Isák ja Intrigue guoimmihit

Nuppi vahkkoloahpa suoidnemánus de lea fas Gaskaijarock, dahje nu mo buohkat dovdet: Midnattsrocken. Dán jagi, nu mo juohke jagi, de leat stuora násttit Leavnnja lávddis.

Dán jagi beasat fas návddašit sihke sámi, Norgga ja olgoriikka násttiid. Earret eará boahtá Isák Levdnjii čuojahit, seamma dahká Alan Walker. Lea dađi bahábut nu geavvan ahte Ella Márjá Hætta Isaksen ii lávllo gal fárrolaga Walkeriin, vaikke leaba ráhkadan šuoŋa fárrolaga. Soai čuojaheaba goappátge beaivve, go ii heiven nu ahte livččiiga beassan seamma beaivve čuojahit.

Muđui lea sámi rockjoavku Intrigue rockanjárggas čuojaheame, ja eará namat nu go: Ina Wroldsen, Gåte, Nico & Vinz, OnklP, Backstreet Girls, Terje Tysland, Maxx, Alex P, Damage Inc., Molluscum ja Stuck In North.

Okta lágideddjiin, Jarl Inge Falch, lohká ahte leat stuora vuordámušat dán jagi festiválii, dan dihte go leat vuovdán eambbo bileahtaid dál go diibmá dán muttos. Falch muitala ahte Alan Walker, Ina Wroldsen ja Isák dat geasuhit olbmuid rockanjárgii dán jagi.

Gaskaijarockas dáhpáhuvvá olu. Don beasat campas suohtastallat, lea guoimmuheapmi lávddis, leat olugat vuovdaleame borramuša ja VIP-guovllus beasat ráfis návddašit konsearttaid. Dán jagi ođas lea ahte lágideaddjit leat ordnen sierra avádaga (sone) gehččiide.

 – Mii áigut ráhkadit nu mo ovdal lei Hard Rock caféas. Lea festiválatealtá, masa olbmot besset čoahkkanit hervvoštallat ovdal go artisttat čuojahit lávddis, čilge Falch.

Leave a Reply

Your email address will not be published. Required fields are marked *