Jerrojuvvui fáhkka mielde MGP:ii: – Mielahis somá

Deatnulaš Kevin Boine bovdehalai Melodi Grand Prix oassefinálii 2 jagi maŋŋel go lei plánen.

Kevin Boine (26) muitala iežas ráhkadan lávlaga «Stem på mæ» 2018:s ja sádden MGP:ii, muhto lei menddo maŋŋit jođus. Lávlla beanta vajálduvai, iige deatnulaš lean smiehtan šat dan birra.

– Mii maŋŋoneimmet dalle ja eatge leat šat bargan maidige dainna lávlagiin. Fáhkka válde oktavuođa MGP:s ja lohke ahte dát lávlla galgá mielde dán jagáš gilvvuide ja ožžon jearaldaga ahte háliidango searvat. In lean eahpádusas veaháge, muitala Boine movttegit.

OKTA NIEHKU

Boine lea bargan musihkain jo badjel 14 jagi ja dovddasta ahte beassat čuožžut Norgga stuorámus lávddis, leamaš okta su nieguin dan rájes go álggii lávlut.

– Dát leamaš okta mu nieguiguin dan rájes go ledjen unna gánddaš. Lean álo niegadan šaddat rockenástin, muhto vejolašvuohta dasa Norggas ii dáidde leat nu stuoris. Muhto lean bargan musihkkan astoáigge dásis ja lea šaddan dušše eambo ja eambo. Niehku lei maiddái sáhtit musihkas ráhkadit karrieara ja sáhtit eallit dainna. Dan lean dál dahkan 3 jagi ja lean hui giitevaš, muitala Boine, gii orru Hámmárfeasttas ovttas iežas bearrašiin.

GIITEVAŠ

Son lea maiddái giitevaš oažžut vejolašvuođa oasálastit MGP oassefinálas, mii lágiduvvo dán lávvardaga guovvamánu 8.beaivvi ja sáddejuvvo njuolgga diibmu 19.50 rájes NRK:s.

– Dát lea stuorra vejolašvuohta munnje ja rahpá ollu ođđa uvssaid munnje, mii lea hui dehálaš, čilge son.

«STEM PÅ MÆ»

Teavstta ja šuoŋa lávlagiid leat bidjan Henning Olerud, Stanley Ferdinandez ja Kevin Boine ja lea nu gohččoduvvon “Janteloven” birra.

– Lean čállán «Janteloven» birra, dan dihtii go dat mu mielas lea hui fasttes ášši. Mun oaivvildan ahte buohkat galget sáhtit leat sii ieža. Ahte olbmot eai dárbbaš leat fuolas das ahte maid earát jurddašit ja oaivvildit sin birra. Mis lea dušše okta eallin ja dalle lea dehálaš ahte olmmoš bargá dan maid háliida. Dat maid mun háliidan geažuhit dainna lávlagiin, lea ahte olmmoš galgá leat numo lea ja ahte lea doarvái buorre justa nu, deattuha son.

GEALDAGASAS

Lávvardaga lágiduvvo Davvi-Norgga oassefinála ja dalle lávlojuvvojit guokte duella, mas leat njeallje oasseváldi mielde. Dušše okta beassá viidáset loahpagilvui.

– Mus livčče mihttun beassat viidásabbot ja beassat vásihit loahppagilvvu Tronheim Spektrumas. Muhto in duostta bidjat menddo alla vuordámušaid, go sáhttán behtohallat nu jođánit ja válddán áššiid hui persovnnalaččat jua ii mana mu miela mielde. Ferten dušše bargat dan buoremusa ja addit olbmuide dan šovva maid háliidit. Gal mii de oaidnit das dan bohtosa, loahpaha Boine, gii lea hui gealdagasas.

Ášši joatkašuvvá gova vuolde.

MIELDE FAS: Elin Kåven ja Robin Lynch leaba fas mielde MGP gilvvuin joavkkuin Elin & The Woods. Dán háve lávlagiin «We Are As One». Govven: Anne Rasmus

GUOKTESÁPMELAČČA

Maiddái kárášjohkalaš Elin Kåven iežas joavkkuin Elin & The Woods oasálasta fas gilvvuide. Soai leigga mielde jagi 2017 gilvvuin ja leigga stuorra jiellat dalle. Joavku bođii goalmmát sadjái Eurovision Song Contest loahppagilvvus.

Soai Robin Lynchan lávluba «We Are As One», masa leamaš maiddái Ylva ja Linda Persson mielde ráhkadeamen teavstta ja šuoŋa.

Čále cealkámuša

Your email address will not be published. Required fields are marked *