Meavrresgárri-ášši kulturministera hálddus

Dánska kulturministeriija lea almmuhan ahte sii leat ožžon ávžžuhusa dánska našunálamuseas meavrresgári luvvejuvvot eret sin čoakkáldagas, maŋŋel go RiddoDuottarMuseat lea gáibidan oažžut eaiggátvuođa hárvenaš meavrresgárrái.

DAGAHAN RIIDDU: Dát sámi meavrresgárri lea dagahan riiddu gaskkal Norgga beale sápmelaččaid ja Dánmárkku. Formálalaččat eaiggáda dánska našunálamusea. Govven: Terje Bendiksby / NTB

Riidu lea badjánan ovtta meavrresgári geažil, mii duoguštuvvui Sámis noaidunproseassas jagi 1691 ja sáddejuvvui Københagenii vuorkái Dánmárkku nationálamuseai. Jagi 1979 rájes leamaš dát hárvenaš sámi meavrresgárri luoikkasin RiddoDuottarMuseas, Sámiid Vuorká-Dávviriin Kárášjogas. Juovlamánu 1.beaivvi nohká sin luoikkasšiehtadus dánska našunálamuseain.

Otná beaivvi lea kultuvrralaččat dehálaš oažžut meavresgári sámi eatnamii, sámi museai Kárášjohkii, muhto dušše luoikkasšiehtadusain mii nohká dán jagi juovlamánu 1.beaivvi. Almmolaččat lea Dánmárkku mii eaiggáduššá dan.

Danin lea Sámediggi ja museavuođđudus RiddoDuottarMuseat gáibidan beassat váldit badjelasat eaiggátvuođa meavrresgárrái.

KULTURMINISTERA BEAVDDIS

Áviisa VG čállá maŋŋebárgga ahte dál lea dánska kulturministeriija almmuhan ahte sii leat ožžon ávžžuhusa dánska našunálamuseas meavrresgári luvvejuvvot eret sin čoakkáldagas, maŋŋel go RiddoDuottarMuseat Kárášjogas čakčat sáddejedje gáibádusa oažžut eaiggátvuođa hárvenaš meavrresgárrái.

Meavrresgáris lea buorre dokumenterejuvvon ja hui dramáhtalaš historjá. Dat duoguštuvvui šamánas Anders Poulssonis, ovdal go son goddui ákšuin dan botta go vurddii duomustis, go lei áššáskuhtton «dohkketmeahttun ja bahás noidošeamis». 

Loahpalaš mearrádusa áššis galgá Dánmárkku kulturministtar Ane Halsboe-Jørgensen dahkat.

DUHTAVAŠ

RiddoDuottarMuseat direktevra Anne May Olli lea ilus ja duhtavaš dáinna ođđasiin, muhto lasiha jođánit ahte ii duostta illudit beare árrat. Son deattuha ahte sii eai sáhte eará go vuorddašit loahpalaš mearrádusa.

ILUS OVDÁNEAMIS: RiddoDuottarMuseat direktevra Anne May Olli lea ilus ášši ovdáneamis, muhto ii loga duostat beare árrat álgit illudit, ovdal go almmolaš diehtu boahtá ahte eaiggátvuohta máhcahuvvo Sápmái, sidjiide dahje Sámediggái. Vuorkágovva: 

– Mii fertet beare vuordit ahte maid dánska kulturdepartemeanta mearrida ja almmolaš vástádusa. Meavrresgárri ii leat máhcahuvvon ovdal go sii dahket mearrádusa ahte galgá dahkot, dadjá Olli SÁMi ođasmagasiidnii.

Olli mielas lea positiivvalaš ovdáneapmi áššis, go dánska našunálamusea lea vuhtiiváldán RiddoDuottarMuseat ja Sámedikki ávžžuhusa máhcahit eaiggátvuođa ja dál lea geigen ášši kulturministerii. Son dadjá iežas goittot leat dan mađe realisttalaš ahte ii álgge ávvudit beare árrat, go sis leamaš heajos vásáhusat ovdal sullasaš áššiin.

– Mu vásáhus lea ahte ii galgga ávvudišgoahttet beare árrat. Sánit ja dagut leat guokte iešguđet ášši

HÁSTALII ÁŠŠIS

Ovddasdusbellodaga Helge André Njåstad hástalii Dánmárkku stáhtaministera Mette Fredriksena áššis go deaivvai su Davviriikkaid ráđis Københagenis mannan gaskavahkku. Son jearai ahte iigo livčče áigi máhcahit eaiggátvuođa meavrresgárrái ja eará sámi klenodiaide. 

Frederiksen oaivvilda ahte sus ii leat gelbbolašvuohta árvvoštallat dan hárvenaš meavresgári masa Norgga beale sápmelaččat háliidivčče eaiggátvuođa máhccahuvvot Danmárkkus. 

HÁSTALUVVUI: Mette Frederiksen hástaluvvui oasálastit áššái hárvenaš sámi meavrresgári ektui. Govven: Mads Claus Rasmussen/Ritzau Scanpix / NTB

– Mun ferten gal leat dan mađe rehálaš ja dadjat ahte mus ii leat nu ollu gelbbolašvuohta árvvoštallat sámi meavrresgári. Mun navddán ahte lea gulahallama duohken, vástidii Frederiksen. 

Ovdal čoahkkima Davviriikka ráđis deattuhii kulturministtar Anette Trettebergstuen (Bb) čielgasit ahte eaiggátvuohta meavrresgárrái galggašii sirdojuvvot Norgga beale Sámediggái.

– Meavrresgárri ii lea fáddán dán jagáš prográmmas Københagenis. Muhto jus fal šaddá áigeguovdil dan birra ságastit mu dánska bargoskihpáriin, de boađán čujuhit ahte formálalaš eaiggátvuohta galggašii sirdojuvvot Sámediggái, dajai kulturministtar NTB:ii. 

Čále cealkámuša

Your email address will not be published. Required fields are marked *