha, lea viidát beaggán medias. Jus ovtta olbmo caggá, dahje geahččala caggat beassamis almmolaš čoahkkimii dainna sivain ahte lea sápmelaš de dat dieđusge ii leat dohkálaš. Seammás lean gal maid oaidnán ahte lágideaddjit leat mediain lohkan ahte caggan ii dáhpáhuvvan danne go lei sápmelaš, ja ahte lágideaddjit eai ge loga dohkálažžan caggat geange danne go lea sápmelaš, čállá Solberg. 

Seamma čállosis stáhtaministtar maid lohká diehtit ahte interneahtas vealahit sámiid juohke beaivve. 

– Sámiid vealaheami ferte váldit duođas. Dađi bahábut de beaivválaččat vealahit sámiid interneahta kommentárasajiin. Go vealaheapmi, bilkideapmi ja rasisma nu garrasit čuohcá ahte muhtun sápmelaččat válljejit eret sámi identitehtaset, de dan mii fertet váldit duođas ja dahkat dainna juoidá, lohká Solberg ja muittuha ahte ráđđehusa, stuorradikki ja gielddaid politihkkáriin lea erenoamáš ovddasvástádus  seailluhit ja ovdánahttit sámegielaid, láhčit oadjebas bajásšaddanbirrasiid sámi mánáide ja nuoraide, sihkkarastit sámi vuorrasiidda buori fuolaheami ja ovdánahttit sámi ealáhusaid. 

 – Dan áigu mu ráđđehus dahkat, maiddái boahtteáiggis, lohká Solberg.

Leave a Reply

Your email address will not be published. Required fields are marked *