Márkomeanu 20 jagi ávvudeapmi

Dán jagi ávvudedje Márkomeanus 20 jagi vuosttaš lágideames. Lávddis guoimmuhedje Mari Boine, ISÁK, Article 3, Kevin Boine, Dj Idja, Ánnásuolu, Katarina Barruk, Áilu Valle ja Yarsem Galkin.

Ánnásuolo njávkkai guldaleddjiid beljiid jazzlágan litna popmusihkain! Ođđa skearru namma lea Muohtačalmmit, ja dat duođaid šolggihii báhkka festiváladálkin njuolga váimmuide.

Dán jagi lei Márkomeanus viiddis prográmma ja prográmma ráhkadettiin ledje jurddašan sihke mánáid, nuoraid ja boarráset olbmuid. Ledje doaimmat sihke sidjiide geat liikojit valáštallat ja dánsut, ja daidda geat liikojit dáidagii, semináraide ja musihka guldalit.

Katarina Barruk guoskkahii guldaleddjiidis ealás musihkainis ja bures ráhkaduvvon teavsttaidisguin, mat muitalit nuoraid árgabeaivvis, sihke suohttasiin ja losit beliin.

Márkomeanu dán jagi prográmmas ledje earret eará gielddasámi spáppačiekčamat, historjávázzin, giellalávvu, márkosirkus ja márkomeannoviehkan.

Kevin Boine oaččui nuorat guldaleddjiid movttiidit. Ealás vugiinis son oaččui sin lávlut ja dánsut mielde. Kevin lea vuolláičállán šiehtadusa Universal-skearrofitnodagain, ja son lei maid Márkomeanu lávddis. 
ISÁK fidnii gehččiid dánsut ja gieđaid speažžut. Ella Marie duođaid máhttá guoimmuhit lávddis ja oaččui buori oktavuođa gehččiiguin. 
Mari Boine lea min stuorra násti ja geasuhii mearihis ollu guldaleddjiid. Son rábmui gehččiid ja muitalii Márkomeanu leat iežas váimmu guovdu.
Go gielddasámi nissonat čikče duolljespáppa eará sámenissoniid vuostá, de gal lei duođaid leaktu! Go moallavákta ain lebbestii čuvlahealmmi, amas moalla šaddat, de gal lei gehččiin maid hearvái. 
Gielddasáme nissonspábbačiekčan lei bivnnut. 
Máret Rávná Sara Kárášjogas lei duhtavaš gávppiin, go lei vuovdán masá buot liinniid, ledje dušše guokte liinni vel báhcán. 
Čiŋat fitnodat maiddái lei duhtavaš vahkkoloahpa gávppašemiin ja vuvdii čiŋaid bures.
Bongo Ánde vuvdii goikebierggu ja lei johtu dego varas láibbis ja lei duhtavaš gávppiin.
Maret E. A. Bongo ja Jo Dikkanen leigga vuolgán festiválii. 
Eva Isaksen, Gáranasvuonas eret, lei vuosttaš gearddi Márkomeanus. Son lei hui duhtavaš ja lei bures vuovdán. 
Gehččiin lei lihkku go nu fiinna dálki deaivvai dán vahkkolohppii.
Juvvá Pittja logai sáme- ja ruoŧagillii divttaid girjjistis “Duođain in dieđe” ja ollu ođđa divttaid, mat eai leat vel beassan bearpmaid gaskii. Nuorra diktačálli bissehii máŋgasiid guldalit, geat dábálaččat eai nu dávjá girjjiid leahko. 
Márkosirkusis besse mánát gizzut, akrobáhtadáidduid oahppat ja suohtastallat. Dasto besse čájehit gehččiide maid sii ledje oahppan. Suohtas!, lohke mánát oktii njálmmiid!
Nuoraidmeanu Ánna-Katri Helander oahpahii hip-hop nuoraide, geat de besse Áilu Valle mielde guoimmuhit váldolávddis.
Ánna-Katri Helander
Viehkangilvu lei ođasmahttojuvvon, nu ahte eai šat viehkan várrečohkkii muhto lahka gehččiid. Mielde ledje Norgga valit, ja de oaččut jáhkkit ahte lei leaktu!
Viehkangilvvu vuoitit, gurut bealde Katrine Storjord Tovås (Fjell skilag), Noah Nylund (Medkila Skilag), Arnvin Granild (Grovfjord IL), Vegard Johnsen (Ankenes Skiklubb) og Juni Overvik (Bardufoss OIF).
Lujávrilaš Alla Vasileva
Olbmot liikojit geahččat gálvvuid maid duojárat leat váldán mielde. 

Čále cealkámuša

Your email address will not be published. Required fields are marked *