Sámediggi leamaš Šveiccas guorahallame Nussira

Sámediggepresideanta Aili Keskitalo ja sámediggeráđi Silje Muotka leaba leamaš detektiivabarggus Šveiccas. Soai geahččaleigga gávnnahit geat Nussira čiegus oasuseaiggádat leat.

– Sámediggi dáhttu diehtit geat eaiggádit 23,66% Nussir ASA ossosiin ja danne leat mii Šveiccas leamaš, čilge sámediggeráđi Silje Muotka SÁMi ođasmagasiidnii.

Čoahkkinasttiiga báŋkkuin

Odne lea vejolaš leat čiegus oamasteaddji muhtin fitnodagas jus fal it oamas badjel 25 % ossosiin. Nussiris lea dakkár čiegus oamasteaddji, mas lea hálddašankonto CreditSuisse-báŋkkus Šveiccas, ja nu bivddii Sámediggi čoahkkima báŋkkuin. 

– Mii dáhttut diehtit gii dat oamasteaddji lea. Mii fertet oainnat garrasit bargat sihkkarastit ahte investorat ja investorbiras ipmirdit ja duođas váldet olmmošvuoigatvuođaid ja eamiálbmotvuoigatvuođaid. Credit Suisse čoahkkin lei dehálaš ja mii sávvat ahte siige oidnet makkár váikkuhusat leat prošeavttain, masa oassálastet, lohká Muotka.

Ii almmuhan nama

Báŋku dattege ii dáhtton almmuhit nama báŋkokontoeaiggádis, muhto báŋku oaččui čilgejuvvot Sámedikki negatiiva oainnu Nussirii, erenoamážit go dáhttot ruvkebázahusaid vurket mearrabodnái. 

– Muhto čoahkkin Credit Suissein lei dehálaš. Báŋkokonttu čiegus eaiggáda ii sáhttán báŋku almmuhit, go dat rihkošii Šveicca  lágaid. Vaikko eat beassan diehtit geat oamasteaddjit leat, de báŋku ain juo beasai gullat makkár ovddasvástádus sis báŋkun lea.

Maiddái NGO (Non Government Organisation), man namma lea Society for Threatened Peoples, muitalit finánsafitnodagaide olmmošvuoigatvuođaid ja birasvuoigatvuođaid birra. Aiddo dál ledje bargame Credit Suisse ja Nussira ektui. Danne bovdeje Sámedikki Šveicii, čilge Muotka.

Šveicca mediain

Dan botta go Sámediggi ja boazoeaiggádat ledje Šveiccas, de ožžo olu beroštumi sihke Šveicca mediain ja organisašuvnnain. Sámediggi searvvai maiddái álbmotčoahkkimii.

– Mii oaččuimet olu fuomášumi, muhto báŋku lei deháleamos. Báŋku lohpidii viidáset barggus atnit muittus eamiálbmogiid ja ehtalaš njuolggadusaid, lohká Muotka. 

Sámediggi ii loga diehtit geat Nussira čiegus eaiggádat leat.

– Eat mii balat geasge, muhto midjiide lea dehálaš diehtit geat dat leat. Ráđđehus han vuoruha Nussira ovdalii boazodoalu ja danne lea dehálaš buot oasuseaiggádiid diehtit. 

– Dušši mátki Šveicii

MonialAS (Norga) eaiggáduššá 31.4 % Nussir ASA ossosiin. Dá leat eará stuorebuš eaiggádat: Baker Steel Resource, Hai invest, AnateusAS (Øystein Rushfeldt) ja AJ HoldingAS. Sin lassin leat vel unnit eaiggádat. Nussiris leat oktiibuot 50 oasuseaiggáda.

Beaivválaš jođiheaddji ja oasuseaiggát Øystein Rushfeldt lea hirpmahuvvan go Sámediggi lea mannan gitta Šveicii ohcat čiegus oasuseaiggádiid.

– Vaikko min neahttasiiddus ii čuoččo geat guokte eaiggáda leat, de ii livčče Sámediggi dárbbašan vuolgit gitta Šveicii. Dat gal lei dušši mátki dainna lágiin, ahte namaid livčče ožžon mus jus livčče váldán oktavuođa. Lean maid suoidnemánu 4. beaivvi sádden reivve Muotkai, mas fálan Sámediggái čoahkkima suinna, geas leat 20,6 % ossosiin. Eat leat gullan maidege Sámedikkis, čilge Rushfeldt gii lohká dán oasuseaiggáda gearggusin deaivvadit Sámedikkiin.

Dattege ii muital nama

Vaikko Rushfeldt ii dáhto SÁMi ođasmagasiinnas almmuhit oasuseaiggáda olles nama, gean birra lea leamaš eanemus sáhka, de lohká son oasuseaiggáda Mátta-Norggas eret ja ahte lea vejolaš suinna oažžut vaikko jearahallamage jus siđašin. Oasuseaiggáda lohká Rushfeldt albma buorredáhtolaš ja čeahpes olmmošin, ja sus lea nana gelbbolašvuohta bákteindustriijas, go vuovdá bákteindustriija reaidduid sihke Norgii ja olgoriikii.

– Su namma ii leat almmolaš neahtas go son ii hálit olles máilbmái muitalit namas ja telefuvdnanummira, muhto mii han dovdat su bures ja ii leat nu ahte ii oktage dieđe gii son lea. Son ii ása Norggas, ja go leat olgoriikkas oasuseaiggádat, de ii leat dábálaš ahte bidjet ossosiid Norgga báŋkkuide. Nu lea dán áššis ge ja danne dat ossosat leat Šveiccas. Ii leat nu ahte mis leat čiegus issoras eaiggádat, go mii han deaivvadat jahkečoahkkimiin ja nu ain, čilge Rushfeldt.

– Leigga Šveiccas álggaheamen kampánnja Nussira vuostá

Rushfeldt ii loga jáhkkit dasa ahte Sámediggi oinnii dehálažžan gitta Šveicii vuolgit ohcat oasuseaiggáda. Son jáhkká Sámediggi baicce dohko vuolgán Nussira nama durddidit.

– Ovdal leat aivve Norgga mediat jearahallan mu. Fáhkka šávihit e-poasttat olgoriikka mediain, ja dán háve Šveicca mediain. Daid mediain leat nu garra čuoččuhusat min doaimmaid birra, ahte in oba dovdda ge Nussira sin čuoččuhusain. Jáhkán soai leigga doppe kámpannja álggaheamen Nussira vuostá.

Sámediggi lea guhká cakkadan Nussira álggaheames ruvkedoaimmaid Fálesnuoris, erenoamážit danne go dat čuohcá boazodollui ja merrii, gosa Nussira ruvkebázahusaid áiggošedje vurket.

– Mun in dárbbaš ieš árvvoštallat váikkuhusaid ja daid bealuštit, go fágalaš váikkuhusguorahallamat lohket čielgasit, ahte Nussira plánat leat dohkálaččat. Galggašeimmet beassat álggahit Nussira bargguid, muhto Sámediggi goazaha álggaheami váidagiinnis. Eat dieđe man guhká váiddaášši ádjána. Sávvamis beassat álgit doaimmaiguin boahtte jagi, lohká Rushfeldt.

Čále cealkámuša

Your email address will not be published. Required fields are marked *