Ráhkisvuohta bohccuide t-báiddis

Eirik Simonsen lea gieskat rahpan vuosttaš REIN LOVE nammasaš bivttasgávppi Tromssas.

Son lea riegádan ja bajásšaddan Stientjes (Steinkjer), Trøndelágas, ja lea hui beroštuvvan designas ja maiddái filbmaráhkadeames. Son muitala iežas ráhkadan bivttasmearkka jo 2014:s. Dalle rabai vuosttaš nu gohčoduvvon pop-up gávppi ja maiddái neahttagávppi.

Vuosttaš albma gávpi rahppui diibmá, skábmamánu maŋimuš beaivvi.

– Rein Love namma boahtá dieđusge bohccos, mii maiddái lea logos. Mun lean válljen vilges bohcco logoi, go dat ikona ja dovddus. Dat erohuvvá earáin ja dávjá guorrá iežas bálgáid ja maiddái earáid ofelastá, čilge Simonsen ja čájeha t-báiddi.

Ášši joatkašuvvá gova vuolde.

EAŊGASGILLII: Muhtin biktasiin leat maid eaŋgalsgiel teavsttat.

GUORA IEŽAT BÁLGÁ

“Don’t follow the heard, stay wild” čuožžu das ja Simonsen čilge teavstta áigumuššan ávžžuhit olbmuid válljet iežaset bálgáid. Son ii leat sihkar gos viežžá inspirašuvnna báiddiide ja teavsttaide.

– Dan gal fertejit ipmilat diehtit. Mun vieččan inspirašuvnna sámevuođas ja lean hui rámis dainna. Mus leat sámi máttut Deanus, muitala son.

Ášši joatkašuvvá gova vuolde.

SÁME CEALKAGAT: Eirik muitala iežas viežžat inspirašuvnna sámevuođas ja bohccuin.

LIIKOJIT

Mo tromsalaččat leat vuostáiváldán ođđa buvdda?

– 80 proseantta gallededdjiin leat tromsalaččat ja muhtin mátkkošteaddjit guovlladit maiddái, sii geat leat ohcamin juoidá gelddolaččaid. Mis leat hui ollu guossit dáppe justa dál, geat bohtet miehtá máilmmi. Erenomážit sii geat leat vuolgán vásihit, háliidit oastit juoidá mii lea davvin vuolgán. Sámi design vuovdá bures máilbmái, cealká son.

IEŠGUĐET GÁRVVUT: Rein Love buvddas gávdná iešguđetlágan gárvvuid, main vuhtto sámevuohta.

Leave a Reply

Your email address will not be published. Required fields are marked *