Sámi dronnegat Márkomeanuide

Sámi stuorámus artisttat Mari Boine ja Ella Marie Hætta Isaksen lávkeba Márkomeanu lávdái dán geasi. Márkomeannu deavdá 20 jagi dán jagi.

– Vuosttaš artistta, gean bovdiimet deike lei Mari Boine.  Son čuojahii maid dáppe 1999:s go Márkomeannu vuosttaš geardde lágiduvvui, muitala Aili Guttorm, Márkomeanu festiválajođiheaddji. 

Mari Boine ja ISÁK

Márkomeanus lea 20 jagi ávvudeapmi dál. Suoidnemánu 25. – 28. beaivve várret jus dáhtut albma buori musihkkavásáhusa. Earet Mari gii lea váldoartista lávvardaga, de ISÁK ja Ella Marie Hætta Isaksen leat váldoartisttat bearjadaga. 

– 2016 vuittii Ella Marie Sámi Grand Prix. Seamma jagi son lei mielde Márkomeanu Nuoraid Session dáhpáhusain. Jagi maŋŋel son ásahii ISÁK-joavkku ja lea dan rájes lokten sámi musihka dobbelabbui. Dál bohtet deike fas, illudit Márkomeanus.

Ella Marie veršuvdna “Elle”-šuoŋas lea čuojahuvvon 400 000 geardde Spotifys ja diibmá vuittii Ella Marie NRK Stjernekamp-gilvvu. Ellas ja su joavkkus lea leaktu lávddis ja sis lea buorre lávdešovva. Joavku seaguha luođi ja ođđaáigásaš musihka. Jovkui gullaba Ella lassin buvttadeaddji Daniel Eriksen ja rumbočuojaheaddji Aleksander Kostopoulus.  

Kevin Boine ja Ailu Valle

Eai leat máŋga sámi artistta, geat sáhttet rábmot ahte leat rávdnjejuvvon 43 miljovnna geardde ja velá vuolláičállán šiehtadusa Universalain. Dan gal sáhttá 25 jahkásaš deatnulaš Kevin Boine. Maiddá son boahtá Márkomennui ja guoimmuha bearjadaga.

Sámi rapgonagas Áilu Valle ge boahtá Márkomennui

– Su politihkalaš teavsttat ja áibbas erenoamáš lávlunteknihkka geasuha. Vuosttaš skearru son álmmuhii 2012:s ja nuppi ges 2015:s. Dál sus lea áibbas varas skearru fas ja son loahpaha ge min festivála lávvardaga. Lohpidat garra loahpaheami dán jagi.

Muđui leat dát joavkkut Márkomeanus: Ánnásuolu, DJ Idja ja Article 3 mas leat Christina Hætta, Elle Márjá Eira, Sunna Nousuniemi ja Anne Henriette Nilut. 

Mánáid ja nuoraid doaimmat

Márkomeanus lágidit duodjemárkaniid ja eará smávit lágidemiid nugo semináraid, bargobájiid ja dieđusge mánáidmeanu.

– Mánáidmeanus duddjojit oaggunstákku, vihket rebusiid čoavdimin, málejit ámadajuid, ja lea teáhtervaláštallan Sodien ja juoigan/lávlunboddu. Mis lea maid sierra Márkosirkus bearjadaga ja lávvardaga. Dalle ohppet mánát Kim-Runar Klodiussenis ja Malin Heianis koartakoansttaid ja aerobica. Lávvardaga ovdalgaskabeaivvi besset lávddis čájehit iežaset šovva.

– Nuoraide doallá Ánna-Katri Helander hiphop kursa ja lágiduvvo ságastallan SÁNAG bargiin, Ingunn Erikseniin, dan birra “Gokko du rájit leat?”. Sápmi Safeplace Noereh joavkku Sunna Kararina Kielatis ja Jenni Laiti maid searvaba prográmmii. Mii leat maid pláneme sierra nuoraidkonseartta, čilge Guttorm.

Bearjadaga almmuhuvvo maid dán jagi Ofelaš-joavku. 

Seminárat

Dán jagi šaddet maid seminárat: SESAM ja UIT lágidit seminára márkosuopmana birra ja Várdobáiki márkosámi báikenamaid birra. Mii maid gullat movt Sápmi doaibmá Ruošša bealde. Seminárat leat bearjadaga. Lávvardaga leat ges ságastallamat, maid fáddá ii leat vel mearriduvvon. 

– Mis maiddái lea giellalávvu gos lea aivve lohpi sámástit ja lágidit vel smávva giellakurssaidge. Mis lea diktalohkan ja girjjálašvuođaságastallan Sigbjørn Skådeniin ja festiválapoesiija Juvvá Pittjain, gielddasámit lágidit spábbačiekčama aivve fal nissoniidda ja lea historjávánddardeapmi luonddus. Gaskavahku ja duorastaga ovdal musihkkafestivála de oahppat gohkket márkosámi ja gielddasámi biepmuid, geasuha Aili Guttorm.

Čále cealkámuša

Your email address will not be published. Required fields are marked *