Sámediggi bargagoahtá Riikkarevišuvnna cuiggodemiid ektui

Sámedikki stipeandavejolašvuođat viiddiduvvojit nu ahte oahppan oahpaheaddjit ožžot stipeandda jus háhket oahpahusgelbbolašvuođa sámegielfágain. Seammás Sámedikkis giktališgohtet nuoraid šaddat oahpaheaddjin.

– Dat doaibmabijut addet vejolašvuođa rekrutteret oahpaheddjiid viidábut, dadjá sámediggeráđi Mikkel Eskil Mikkelsen.

Riikkarevišuvdna cuiggodii 

Skuvllat ja skuvlaeaiggádat leat beare heajut muitalit ahte ohppiin lea vuoigatvuohta sámegieloahpahussii. Gáiddusoahpahus lea beare heittot ja obanassiige leat beare unnán sámi oahpaheaddjit ja beare unnán oahpponeavvut. Dát váilevašvuođat heajosmahttet oahpahusfálaldaga, celkkii Riikkarevišuvdna raporttastis mii almmuhuvvui gieskat. Sihke Máhttodepartemeanta, Sámediggi ja skuvlaeaiggádat cuiggoduvvoje raporttas.

Sámediggi mearridii dán jagi maŋimuš dievasčoahkkimisttis njulgegoahtit boasttuvuođaid. Okta doaibmabijuin maid dál álggahit lea stipeandaortnet oahpaheddjiide, geat máhttet sámegiela, muhto geain váilu formála oahpahusgelbbolašvuohta sámegielas.

Sámediggi lea dán rádjai addán stipeandda studeanttaide, geat lohket earret eará vuođđoskuvlaoahpaheaddjin. Dál Sámediggi dáhttu juksat joavkku, mas lea gelbbolašvuohta sámegielas, muhto ii leat formála oahpahusgelbbolašvuohta oahpahit sámegiela.

Stuorra oahpaheaddji váilivuohta

– Mii dárbbašit eanet oahpaheddjiid, mis váilot ollu oahpaheaddjit, nugo maiddái Riikarevišuvnna raporta čujuha. Dát lea okta doaibmabijuin 2020 bušeahtas, dusten dihtii dán hástalusa, dadjá Mikkelsen.

Riikarevišuvdna konkludere skábmamánu 2019 raporttas ahte leat menddo unnán oahpaheaddjit ja ahte erenoamážit julevsámi guovllus njiedjá oahpaheaddjelohku. 

– Sámedikkis lea ovddasvástádus dustet hástalusaid sámi servodagas. Guovddáš váikkuhangaskaoapmi leat stipeanddat, lohká Mikkelsen.

Movttiidahttit válljet sámi oahpuid

Oččodan dihte eambbo sámegielat oahpaheddjiid, de Sámediggi dáhttu hástalit nuoraid váldit oahpaheaddjeoahpu. Bušeahta meannudeames ii viiddiduvvon dušše stipeandavejolašvuohta. Dál Sámediggi áigu deaivvadit maiddái sámi joatkkaskuvllaid ohppiiguin, lágiduvvon deaivvadanbáikkiin. 

– Mii fertet bovdet buot sámi joatkkaskuvlaohppiid diehtojuohkindeaivvadeapmái, vai ožžot dieđuid vejolašvuođaid birra mat gávdnojit sihke stipeanddaid ja oahppovejolašvuođaid ektui. Doppe besset oahppit deaivvadit buot universitehtaiguin ja allaskuvllaiguin, main lea sámi oahppofálaldat, dadjá Mikkelsen.

Čiekŋudančuoggát

Sámediggi juolluda stipeandda ohppiide, geain lea sámegiella vuosttaš dahje nubbin giellan joatkkaskuvllas. Dál lea Sámedikki dievasčoahkkin mearridan ahte oahppit geain lea sámegiella vuosttaš giellan galggašedje oažžut čiekŋudančuoggáid, go lohket sámegiela. 

– Mii diehtit stipeandaortnega bokte guđe joatkkaskuvllain sámegielat oahppit leat. Mii dáhttut addit čiekŋudančuoggáid ohppiide, geain lea sámegiella vuosttašgiellan, vai sis lea gilvoovdamunni go ohcet alit ohppui. Sihke stipeanda, čiekŋudančuoggát ja oahppokonferánsa leat doaibmabijut maiguin dustet gelbbolašvuođa dárbbu mii sámi servodagas lea, dadjá Mikkelsen.

Čále cealkámuša

Your email address will not be published. Required fields are marked *