Lávke fas ođđa virgái

Anne Toril Eriksen Balto (Gb) ii geargan guhká leat barggu-
heapmin go sámediggepresideanta Silje Karine Muotka (NSR) nammadii su sámediggeráđi goalmmát ráđđeaddin.

Anne Toril Eriksen Balto lea nammaduvvon Sámediggeráđi goalmmát ráđđeaddin. Preassagovva: Sámediggi

Eriksen Balto luobai gieskat iežas ámmáhis Tromsa ja Finnmárkku fylkkagielddas, gos barggai ekonomiija fylkkaráđđin. Anne Toril Eriksen Balto (44) ii goittot hilgon politihkka ja álgá politihkalaš ráđđeaddin sámediggeráđđái skábmamánu 22. beaivvi, ja dasa son illuda. Sutnje ii leat ráđđeaddi virgi ođas, go doaimmai sámediggeráđi ráđđeaddin áigodagas 2017-2019.

– Lean ovttasbargan Silje Karine Muotkain ovdal, sihke politihkalaš ráđđeaddin ja eará politihkalaš rollain. Muotka lea fiinna ja čielga jođiheaddji ja čeahpes ipmárdus- ja relašuvdnahuksejeaddji. Illudan hirbmadit návccaid bidjat Muotkai ja Beaiveálgu-ráđđái, ja sámepolitihkalaš bargui, dadjá álgi politihkalaš ráđđeaddi Anne Toril Eriksen Balto (Gb) preassadieđáhusastis.

Son lea maiddái leamaš Kárášjoga gieldda sátnejođiheaddjin jagiin 2011-2015.

DUHTAVAŠ

Sámediggepresideanta Silje Karine Muotka lea duđavaš iežas goalmmát ráđđeaddin ja rámida su politihkalaš duogáža.

– Anne Torilis lea viiddes politihkalaš hárjáneapmi ja šaddá stuora resursan sámediggeráđđái ja Sámediggái. Go Anne Toril dál lea nammaduvvon min goalmmát politihkalaš ráđđeaddin, de lea olles min politihkalaš stába sajis. Beaiveálgu-julggaštusas leat mii bidjan alcceseamet alla ambišuvnnaid, ja buorre politihkalaš kapasitehta lea mearrideaddjin dasa ahte olahit iežamet mihtuid, dadjá sámediggepresideanta Silje Karine Muotka. 

ILUS

Guovddášbellodaga parlamentáralaš jođiheaddji Elisabeth Erke lea ilus go Anne Toril Eriksen Balto álgá ráđđeaddin ráđđái.

– Anne Toril lea čeahpes ja hárjánan politihkkár gii dovdá politihkalaš eanadaga, gielddadási rájes Stuoradiggái, ja maiddái Sámedikki vuogádagaid. Son lea sámegielhálli ja son dovdá bures máŋggabealat sámi servodaga ja sámi kultuvrra. Mii illudit go son dál boahtá resursan Beaiveálgui, dadjá Elisabeth Erke (Gb)

Eirik Larsen (NSR) ja John Mathis Utsi (JSL) leaba juo álgán bargui sámediggeráđi ráđđeaddin.

Čále cealkámuša

Your email address will not be published. Required fields are marked *