Sávvá filbmafestivála giktalit nuoraid filbmabargin

Ollu olbmot gallededje máttasámi filbmafestivála Raasten rastah . – Mii dárbbašit eambbo máttasámi filbmabargiid ja sávan filbmafestivála giktalit nuoraid šaddat filbmabargin.

Nu lohká Raasten rastah -filbmafestivála jođiheaddji, Stig Arne Somby.

– Hui dávjá go mii lágidit juoidá Mátta-Sámis, de lea ulbmil ráhkadit deaivvadanbáikki sámiide, go mis leat nu unnán deaivvadanbáikkit dáppe. Filbma lea hui buorre medium. Filmma bokte sáhttá čilget sámevuođa ja iežas jurdagiid. Gehččiin lea vejolašvuohta áddet eambbo sámevuođas ja filmmat leat ávkin sihke sápmelaččaide ja earáide, čilge Raasten rastah -filbmafestivála jođiheaddji, Stig Arne Somby.

Olu olbmot

Mannan vahkkoloahpa lágiduvvui Raasten rastah -filbmafestivála. Ollu obmot ledje čoahkkana geahččat filmmaid Raasten Rasteh -filbmafestiválii, Plassjei.

Ollu obmot ledje čoahkkanan geahččat filmmaid Raasten Rasteh -filbmafestiválas Plassjes.

Plassje sátnejođiheaddji Isak Veierud Busch rabai almmolaččat Raasten Rastah filbmafestivála. Son lei hui duhtavaš go nu ollu filmmat leat buvttaduvvon máttasámegillii ja sávai lihku doaluin.

– Raasten rastah lea rievtti mielde kulturfestivála, mii lágiduvvo juohke nuppi jagi. Háliideimmet ahte juohke jagi galggašii juoga dáhpáhuvvat dáppe Plassjes ja danne gohčodeimmet filbmafestivála maid Raasten rastah -festiválan. Guovtte jagi áigi geahččaleimmet lágidit filbmabeaivvi ja go dat lihkostuvai nu bures, de mearrideimmet dán viiddidit olles festiválan dán jagi, čilge Somby.

Nuorat hirpmahuhtte

Raasten rastah -filbmafestiválas čájehedje sihke mátta- ja davvisámi filmmaid.  

Ida Marie Bransfjell, Lene Ailin Brandsfjell Brandtzæg, Amalie Danielsen Gundersen ja Sanna Sööfe Granefjell ledje duhtavaččat Sööfe -mánáid-tv-ráiddu vuosttaščájáhusa maŋŋá, Plassjes.

“Sööfe” -mánáid-tv-ráiddu vuosttaščájáhusa ledje máŋggas vuordán. NRK Sápmi lea buvttadan ráiddu ja dat čájehuvvo maŋŋá NRK:s. 

Gïeleviehkije-filmma lei ges Snoasa giellaguovddáš ráhkadan. Snoesa giellaguovddáš, Gielem Nastedh, lei ovttas nuoraiguin ráhkadan filmmažiid giellavahku oktavuođas.Inger Marit Eira Åhren lea prošeaktajođiheaddji.

Plassje nuoraidskuvlla oahppit ges ledje ráhkadan Stalker-nammasaš balddonasfilmma. Čeahpes nuorat ledje ieža čállán mánusa ja bures čoavdán filmma dramaturgalaččat. Olbmot liikojedje nuoraid bargui ja nuorat ledje ieža hui duhtavaččat čájáhusain. Kinosála lei masá áibbas dievva. 

ssje nuoraidskuvlla sámi nuorat ledje ráhkadan balddonasfilmma. Nuorat ledje ieža hui duhtavaččat filmmain ja nu ledje maiddái geahččit. Kinosála lei masa áibbas dievva. Olbmo spežžo gieđaid duhtavažžan filbmačájáhusa maŋŋá.

– Mu favorihtta lei “Stalker” man skuvlaoahppit ráhkadedje. Guokte vahku ovdal festivála de lei bargobádji skuvlamánáide. Sii leat beassan guovtti beaivvis ieža hutkat ja ráhkadit filmma. Bargobájis lei profešunealla bagadalli ja oahppit geavahedje albma buriid rusttegiid. Lei duohta buorre boađus ja lei nu somá oaidnit sin balddonasfilmma. Maiddái “Sööfe” lei somá oaidnit, go ledje hui olu báikkálaš neavttárat ja dat lea filbmejuvvon dáid guovlluin. Lei maid hui somá oaidnit oahpes olbmuid stuorra činušearpmas, lohká Somby.

Gïeleviehkie-filmma leat nuorat ja Snoasa giellaguovddáš ráhkadan ovttas. Inger Marit Eira Åhren lea jođihan prošeavtta. Govas: Ramona Linnea Victoria Kappfjell Sørfjell, Jonna Dunfjeld Mølnvik, Elli-Jonna Jannok-Joma ja Anne-Marja Kristine Jannok-Joma.

Sávvá eambbo filbmadahkkiid

Son sávvá ahte festivála lea mielde giktaleame eambbo filbmadahkkiid. 

– Galggašedje eambbo máttasámi filbmabargit ja mii sávvat festivála ja bargobájiid giktalit dasa. Leimmet maid bovden Sámi allaskuvlla muitalit filbmaoahpuid birra, gos earet eará Nils Gaup lea oahpaheaddjin. Livččii nu somá rekrutteret nuorra filbmabargiid, go dáppe leat nu olu muitalusat mat eai leat muitaluvvon filmma bokte. 

Morten Fjellheim ja Piera Åvla Bransfjell máistimin šampánja filbmafestiválas.

 Obbalohkái lohká filbmafestivála jođiheaddji iežas duhtavažžan festiválain. 

– Mun oaivvildan, ahte mii leat lihkostuvvan doaluiguin ja boahtte hávvái mii oahppat ahte prográmma ii ábut beare čavga, vai olbmot besset bosihit ja ságastit filmmaid gaskkas. Lean hui rámis go olbmot bohte ja go liikojedje min mánáidprográmmii. 

Boahtte jagi lea dáppe dábálaš Raasten rastah -festivála ja maŋit jagi fas lágidit filbmafestivála, lohká Raasten rastah -filbmafestivála jođiheaddji Stig Arne Somby.

Čále cealkámuša

Your email address will not be published. Required fields are marked *