“Sööfe” oaidnit juovla- mánus NRK Superis

Juovlamánus beassat oaidnit máttasámi nuoraid-TV-ráiddu, Sööfe, NRK Supera neahtta-tv:s. – Mii illudit dan čájehit, lohká NRK Sámi mánáid-tv redaktevra Norleif Krokmo.

– Mátta- ja julevsámi guovlluin dáhttot erenoamážit mánáid-tv buvttademiid ja NRK Sápmái lea duođaid dehálaš addit dan fálaldaga sidjiide. Mii leat nu rámis go TMM Produksjoner dáhttu minguin ovttasbargat ja go leat ráhkadan “Sööfe”-ráiddu. Mii duođaid illudit almmuhit ráiddu juovlamánus. Dát šaddá albma fiinna juovlaskeaŋka sámi nuoraide ja maiddái earáide ge. Go buvttadit máttasámegillii mánáid ja nuoraid TV-fálaldagaid, dat nanne giella ja giktala sihke mánáid, nuoraid ja ollesolbmuid oahppat giela, lohká NRK mánáid-tv redaktevra Norleif Krokmo.

Sööfe. GOVVA: TMM produksjoner

NRK Super neahtta-TV:s

Raasten Rastah -filbmafestiválas, Plassjes, olbmot besse vuohččan oaidnit “Sööfe», TV-ráiddu, maid Mátta-Sámi mánát lohke illudit oaidnit. Fargga beassat mii, geat eat lean festiválas, oahpásnuvvat máttasámi nieiddain TV:s, go juovlamánus beassat oaidnit “Sööfe” NRK Supera neahttasiidduin. Ođđajagis beassat TV:s ges oaidnit ráiddu.  

Lene Ailin Brandsfjell Brandzæg neavttáša urbána sámenieidda, Sööfe. GOVVA: TMM produksjoner

Logi oasis čuovvut 11-jahkásaš Sööfe, gii orru Troandimis. Su eadni lea sápmelaš ja áhčči ges dáčča. Ruovttus hállet olu sámegiela, muhto árgabeaivvis Sööfe ii olus jurddaš iežas sámevuođas. Go galleda eatni soga gárdde luhtte, de ii dovdda gullevašvuođa. Go Sööfe áddjá jápmá, de šaddá vel váddásat bisuhit árbevirolaš sámi eallinvuogi, na goit dassái go Sööfe gávdná sámegielat ustiba, gii dolvvoda su giellaleairraide ja oahpaha sutnje boazodoalu. 

Sööfe guovttos ádjáin (Torbjörn Rensberg) leaba dá mearkume.  GOVVA: TMM produksjoner

Mii čuovvut Sööfe su stuorraservodaga eallimis, gos sámevuohta ii leat guovddážis, ja oaidnit movt son dađistaga rievdá čeavlás sámenieidan, gii duođaid dáhttu iežas kultuvrra ealáskahttit. 

Mii čuovvut Sööfe meahcis maid. Dá Sööfe ja su viellja Hilje (Piera Åvla Bransfjell) guođoheaba bearraša ealu. GOVVA: TMM produksjoner

– Dás lea sáhka gullevašvuođas ja identitehtas. Máŋggas dovdet iežaset Sööfe karakteras, go dát tv-ráidu lea dan dili birra mas olu sápmelaččat leat, muitala buvttadeaddji Dag Rune Johansen.

 – Dehálaš ráidu

Nuoraid-TV-ráidu lea ovttasbargu gaskkal TMM Produksjoner, NRK Super ja NRK Sámi. Justa ovdalaš go ráiddu čájehišgohtet NRK Supera neahtta-TV:s, de galledii TMM Produksjoner beaivválaš jođiheaddji Hans Petter Sundal ja buvttadeaddji Dag Rune Johansen NRK Sámi Kárášjogas. Hárjánan tv-buvttadeaddjiguovttos illudeaba dassái go sámi nuorat ja earát besset geahččat ráiddu neahtas ja TV:s. 

– Mii leat máŋga jagi bargan dáinna ráidduin. Maŋimuš jagi leat bargan buvttademiin. Lea unnán gánnihahtti filbma, muhto min mielas lei suohtas dan ráhkadit. Iige leat vuosttaš geardde go ráhkadit máttasámi tv-ráiddu. Mii leat ovdal ráhkadan “Lara ja Leisa”, ja vásiheimmet barggu nu dehálažžan ja mávssolažžan ahte dáhtuimet dánge ráhkadit, lohká TMM Produksjoner beaivválašjođiheaddji ja mielbuvttadeaddji  Hans Petter Sundal.

Bargu lei nu dehálaš ja mávssolaš ahte hástalusat ráhkadit máttasámi mánáid- ja nuoraidráiddu ii leat hehtten sin čađaheames ovtta nuppi prošeavtta. 

Ida Marie Bransfjell neavttáša Sööfe eatni. GOVVA: TMM produksjoner

– Go mis lei casting, de eai lean beare gallis geat bohte, go eai nu ollugat hálddaš máttasámegiela. Go dat lea daddjon, de leat oba duhtavaččat min neavttáriiguin. Sii leat duođaid čeahpit neaktit, lohká Sundal.  

TMM Produksjoner lea ráhkadan máŋga stuora ja dovddus tv-ráiddu. Sii leat earet eará ráhkadan TV3 ráiddu “Eventyrlig oppussing”.

– Mii leat 35 jagi juo buvttadan beakkánis filmmaid ja ráidduid, muhto justa dán barggu Mátta-Sámis dovdat gelddolažžan ja mávssolažžan. Lea dehálaš buvttadit máttasámegillii. Giella han lei masá jávkamin, ja ain oaidnit ahte giella lea rašši. Mis ledje giellabargit čađat mielde dárkkisteamen ja váruheamen ahte eat daja boastut. Mii sávvat nuoraid liikot ráidui ja ahte mii leat mielde gáhtteme ja nanneme giela, lohká Sundal.

Dáhttot eambbo máttasámegillii

Sööfe ii šatta TMM maŋimuš máttasámi buvttadeapmin. 

GOVVA: TMM produksjoner

– Danne moai letne ge Kárášjogas ja NRK Sámis dál. Mii dáhttut eambbo fállat Mátta-Sápmái. Dál lea min fierpmádatge viidánan ja dovdat olu čeahpes máttasápmelaččaid. Sávan min beassat viidáseappot bargat dáinna, lohká Sundal.

Čále cealkámuša

Your email address will not be published. Required fields are marked *