Diŋgo donge! 
RÁMIS STÁHTAS: Averdi Karasjok AS rehketdoallofitnodaga beaivválašjođiheaddji Ingvald Laiti dadjá min galgat leat rámis das go orrut Norggas.
ČÁLLÁN JA GOVVEN: NILS EGIL GAUP
JORGALAN: ANNE RASMUS
Vaikko álggus lea leamaš veahá jaskat go buohkat vurde ahte bidjet johtui veahkkedoaimmaid, mat eai leat velge áibbas gárvásat, de váillaha Laiti ain beaiveruđaid ortnega persovnnalaš ealáhusaide boahttet sadjái.
– Buhtadusortnet bistevaš goluide rievdá vahkkus vahkkui, ja maŋimustá dán vahkus njiejai iežasoassi 10.000 ruvnnus 5000 ruvdnui. Nu ahte leat šaddan veahá vuordit ahte mo dat ovdána, dadjá Laiti.
OLLU JEARALDAGAT ROASUS
Rehketdoallofitnodaga beaivválašjođiheaddji lohká sidjiide boahtán ollu gažaldagat koronadili birra, muhto lohká Kárášjoga dan dáfus erenomáš dilis, go eai leat nu ollu fitnodagat. Muhto roassu čuohcá erenoamážit turistaealáhussii ja grundárfitnodagaide, mat njulgestaga vardet dál.
– Sis lea roassu ja dan vásihit erenomážit mátkeealáhusat; hoteallaealáhusat main leat stuorra bistevaš golut ja mat eai oaččo buhtaduvvot bálkágoluid ja earát geat leat dahkan stuorra investeremiid, čilge Laiti, gii maiddái oaidná vejolažžan ahte muhtin fitnodagat šaddet vuollánit.
OVDAMUNIT JA DUPPALROASSU
Vaikko muhtin fitnodagat ožžot Sámedikki doarjjaortnegiin veahki, de eai leat sis goittot earágo muhtin ovdamunit.
– Sis leat muhtin ovdamunit, muhto dat lea dan sivas go dat leat smávva fitnodagat, eaige leat stuorra golut. Lea hui dábálaš ahte ovdamearkka dihte duodjefitnodagat dinejit dušše dan mađe ahte birgejit. Muđui dat ožžot doaibmadoarjaga oktii jagis. Nu ahte sámi fitnodagain eai leat eambo ovdamunit go eará fitnodagain, čilge son.
Naba boazodoalloealáhus, lehpetgo sis gullan maidige?
– Sii leat vásihan duppalroasu, guođohanroasu ja koronaroasu ja dasa lassin fertejit váris leat čađat, nu ahte sis ii leat áigi báberbargguide dán áigodagas.
Mo lea eiseválddiid diehtojuohkin leamaš guovllu ealáhussii?
– Mu mielas lea ráđđehus hálddašan dili hui bures. Mun lean rámis ahte leat nu jođánit ožžon sadjái doaimmaid ja vaikko buot ii dáidde áibbas vuoiggalaš buohkaide, de galgat mii mu mielas goittot leat rámis go orrut Norggas, loahpaha Ingvald Laiti.