Osttii gihcenáhkkegahpira duojáris

Buffy Sainte-Marie ii lean dušše lávddis ja girjeságastallamis. Son váccašii maid Riddu-márkaniin ja gávppašii.

– Lean nu starstruck dál. Buffy Sainte-Marie lei mu gávppis ja gávppašii. Bessen su vel buorrestit, muitala Hilde Marie Lund.

Mearrasápmelaš Hilde Marie Lund ássá ja bargá duojárin Ráissas. Sus lea fágareive duojis ja son duddjo gihccenáhkis, njurjonáhkis, guollenáhkis ja sisttis. Riebansilba, bearralat ja datneárpu čiŋahit su dujiid, maid beassat juohke jagi gávappašit, ain juo Riddu Riđus. Nu deaivvaige son Buffy Sainte-Marie vuosttaš geardde manna háve go násti lei Riddu Riđus.

– Dalle go lei dáppe, guhtta jagi áigi, de gorron luhka sutnje. Seammás diŋgui vel gihccenáhkkegahppira. Gahpir lea veallán guhká ja go de gullen son lea jođus fas deike, de doapmalin gárvet dan áibbas. Ledjen hui gealdagasas boahtá go son viežžat dan. 

Buffy liikui gahpirii

Hilde Marie deaivvai Buffy Sainte-Marie rumbočuojaheaddji Riddu-giettis. 

– Muitalin ahte mus lea gahpir mielde, ja čuojaheaddji muittii mu ja logai son addá dieđu Buffy Sainte-Mariei. Ja fáhkkestaga son čuoččui das. Sus ledje sevdnjes gárvvut, heahttá badjel oaivvi ja sevdnjes čalbmeglásat. Nu dorggiidin ja in diehtán šat maid galggan dadjatge.

Hilde Marie ii leat goassege leamaš dakkár gii nu berošta beakkálmasain, muhto Buffy Sainte-Marie lea duođaid su stuora idola.

– Son lea álo bargan álgoálbmogiid ovddas ja mun lean ieš johtán olu Amerihkás reserváhtain ja oahpásnuvvan sin dujiide. Buffy Sainte-Marie lea uhca gievrras musihkkár. Son lea nu “stillgoingstrong” iežas 78 jagiin. Ledjen nu ilus ja nu gealdagasas ahte in oba muitte ge maid moai ságastalaime go lei mu gávppis. Gahpira goit liikui, boagusta son.  

Ii leat vuosttaš geardde go beakkálmasat leat fuomášan Lund dujiid. 

– Dronnet Sonja lea máŋgii gávppašan mus. Seamma lea Erlend Elias. Mus maiddái leamaš Qatar-šeikkat mu gávppis. Moatti minuhtas gávppašedje 40 000 ruvnnu ovddas, muitala son. 

Leave a Reply

Your email address will not be published. Required fields are marked *