Ožžon ođđa luohttevašvuođa

Sámediggeráđđi lea nammadan guokte oastinkonsuleantta oktan várrelahtuiguin Sámedikki dálá áiggi dáidagiid ja dáiddadujiid oastima ortnegii. Eva Aira ja Geir Tore Holm oaččuiga ođđa luohttevašvuođa joatkit guokte ođđa jagi.

Kárášjoga dáiddaskuvlla ovddeš rektor, Eva Aira (govas), ja Geir Tore Holm leaba nammaduvvon fas dáidaga oastinkonsuleantan oastinlávdegoddái. Aira jođiha lávdegotti. Vuorkágovva: Anne Berit Anti

Sámediggeráđđi lea Sámi Dáiddačehpiid Searvvi (SDS) jahkečoahkkima mearrádusa vuođul nammadan čuovvovaš lahtuid ja várrelahtuid Sámedikki dálá áiggi dáidagiid ja dáiddadujiid oastinortnega oastinlávdegoddái: Eva Aira ja Geir Tore Holm. Soai leaba doaibman oastinkonsuleantan guokte maŋimuš jagi ja oaččuiga jearaldaga joatkit vel guokte jagi, ja soai mieđaiga. Sudno várrelahtut leaba Britta Marakatt-Labba ja Marja Helander.

BUORRE OVTTASBARGU

Kárášjoga dáiddaskuvlla ovddeš rektor Eva Aira lohká ovttasbarggu Geir Tore Holmain doaibman bures oastinlávdegottis guokte maŋimuš jagi ja illuda guovtti ođđa ovttasbargojahkái.

– Sámediggi lea álo vuhtiiváldán Sámi Dáiddačehpiid Searvvi jahkečoahkkima mearrádusa ja evttohusa lahtuide. Ja nugo dál lea šaddan dainna koronaáiggiin, go ii beasa mátkkoštit, de lea buorre ahte mis lea Marja Helander, gii gokčá suomabeale Sámi dáidaga ja fas Britta Marakatt-Labba, gii ges sáhttá johtit Ruoŧa bealde, jus mun in sáhte vuolgit, dadjá Eva Aira SÁMi magasiidnii.

Britta Marakatt Labba dáidda «Muittut I». Govva: Pål Omholt-Jensen, RDM

OASTÁN GIESKAT

Son namuha maiddái ahte sii leat rámis go juolluduvvui veahá ruhta nu ahte leaba Holmain gieskat beassan oastit Máret Ánne Sara ja Britta Marakatt-Labba dáidaga.

– Sámediggi lea ožžon veahá ruđa RiddoDuottarMuseas, nu ahte mii nagodit oastit osiid Egil Utsi dáiddačoakkáldagas, Britta Marakatt-Labba bargguid. Ja mii beassat oastit Máret Ánne Sara čeabetčiŋa, mas bohcco oaiveskálžžut heaŋgájit, čilge Aira.

Máret Ánne Sara dáidda «Pile O´Sápmi Powernecklace» lei mielde documenta 14 i kassel, Duiskkas Sámi ávvujagis 2017:s.fotograf: Karl Alfred Larsen.

DEHÁLAŠ JAHKI

Máret Ánne Sara dáidda «Pile O´Sápmi Powernecklace» lei mielde documenta 14-čájáhusas, Kasselis, Duiskkas, Sámi ávvujagis 2017. Documenta govviduvvo dávjá máilmmi stuorámus ja eanemusat árvvusadnon dáiddačájáhussan. Dat go máŋga sámi dáiddára oasálaste dán čájáhussii, lei okta lávki viidáset sámi dáiddahistorjjás.

– Mii eat oastán maidege dien jagi ja munnos Anne May Olliin, RiddoDuottarMuseaid direktevrrain, lei miella sihkkarastit juoidá documeanta-čájáhusas. Dat lei issoras dehálaš jahki sámi dáiddáriidda, go besse leat mielde dákkár stuorra dáiddadáhpáhusas, muitala Eva Aira, gii ii loga vel diehtit dán jagi eará plánaid, go buot čájáhusat leat maŋiduvvon.

DIEĐUT

Geir Tore Holm (r. 1966) lea bajásšaddan Olmmáivákkis Gáivuonas, muhto orru ja bargá Mátta-Norggas, Ringstad-nammasaš báikkis, Skiptvedtas.

Holm dáiddalaš duogáš lea viiddis ja máŋggabealat. Son bargá sihke videoin, govvidemiin, performánssaiguin ja installašuvnnaiguin. Dan rájes go gearggai Dáiddaakademiijas, Troandima dáiddaskuvllas 1995, lea son gaskkustan, čállán ja oahpahan dálá áigge dáidaga birra. Son lea maiddái oahppan šaddogárdebargi ja lea hui beroštuvvan ovttasbarggus olbmo, birrasa, eanandoalu ja eallima gaskas.

Sámediggeráđi Henrik Olsen (NSR). Govva: Åse M.P. Pulk/Sámediggi

ÁIDNALUNDDOT ČOAKKÁLDAT

Oastinortnega mihttomearri lea sihkkarastit almmolašvuhtii dakkár dáidagiid, maidda lea erenoamáš dáiddalaš beroštupmi sámi dálá áiggi dáidagiid ja dáiddadujiid oktavuođas, dehálaš referánsadáidagiid lassin. Dáidagiid ostet dainna ulbmiliin ahte ovddidit Sámi dáiddačoakkáldaga ja jurdda lea dan lágidit Sámi dáiddamuseai, maid goas nu áiggošedje ásahit.

– Dáiddačoakkáldat, maid oastinortnega bokte leat čohkken áiggi mielde, lea áibbas áidnalunddot. Das leat 1300 dáidaga, ja dat galget leat boahttevaš Sámi dáiddamusea vuođđočoakkáldahkan, dadjá sámediggeráđi Henrik Olsen (NSR) preassadieđáhusas. Son sávvá maid oastinlávdegotti lahtuide lihku bargui.

Oastinkonsuleanttat nammaduvvojit guovtti jahkái háválassii, ja ođđa áigodat bistá suoidnemánu 1. b. 2020 rájes geassemánu 30. b. 2022 rádjai. Bistevaš lahttun leat muđui dat seamma olbmot, geat ledje mielde lávdegottis maiddái ovddit áigodagas, 2018-2020.

RiddoDuottarMuseat (RDM) lea Sámedikki oastinortnega ovddasteaddji hálddašeaddjin.

Čále cealkámuša

Your email address will not be published. Required fields are marked *