ISFI ožžon ruđa prošeavttaide

Sámediggeráđđi lea juolludan 500 000 ruvnno ámmátfilbmastudio huksemii Guovdageidnui. ISFI direktevra Anne Lajla Utsi lohká dan dehálaš vuosttaš lávkin gelddolaš prošeavttas. Sparebank 1 Nord-Norge lea maid dorjon prošeavtta nuppiin miljonbeliin.

MOVTTEGAT: Internašunála Sámi Filbmainstituhtta (ISFI) direktevra Anne Lajla Utsi lohká sin leat hui movttegat go leat ožžon jo guovtti sajes ruhtadeami ođđa gelddolaš prošektii. Preassagovva: Marie Louise Somby

Internašunála Sámi Filbmainstituhtta (ISFI) lea gieskat ásahan vuollefitnodaga, Duottar Studio. Duottar Studio AS galgá doaimmahit filbmajietnastudio ja filmma ja TV-prográmmaid redigerenreaidduid. 

– Mii leat hui movttegat doarjaga ovddas ja lea hirbmat stuorra doarjja. Ulbmilin livččii profešunealla filbmajietnabádden, gos sáhttá dubbet ja maiddái filbmajietnabargguid čađahit. Jus buot manná plánaid mielde, de livččii jurdda álggahit huksenbargguid dán čavčča, muitala Anne Lajla Utsi SÁMi magasiidnii.

EAHPESIHKARVUOHTA

Ulbmilin lea fállat ja buvttadit filbmadubbema ja TV buvttademiid maŋŋebargguid, ja dasto láigohit earáide maid filbmajietnastudio ja filbma- ja TV-suorggi redigerenlanja. Son muitala goittot eahpesihkkaris áiggi, maid Covid-19 dagaha, veahá goazadit prošeavtta.

– Dál lea dieđus hui váttes áigi mátkkošteami dáfus, go mis livčče Londonis okta fitnodat, mii lea prošekteren ja vejolaččat galggašii boahtit hukset studio oasi, mas lea filbmajietnalatnja. Mis lea maiddái báikkálaš huksenfitnodat gearggus, muhto buot lea das gitta mo ruhtadeapmi boahtá čoahkkái, čilge son.

Dá oaidná makkárin Duottar Studio ráhkadit. Govva: ISFI

OLLU VEJOLAŠVUOĐAT

ISFI direktevra ii loga iežaset ráhkadit gal divraseamos studio. Huksen máksá sullii 3 miljovnna, muhto sis ii leat vel áibbas ollislaš bušeahtta. Sii oidnet ahte Sápmi dárbbaša filbma infrastruktuvrra, mii doallá riikkaidgaskasaš dási.

– Mii ráhkadit unna studio muhto hui profešunealla dásis. Dat doallá riikkaidgaskasaš dási sihke huksema dáfus ja maiddái teknihka ja sihkarvuođa dáfus. Buot galgá leat dan dásis ahte mii sáhttit váikko makkár prošeavttaid doppe čađahit. Studio addá hui ollu bargovejolašvuođaid ollu filbmadahkkiide ja sin prošeavttaide, muitala son.

ŠADDÁ HÁLBBIBUN

Anne Lajla Utsi muitala jurdaga ámmátstudio huksemii vuolgán muhtun prošeavtta oktavuođas, go oidne man divrrasin šattai báikkálaš jietnaneavttáriid doalvut máttás ámmátfilbmastudioide.

– Mii leimmet dubbemin filmma, mas lei namma «Chihiro og heksene», mii lea Japána animašuvdnafilbma ja mainna álggiimet 2018. Bođii dieđus gaskii vel Jikŋon 2 -filbma. Muhto erenomážit go mii barggaimet Chihiroin de bođii ovdan ahte mis leat dáppe davvin hui ollu čeahpes sámegielat neavttárat, muhto profešunealla filbmastudiot leat lulde, Lulli-Norggas, Lulli-Suomas dahje Lulli-Ruoŧas. Dat divruda prošeavtta hirbmadit jus galgá girddihit máŋgalogi neavttára lulas juohke háve go galgá báddet juoidá, čilge Utsi.

EARÁ RUHTADEADDJIT

ISFI nagodii duođaštit prošeavtta dehálašvuođa nubbi ruhtadeaddjái, Sparebank 1 Nord-Norgei, mii juolluda nu gohčoduvvon Samfunnsløftet (Servodatlokten) bokte doarjagiid iešguđet prošeavttaide. ISFI lea ožžon doarjaga Arena-ortnegis, mainna dorjot deaivvadanbáikkiid, mat loktejit aktivitehta ja nannejit gullevašvuođa. Prošeavtta namma lea «Digital talent hub» ja ISFI lea ožžon doarjaga dasa earáge ruhtadeddjiin, earet eará Davviriikkaid ministtarráđis 500 000 kruvnno.

– Mii leat gohčodan prošeavtta «Digital talent hub» ja dat čatnasa njuolga studioprošektii. Dat galgá leat mielde ráhkadeamen buotlágan ođđaáigásaš filmmaid, main lea ođđa teknologiija. Buot rusttegat, mat adnojit dákkár ođđaáigásaš filmmaid buvttadeapmái, galggašedje maiddái gávdnot dán ođđa studios. Ja prošeakta lea oaivvilduvvon nuorra taleanttaid guvlui ja lea hui gelddolaš ja miellagiddevaš, rámida Utsi.

Prošeaktagovva studios. Govva: ISFI

OŽŽON RUHTALÁNA

Anne Lajla Utsi muitala dáid doarjagiid lassin sin ožžon York University Canadas (Canada 3. stuorámus universitehtas) 140 000 kruvnnu mobiila digitála studiorusttegiidda. Dat galget geavahuvvot bargobájiin, maid ISFI lágida ovttas ovttasbargoguimmiinis Canadas. Canada Media Fund lea dorjon «Stories from the ice» -prošeavtta 2,9 miljovnnain kruvnnuin.

– Dán prošeavttas leat Arctic Chills (álgoálbmogiid bálddonasfilmmat), Tundra Film Camps ja Digital Talent Hub. Buot dát leat árktalaš álgoálbmotovttasbarggut. Dasa lassin 400 000 kr Telefilm Canadas Arctic Chills -álgoálbmotfilmmaide Canadas. Nu ahte mis lea juo ollu prošeaktaruhtadeapmi, mainna sihkkarastit aktivitehta ja doaimma go Duottar Studio válbmana, illuda son.

OĐĐA DÁSSÁI

Duottar Studio ollašuhttimiin filbma- ja jietnabuvttadeapmi loktana áibbas ođđa dássái. Ja go ISFI eaiggáda Studio, de lohká Anne Lajla Utsi lunddolažžan dan cegget Guovdageidnui.

– Guovddáš Sámis eai gávdno dákkár fasilitehtat, mat leat erenoamážit heivehuvvon filbmabargguide. Dieđusge leat muhtin jietnastudiot, muhto dat leat heivehuvvon musihkkii. Min mielas lei lunddolaš dan plánet Guovdageidnui, go dat lea guovdu Sámi, iige leat guhkki eará sajiide. Mis lea maid ovttasbargu Sámi allaskuvllain filbmaoahpu dáfus, mii álgá 2021. Sis lea beroštupmi ovttasbargat Duottar Studioin ja dát sáhttá šaddat buorre fálaldahkan sin studeanttaide. Studio galgá leat Sámi álbmogii buorrin juohke ládje movt vejolaš, erenoamážit sámegiela ja gelbbolašvuođa nannemii, loahpaha son.

OAIVVILDA DEHÁLAŽŽAN: Sámediggepresideanta Aili Keskitalo.
Govven: Åse M.P. Pulk/Sámediggi

DEATTUHA DEHÁLAŠVUOĐA

Sámediggepresideanta oaidná maid dehálažžan ásahit dákkár studio Sápmái. Duottar Studio lea sámi suohkanis ja lahka davvisámegielat taleanttaid. Sámi guovlluin eai leat dál filbmafasilitehtat, main lea dákkár standárda.  

– Odne ii leat makkárge infrastruktuvra filmmaide guovddáš sámi guovlluin ja Duottar Studio de duhtada dárbbu mii lassána jagis jahkái, go ráhkadit ja dubbejit eanet sámi filmmaid, dadjá sámediggepresideanta Aili Keskitalo (NSR) preassadieđáhusastis. 

Son oaivvilda ahte dát fálaldat lea dehálaš sámegielaid ovddideapmái ja bisuheapmái, ja hutkás ealáhusaid ovdáneapmái.

– Studio váikkuha ahte min kulturbargit ja taleanttat sáhttet muitalit iežaset muitalusaid, min iežamet gillii. Dasa geavahit teknihkalaš fálaldaga, mii ovdal ii leat gávdnon davvin, dadjá sámediggepresideanta Aili Keskitalo.  

Čále cealkámuša

Your email address will not be published. Required fields are marked *