– Sávašin ahte Sančuari geasuhivčče olbmuid.

Vuosttaš vahkkoloahpa suoidnemánus de lea BeskánLuossaRock, Bieskkenjárggas, Kárášjoga gielddas. Nu mo juohke jagi, de guoimmuhit sámi artisttat Beskán lávddis gitta idjii. Dán jagi beasat gullat Kajsa Balto, Sančuari ja Ivan Buljo. Juoigiid Searvi lávke maid lávdái.

Nu mo ovddit jagiidge, de lea dán ge jagi oaggungilvu bearjadaga BeskánLuossaRockas. Mánát besset nuvttá oaggut, dan botta go váhnemat leat fillemin stuora luosa gáddái. Eahketbeallai lea ges logaldallan ja čájáhus sámi juovssa birra, ja geahččit besset geahččalit juovssaid.

Preassagovva

Okta doaluid lágideddjiin, Stig Arne Somby, muitala ahte dán jagi leat veaháš rievdadan oaggungilvvu. Stuorámus luosa ovddas vuoittát 10 000 ruvnnu, muhto jus luossa deaddá eambbo go 10 kilo, de vuoitá duhát ruvnno juohke kilo ovddas.

Somby lohká ahte bearjadaga lea nuvttá konsearta buohkaide. Bieskkenjárgga násti, Kajsa Balto, doallá konseartta johkagáttis, ja konsearta lea sihke mánáide ja boarrásabbuide.  

Lávvardaga beaivet besset olbmot vuoiŋŋastit, dassáigo eahketbeallai ođđasit rahpet uvssaid ja sámi násttit lávkulit lávdái.

Preassagovva

Váldoartista, gean navdet geasuhit gehččiid lea Sančuari. Sančuari ii leat ovdal leamaš BeskánLuossaRockas, ja Somby doaivu sin nagodit geasuhit maiddái guovdageaidnulaččaid Bieskkenjárgga unna gilážii, mii lea guokte miilla Kárášjoga márkanis. BeskánLuossaRock lea nuppi Guovdageaidnulačča maid bovden: Ivan Buljo. Somby jáhkká ahte Ivan Buljo nagoda geasuhit eambbo nuoraid doaluide.

– Ivan ii leat gal dušše nuoraide, muhto nuorat várra dihtet gii son lea, moddjesta Somby.

Stig Arne illuda festiválii. Buohkat geat leat leamaš BeskánLuossaRockas ovdal, dihtet ahte Skomáhkár Ánde lea festiválas. Diibmá rabai Skomáhkár Ánde áibmočájáhusa ja ovdal lea lágidan čuoikapárka, ja Somby illuda oaidnit maid Skomáhkár Ánde fuobmá dán jagi.

Loahpas Somby ávžžuha geahččat dálkedieđáhusa ja gárvodit dan mielde.  – Ja dieđusge galgá buorre mokta, de šaddá festivála olu suohttasit, moddjesta Somby.

Leave a Reply

Your email address will not be published. Required fields are marked *