Ođđa ofelaččat almmuhuvvon Márkomeanus

Dán jagi háliidedje olles 19 nuora beassat Sámi ofelažžan. Dađi bahábut besset dušše njealjis dán gelddolaš bargui. Ođđa ofelaččat leat ge dál almmuhuvvon Márkomeanus, Evenášši suohkanis, mannan bearjadaga.

Diimmá skuvlajagi ofelažžan barge Maria Gunilla Påve Wilks, Elle Karen Inga Skum, Vanja Tørresdal ja Eli Karianne Vesterheim Hætta. Eli Karianne muitala preassadieđáhusas ahte son lea giitevaš go lea beassan vásihit dakkár jagi.

– Lean ožžon máŋga ođđa vejolašvuođa. Ođđa ofelaččat gal besset illudit, muitala Eli Karianne, Sámi ofelaš skuvlajagi 2018/2019, preassadieđáhusas. 

Ođđa ofelaččat

Dán jagi leat golbma nieidda ja okta bárdni válljejuvvon ofelažžan, ja sii ovddastit iešguđet guovlluid sámis.

Ođđa Sámi ofelaččat leat deatnulaš Håkon Mudenia (23), unjárgalaš Maila Risten Bongo Dikkanen (19), romsalaš Inga Máret Solberg Åhren (18) ja Aina Haugom Nordfjell (23), gii lea Plassjes eret.

Sámi ofelaččaid doaimmaha Sámi allaskuvla ja Gielda- ja ođasmahttindepartemeanta (GOD) ruhtada doaimma. Ofelaččat čađahit “Sámi kultur- ja servodatoahpu” Sámi allaskuvllas. Dasto mátkkoštišgohtet joatkkaskuvllaide ja eará nuoraiddeaivvademiide olles Norggas. Sin váldoulbmil lea muitalit sámi kultuvrra ja servodaga birra eará nuoraide Norggas. Nu boahtá ovdán preassadieđáhusas.

(Gurot bealde) Ovddeš ofelaččat Vanja Tørresdal ja Maria Gunilla Påve Wilks, Sámi allaskuvlla direktevra Johan Ailo Kalstad, ođđa ofelaččat Håkon Mudenia, Maila Risten Bongo Dikkanen, Aina Haugom Nordfjell ja Inga Máret Solberg Åhren, stáhtačálli Anne Karin Olli (GOD) ja ovddeš ofelaččat Elle Karen Inga Skum ja Eli Karianne Vesterheim Hætta. Govven: Sara Beate Eira Persson 

Čále cealkámuša

Your email address will not be published. Required fields are marked *