Kárášjohkalaš čáhcealmmái gearggus NM gilvvuide

Mannan vahkkoloahpa šattai Joachim Olsen nubbin buoremussan čáhcecrossa EM-gilvvuin mat lágiduvvo Soađegilis. Vahku geažes geahččala šaddat norggameašttirin.

Iežas mielas manai buorebut go maid lei vuordán ge Eurohpámeašttirvuođa álgogilvvuin. Loahppagilvvuin ii leat áibbas duhtavaš. Njoazes álgu dágahii ahte ii nagodan šat nu bures jurddašit ja nu ii beassan eurohpámeašttirin.

Kevin Boine illudii ovttas Joachim Olsenin. Govven: Jan Helmer Olsen

– Dahken máŋga smávva feailla loahppagilvvuin ja daid ledjen galgat nagodit garvit. Ledjen njoahci álggus ja go geahččalin duohpat dan áiggi maid massen, de šadden olles leahtu doaladit mohkkái. Mohki in nagodan vuodjit bures, ja nu Antti Holmberg skirvvihii meattá. Báhcen sus inge nagodan šat čilget jurdagiid, ja nu Antti Holmberg vuittii, čilge Olsen, gii mánnán juo vuodjigođii crossa.

Sávvá vuoitit NM

Boahtte vahkkoloahpa leat čáhcecrossa norggameašttirgilvvut Guovdageainnus. Son dáhttu geardduhit dan maid dagai 2014 – vuoitit. 

Leaktu ja somá. Boahtte vahkkoloahpa lea NM ja Joachim Olsen lea gearggus. Govven: Jan Helmer Olsen

– Mun dusten gilvvuid nugo dal de bohtet ja válddán gulul. Leat nu máilmmi olu buori vuoddjit Norggas. Jus meattát binnáge, de dat vahágahttá nu olu. Liikká vuolggán dohko dainna jurdagiin ja jáhkuin ahte vuoittán, lohká Joachim gii dál áigu buot searaid geavahit čáhcecrossa vuodjimii. Son ii dieđe vel áigu go vuodjit muohttaga alde lagamus áiggis gal.

Buorre biras čáhcecrossas

Váldoágga manne loaktá buorebut čáhcecrossas lea olu buoret biras, go dálvecrossas.

Antti Holmberg bođii 1. sadjái ja šattai EM meašttir. Morten Blien bođii goalmmádin ja Joachim Olsen nubbin. Govven: Jan Helmer Olsen

– In leat gal áibbas vuollánan muohttaga alde ge vuodjit, muhto lean guhkes bottu das váldán. Hárjehalan gal ain muohttagis, muhto gilvvuide in searvva gal vuos. Mus mielas lea olu suohttasat čáhcecrossa vuodjit ja biras ja buot lea buoret čáhcecrossas. Dán gilvobirrasis veahkehat guhtet guimmiideamet ja geassit lágidit olu eambbo gilvvuid go dálvet. Muohtacrossas ii leat seamma buorre biras ja doppe ii leat dáhpin veahkehit guhtet guimmiideaset. Mu beales lea loaktin hui dehálaš valáštallamis, čilge Olsen. 

Ii leat dušše buorre biras mii buktá bohtosiid. Maiddái sponsoršiehtadusat leat dehálaččat. Olsena váldosponsor lea Polaris Nordkapp. Sus leat maiddái eará sponsorat, muhto Kárášjogas lea dušše okta sponsor, namalassii Karasjok Bilberging. Son ii livčče joavdan ná guhkás sponsoriid haga ja áinnas háliidivčče eambbosiid.

Ii beasa hárjehallat Norggas

Čáhcecrossa beroštupmi leavvá miehtá Norgga dál, muhto valáštallan ii leat seamma beakkán Norggas go ránnjáriikkain Suomas ja Ruoŧas. Olsen muitala ahte lávejit 10 000 geahčči go Biŧomis leat gilvvut. Doppe Olsen jáhkká stuora beroštumi duohken leat olu buoret vejolašvuođat hárjehallat ja gilvalit.

Olu Olmmoš lei boahtán EM gilvvuide. Govven: Jan Helmer Olsen

– Finnmárkkus eat oba beasage hárjehallat, inge dieđe manne. Fylkkamánni gieldá dan, in dieđe manne. Mii jurddašit luonddugáhttema. Skohter lea ráhkaduvvon čázi alde vuodjimii ja nuoskkida olu unnit go eará vuojánat. Jus skohter bisána johkii ja vuodju, de das ii goaikket ii nagage olju iige bensiidna. Skohter lea ráhkaduvvon nu ahte ii luoitte goaikkanasage. Johkafanas nuoskkida eambbo, čilge Olsen gii justa lea boahtán ruoktot maŋŋel máŋga mánu hárjehallanáiggi Ruoŧas.

Boahtte vahkkoloahpa, namalassii vahkku geažes, beassat oaidnit leago kárášjohkalaš hárjehallan nu ahte faske NM-vuoittu. Okta goit lea čielggas – Norga lea ožžon ođđa motocross-nástti.

Joachim Olsen lea gearggus NM gilvvuide mat lágiduvvojit boahtte vahkkoloahpa Guovdageainnus.  Govven: Jan Helmer Olsen

Čále cealkámuša

Your email address will not be published. Required fields are marked *