Sámi ovdagovva EM silbbain

Sámi ovdagovva Andreas Kramer (21) geas lea gullevašvuohta Guovdageidnui, ja geas ovdalaččas lea U23 EM golli diimmážis, faskii Ruoŧa ovddas silbba Eurohpá meašttirgilvvuin Berlinas.

SÁMI ođasmagasiidna hálešta telefovnnas movttegis ja duhtavaš Andreas Krameriin dan botta go válddesta bottu barggus. Sutnje leat riŋgen buot máilmmi mediat, muhto lihkká astá háleštit minguin maid.

Vuoi makkár viehkamiid čađahit. Vihket seamma johtilit go Ruoŧa olahus lea ja faskejit EM-silbba. Movt orru?

– Lea oba buorre dovdu. In jáhkkán medálja olahit, go vulgen Berlinii, nu ahte lea duođaid buorre dovdu ahte lean viehkan nu ahte faskejin silbba.

Váhnemat Anne Lise ja Jens, oabbá Maria ja oarpmealle Sandra Mariell ledje vuolgán Berlinii doarjut ja geahččat go Andreas viehká EM gilvvuin. Dá lea Andreas justa joavdan moallii. Gova lea eadni ja guovdageainnulaš Anne Lise Kramer (ovdalaš Hollevik) suovvan min geavahit.

Don logat ii lean jáhkku, muhto dus han lei máilmmi buorre viehkan Karlstadas 800 mehteris ovdalaš EM. Doppe han vuitet ja vel vihket ođđa Ruoŧa áigeolahusa?

– Juo, dat manai hui bures ja lei albma ”boosta” EM-ráhkkaneapmái. Dohko ráhkkanit lea maid mannan hui bures. Lean hárjehallan bures ja lean máŋga gilvvohallama garván vai galgen duođaid leat bures ráhkkanan. Mu mihttomearri lei joavdat EM loahppagilvvuide. Jurddašin ahte jus loahppagilvvuide joavddan, de lea buorre vejolašvuohta juksat buori dási, muhto silbba vuoitit gal lei oba buorre.

Maŋŋel máilmmimeašttirvuođa gilvvuin diibmá de lohket iežat buori vuoimmis go besset loahppagilvvuide, muhto ahte loahppagilvvuin dovdet iežat váiban. Man dahket dán háve eará láhkai?

– In dahkan olus eará dán jagi, muhto erohus diimmážis lea ahte dál lean beassan olles jagi daid smávva detáljaiguin bargat buoridan dihte viehkama. Diimmá ektui lean maid dušše fokuseren EM-gilvvuide. Diibmá ledje guovttit stuora gilvvut masa geavahin olu návccaid.

Makkár dieđuid leat ožžon du áhku ruovttubáikkis Guovdageainnus?

– Hui olu dieđuid lean ožžon sihke fulkkiiguin ja earáiguin Guovdageainnus.

Norgga mediain leamaš olu sáhka das ahte berrejit go mánát spesialiseret iežaset ovtta valáštallamis Jakob Ingebrigsten EM-sukseassa dihte. Makkár jurdagat dus lean dan ektui?

– Mun jurddašan mánát gal galget beassat iskat iešguđetge lágan valáštallamiid vai dihtet masa liikojit buoremusat. Nu lei mus. Serven sihke spábbačiekčamis, giehtaspáppas ja viehkamis. Loahpas de válljejin viehkama ja ledjen varra 16 jagi go dan fuomášin.

Leago váhnemiid áŋgiruššan dehálaš? Maid leat du váhnemat mearkkašan dutnje ja movt leat veahkehan ahte EM-silbba dál leat fasken?  

­– Eadni ja áhčči leaba mearkkašan hui olu. Soai leaba vuojihan mu duohkut deike hárjehallamiidda ja gilvvuide. Soai leaba maid veahkkin leamaš hárjehallamiin ja gilvvuin. Áhčči lei mu mielde spábbačiekčanhárjehallamiin ja eatnis geas lea viehkanduogáš, son diehtá olu ja lea bagadan mu ja veahkehan hárjehallamis. Goappašagat leaba leamaš das mu várás.

Makkár plánat leat dál ovddasguvlui?

– Dál galggan vuos gilvvohallat Göteborgas, dasto lea Grand Prix galla Karlstadas Ruoŧas ja de lea diehttelas vel ruoŧameašttirviehkamat. Muđuid leat eará smávit gilvvut ja sáttaviehkan mu Norgga klubba Ullensaker Kisa IL ovddas.

Beassat go vásihit ahte viegat oanehat áiggis go 1.45 ovttage dáid viehkamiin?

– Dan gal sihkkarit beassabehtet vásihit, go lean oalle buorre vuoimmis dál, loahpaha Andreas Kramer.

Fakta:

Andreas Kramer

Riegádan: 1997, 21 jagi boaris

Su olahusat:

U23 gollil EM gilvvuin Polskkas 2017:s

EM silba EM gilvvuin Berlinas dá gieskat

Ruoŧa olahus 800 mehteris, áigi: 1.45.03

Čále cealkámuša

Your email address will not be published. Required fields are marked *