Sámi ealáhusaid roassu

Koronaroassu lea čuohcán garrasit ealáhusaide. Iešguđet doaimmat leat biddjon johtui ja Sápmi ealáhusgárddi jođiheaddji Solveig Ballo duođašta iežaset bargan ollu ealáhusaid ovdii ja ahte sii barget visot maid sáhttet, vai veahkehit sin váttes áiggis.

RÁMIDA BUOHKAID: Sápmi ealáhusgárddi jođiheaddji, deatnulaš Solveig Ballo, lea beanta hirpmahuvvan man ráfálaččat ealáhus birgehallá roasus. Govva: Marie Louise Somby/Árvu

ČÁLLÁN JA GOVVEN: NILS EGIL GAUP

JORGALAN: ANNE RASMUS

Sámi magasiidna deaivvada Sápmi ealáhusgárddi jođiheaddjin Solveig Balloin telefovnnas, nugo lea šaddan dábálažžan dáid koronaáiggiid. Sápmi ealáhusgárddis leat kantuvrrat viđa gielddas ja sii rávvejit, bagadit ja fállet gealboloktema sihke aiddo álgán grundáriidda ja maiddái bures sajáiduvvan fitnodagaide. Fálaldat lea leamaš buorre veahkkeneavvu máŋgga fitnodahkii.

OLLU OASSEVÁLDIT

Sápmi ealáhusgárdi lea lágidan soames webinára (web-seminára) neahta bokte dan rájes go roassu šattai. Oktiibuot leat lágidan golbma deaivvadeami ealáhusgárddi váikkuhanguovllu,  Deanu, Unjárgga, Kárášjoga, Porsáŋggu ja Guovdageainnu fitnodagaide.

Solveig Ballo muitala ahte webinárat leat leamaš bivnnuhat ja ahte fitnodagat leat čájehan stuorra beroštumi deaivvademiide.

– Leamaš hui stuorra beroštupmi ja ollu oasseváldit; lagabui 70:s leat searvan. Dasa lassin lea mis leamaš web-seminára min ulbmilfitnodagaide ja okta oktasaš, nu ahte oktiibuot leat badjel 100:s searvan. Fitnodagaid mielas lea mis leamaš hui ávkkálaš diehtojuohkin dáid webinárain, muitala Ballo.

ROASSU ČUOHCAN

Jođiheaddji lohká sin oaidnit ahte erenomážit kultuvrralaš ja hutkás ealáhusain lea stuorra roassu.

– Mii oaidnit ahte guovllu mátkeealáhusat gillájit, erenomážit Guovdageainnus ja Kárášjogas leat gillán, go masse beassášturismma. Dat čuohcá sakka idjadanfálaldagaide, vásáhusfálaldagaide ja gávpeealáhussii, čilge son.

Jođiheaddji ii geahččal čiegadit dange vejolašvuođa ahte muhtin fitnodagat sáhttet gillát nu garrasit ahte soitet šaddat giddet uvssaid ja heaittihit fitnodaga.

– Mii eat sáhte dadjat ahte dat ii boađe geavvat, erenomážit jus roassu bistá guhkit áiggi, dovddasta Solveig Ballo, gii goittot lohpida sin bargat buot maid sáhttet, vai eastadit dan.

FITNODAGAT OHCALIT

Fitnodagat ohcaledje deaivvademiid koronadili birra ja danin Sápmi Ealáhusgárdi lea daid lágidan.

– Jus háliidit oaidnit maid buriid roassu lea buktán, de leat fitnodagat ferten geahčadit ođđa vugiid ovttasbargat earáiguin, go lea sáhka buktagiid ja fálaldagaid birra. Muhto nugo dadjen de gillájit ollu fitnodagat dál, dadjá son.

GUDNI JA RÁPMI GUVLUI

Seammás rámida jođiheaddji guovllu ealáhusaid roassoáiggis. Son lea beanta hirpmahuvvan man ráfálaččat dat leat hálddašan dili.

– Mus lea stuorra gudni sidjiide ja vuohkái mo sii leat válljen hálddašit dili, rámida Solveig.

EALÁHUSGÁRDDIT DEHÁLAČČAT

Vaikko Sápmi ealáhusgárdi lea riikka nuoramus ealáhusgárdi, mii lea doaibman easkka badjelaš golbma jagi, de oidnet sii jearru lassánan sin fálaldagaide. Sii oidnet maid hui čielgasit man dehálaš fálaldat lea dákkár dilis.

– Mis jearahit eanet fitnodatkurssaid ja muđuige váldet ealáhusas eambo oktavuođa minguin. Mun navddán ahte sii oidnet mis árvvu dákkár áiggis, miihan leat dás sin várás ja geahččalit veahkehit sin, dadjá son.

Čále cealkámuša

Your email address will not be published. Required fields are marked *