Skábmagovat dehálaš arena sámi filbmadahkkiide

Skábmagovain beasai filbmadahkki Aslak Paltto čájehit “Badjealbmá čalmmiiguin”. – Boraspirevahágat leat olu vearrát Suomas go Norggas, go dáppe leat ráfáiduhttán geatki ja goaskima. Dáhttun filmmain dokumenteret min árgabeaivvi .

Okta sis gii čájehii filmmas lea Aslak Paltto gii fievrridišgođii kámera mielde masá logi jagi áigi, duođaštan dihte boraspirevahágiid. Filmma namma lea “Badjealbmá čalmmiiguin”.

– Mii gávnnaimet álo ráppiid ja eiseválddit eahpidedje ahte ledje go boraspiret daid speadjan. Rávis álddus šaddet oainnát máksit buhtadusa 1500 euro, ja nu systemáhtalaččat vigge gávnnahit eará jápminsiva daid bohccuin. Mun dovden ahte ferten videogovain duođaštit mii doppe dáhpáhuvvá, go eai jáhke midjiide, muitala filbmadahkki Aslak Paltto.

Eai bálle boraspiriin

Filmma vuosttaščájáhus lei Skábmagovain. Filmmas oainnát movt boraspire speadjá ja makkár vahágat das leat badjeolbmuide. Vahágiiguin eai sáhte dahkat maidege. Sihke geatki ja goaskin leat ráfáiduhtton Suomas.

– Lea nu imaš. Go geatki rasttilda rájá Norgga beallái ja speadjagoahtá doppe, de eiseválddit jávkadit dan. Dáppe eai daga maidege ja jus badjeolmmoš ieš jávkada boraspire, de lea nu stuora ráŋggáštus. Filbma muitala min duohtavuođa, ja mun háliidan ovddastit earáid, geat eai hálit nu hállat dan birra. Mediain boahtá oainnát ovdan dávjá eiseválddiid ja boraspirebealušteddjiid bealli. Min birra ii leat olus ja mun lokten min oainnu filmmain.

Skábmagovat dehálaš arena

Ollu olbmot fitne Skábmagovain Anáris. Govven: Juha Länsman

Aslak Paltto lohká Skábmagovaid festivála hirbmat mávssolažžan, go dákkár arena haga eai livčče dákkár filmmat go sus.

– Dát filbma ii lean šaddan Skábmagovaid haga, lohká son.

Skábmagovaid jođiheaddji Sunná Nousuniemi sáhttá bosihit maŋŋel mannan vahkkoloahpa festivála. Olu olbmot, buori filmmat ja hirbmat buorre vuoigŋa lei sin dáhpáhusain. 

Skábmagovaid jođiheaddji Sunná Nousuniemi lohká Skábmagovaid dehálaš arenan. Govven: Kevin Francett

– Lean hui ilus ja duhtavaš dáinna movt festivála čađahuvvui ja mis leat lassánan olu doaimmat daid maŋimuš jagiid. Ledje hui olu galledeaddjit geat liikojedje filmmaide maid čájeheimmet, lohká Skábmagovaid jođiheaddji Sunna Nousuniemi.

Songe oaidná iežaset festivála hirbmat dehálažžan. Skábmagovaid ulbmil lea ovdanbuktit filbmadahkkiid, sihke báikkálaš filbmadahkkiid, eará sámi filbmadahkkiid ja eará eamiálbmogiidge filbmadahkkiid bargguid.

– Mii dáhttut dahkat sámi filmmaid dovddusin. Eat čájet filmmaid aivve dás filbmafestiválas, muhto maŋŋel sáddet daid eará festiválaide ja olgoriikkaide. Skábmagovain lea hui buorre fierpmádat ja mis lea ovdamearkka dihte ustitfilbmafestivála Aotearoas (Ođđa Selánddas) ja Kanadas gos maid čájehit filmmaid. Mii bovdet álo filbmafestiválaid Skábmagovaide geahččat filmmaid. Dasto válljejit sii makkár filmmaid čájehit iežaset festiválain, lohká Nousuniemi.

Čále cealkámuša

Your email address will not be published. Required fields are marked *