Ráhkkanit suovastuhttit, cáhpat dahje ferdnet

Guokte maŋemuš vahku leat beassan oahppat mo njuovat ja rihttet goruda. Dál ges beasat oahppat mo labat. Go labat, de don válddát buot dávttiid eret.

Čoamohasa lea hui álki lahpat. Das galggat seamma láhkai bargat go rihttedettiin, ohcat lađđasa. Lađastat, ja de luovvana norasdákti ja báhcá dušše čoamohas. Dál galggat luddet čoamohasa, nu ahte rahpasa ja šaddá gaska. Dan don dagat vai ovdamearkka dihte suovastuvvo albmaláhkái, dahje goiká.

Čoarbbeliin galggat bargat sullii seamma láhkai go čoamohasain. Ozat das maid lađđasa. Don čuohpat čeavžžis vulos, de galgá gávdnot lađas. Lađđasa don gávnnat go veaháš lihkahalat dan dávtti mas don doalat. Lađastat, de báhcá čoarbbealli.

Čoarbbeali galggat luddet, muhto ii fal áibbas guovtti lahkkái. Go áiggut luddet, de don čuovut dávtti, mii lea čoarbbealis siskkobealde. Álgge čuohppat dan bealde gokko lađastit eret norrasa, ja čuohpat measta áibbas birra dan čoarbbeali.

Go dan leat bargan, de dollet dan nuppi bealde bajás ja álggat čuohppat. Čuohpa áibbas dávtte mielde, vai oaččut eanemus lági mielde bierggu eret dávttis. Čuovo dávtti gitta vulos, de boađát nuppi dávtte duohkái, mii doallá čoarbbealebihtáid oktii, dan it galgga čuohppat, dušše gákkastit eret dan nuppi dávttis.

Dál lea dákti oidnosis, ja dan galggat čuohppat bierggus eret.

Dál leat lahpan, ja dál beasat mearridit maid don áiggut bargat biergguin. Go dán rádjai leat joavdan, de leat olu vejolašvuođat. Don sáhtát sáltet ja goikadit, dahje sáltet ja suovastuhttit. Dahje don sáhtát cáhpat bierggu nu ahte lea ovdamearka dihte biđđinbierggu. Don sáhtát maid cáhpat bierggu ja ferdnet biergodáigin.

Čále cealkámuša

Your email address will not be published. Required fields are marked *