Rihttet goruda

Ovddit vahkkus muitaleimmet mo njuovvat bohcco, dán vahkku beasat oahppat rihttet goruda. Rihttet lea eará sátni smávvemii. Go rihttet goruda, de smávvet nu ahte čáhká earret eará galmmihanbumbái dahje kástarollii.

Go leat čuohppan mielgga eret, de don čuohpat čoamohasaid ges. Čoamohasas lea dákti siskkobealde man mielde galggat čuohppat. Nuppi govas oainnat ahte erttega ja čoamohasa gaskka lea dego guoros gaskka man mielde galggat čuohpastit. 

Go čoamohasaid leat čuohppan de lea áigi čeabeha váldit. Dál galggat maid ohcat lađđasa, čeabehis. Dan láđđasa mielde galggat čuohppat. Sáhttá leat ábas jus dus lea veahkki guhte loktesta goruda veaháš áibmui, vai šaddá álkit oaidnit ja čuohppat. 

Čoarbbeliid maid galgá čuohppat eret. Go dan áiggut dahkat, de don ozat lađđasa čoarbbeliid gaskka. Go leat gávdnan dan lađđasa ja ludden guovtte lahkkái, de don jorgalat goruda ja čuohpat goabbat beale biehčama. Dál don jorgalat goruda ođđasit, ja dollet čoarbbeallái ja nuppiin gieđain dollet čielgegeahčái ja hoigadat čoarbbeali ovddasguvlui. De don dovddat ahte luovvana láđđasis ja de oaččut beare čuohpastit dávtti mielde eret. Dan galggat goappašat čoarbbeliin bargat. 

Dál leat erttegat vel báhcán čielgái. Go erttegiid áiggut oažžut eret, de don sázut niibbiin erttega lađđasiid mielde máŋgii, goappašat bealde čielgedávtti. Dál jorgalat nu ahte čielgi lea bajás, ja deaddilat čielggi eatnama vuostá. De galget lađđasat luovvanit čielgedávttis, ja de hui álki čuohppat erttegiid luovos čielggis.

Čielggi sáhtát smávvet guovtte ládje, lađastit dahje sahát. Go lađastat de galggat lađđasa čuovvut. Čielggis lea dego bulli, ja galggat dan bulli čuohpastit, go doppe lea lađas. De čuohpat áibbas eret dan bihtá, ja ná joatkkát olles čilggiin. Jus áiggut sahát čielggi, de beasat eambbo summal sahát. 

Go sahát čielggi, de šaddet čábbásat bihtát. Muhtimat oaivvildit ahte čielgi ii leat seammá njálggat jus sahá dan, ovdalii go lađasta. Dan ferte dieđus juohkehaš ieš mearridit, masa liikojit.

Dál leat rihtten goruda, ja de lea oaidnit ná! 

Mii sávvat ahte don ohppet mo galggat rihttet goruda. Dál leat dus guokte vejolašvuođa. Don bijat obban buot bihtáid galmmihanbumbái, dahje don labat. Jus logat boahtte vahkku áviissa, de beasat oahppat mo labat! 

Čále cealkámuša

Your email address will not be published. Required fields are marked *