Illusáhka Deanu kulturskuvlii

Sámediggeráđđi addá 150 000 ru doarjjan Deanu kulturskuvlla Sámi mánáidteáhterii, mii lea ráhkkaneamen stuorra ávvudoaluide borgemánus

Kulturskuvla lea buvttadeamen ja ráhkadeamen stuorát čájálmasa ođđa Deanu šalddi rahpama oktavuođas ja vižžojuvvojit ámmátlaš dáiddárat ja kulturbargit geain lea báikkálaš ja regionála gullevašvuohta. Dainna lágiin sáhttet sii ovttastahttit nu ahte oažžut áigái sihke stuorát čájálmasa ja seammás buoridit gelbbolašvuođa sihke Sámi mánáidteáhtera bargiid gaskkas ja maiddái mánáid ja nuoraid gaskkas geat servet buvttadeapmái.

– Mun gullen dán birra ikte ja dát lei illusáhka midjiide. Mii leat hui gealdagasas oaidnit ahte maid earet eará Stáhta Geaidnodoaimmahat buktá dohko. Mii leat čakčat jo álggahan barggu min dáiddalaš nuoraiguin, geat galget beassat báitit ja iežaset dáiddalašvuođain loktet gieldda iešdovddu ja identitehta, čilge Joks.

ILLUDIT ÁVVUDEAPMÁI

Dat stuorra ávvubeaivi lea borgemánu 27.beaivvi ja almmolaš ráhpan ođđa Deanu šaldis lea diibmu 15:00. Rektor lohká sin jo álgán ráhkkanit doaluide, gosa lea ráhkadeamen čájálmasa. Deanu gielda lea ožžon doarjaga 200.000 ru Fylkkagielddas ieš doaluide ja Joks oaivvilda dan álkidit oažžut doarjaga vel Barentssekretariatas, gos leat ohcan 380.000 ru, oažžun dihte ruoššas oasálastit mielde dan stuorra festii.

­– Mii leat bovden ovtta almmáikoara Murmanskas, mas lea namma Amadeus-koara. Ja de leat bovden Arkhangelskas dakkár mánáid sirkusjoavkku, geat barget akrobatihkkan. Ja vel dakkár gáhtateáhter vávvádahkki, čilge Deanu kulturskuvlla rektor Ebba Joks.

SYMBOLALAŠ FÁPMU

Ebba Joks lohká ođđa šaldi leat alla dását dáidagiin ja lohká das leat čiekŋalis symbolalaš fámu ja mearkkašumi.

– Mii lea šaldi. Dat hukse šalddi ovttaskas olbmuid gaskkas. Dat hukse šalddi gielddaid gaska ja riikkarájáid badjel, sihke Supmii ja Ruššii, čilge son.  

Ášši joatkašuvvá gova vuolde.

RÁMIDA SKUVLLA: Sámediggeráđđi Silje Karine Muotka. Sámedikki preassagovva

ALLA DÁSI FÁLALDAT

Sis lea ovddidanprošeakta man ulbmilin lea sáhttit fállat kulturfálaldaga alla dásis mánáide ja nuoraide.

– Sámi mánáidteáhteris Deanus lea juo buorre fálaldat mánáide ja nuoraide, ja sis lea buot jagiid leamaš fokusis sámi dáidda, kultuvra ja giella iežas fálaldagain. Lea illudahtti go sii háliidit ovdánit ain eanet ja buoridit iežaset fágalaš gelbbolašvuođa, dadjá sámediggeráđđi Silje Karine Muotka preassadieđáhusas.

RÁMIDA SKUVLLA

Sámi mánáidteáhter lea ásahus mii lea organiserejuvvon kulturskuvlla vuollásažžan Deanus, ja olahusjoavkun leat Deanu mánát ja nuorat. Teáhter geavaha sihke sámi kultuvrra ja giela čájálmasas, maid ovdal ge leat geavahan iežaset buvttademiin.

– Deanu kulturskuvla bargá ulbmildiđolaččat nu ahte sámegiella galgá oidnot, gullot ja geavahuvvot mánáid ja nuoraid gaskkas. Sii barget hui buori barggu, dadjá Muotka.

Ruđat juolluduvvojit Regionálaovddidanprošeavttat – doarjjaortnegis. Prošeakta deavdá ortnega mihttomearrái, Árjjalaš ja ulbmillaš ovttasbargu regionála ja báikkálaš eiseválddiiguin nannen ja ovddidan dihtii sámi kultuvrra, giela ja servodateallima.

Čále cealkámuša

Your email address will not be published. Required fields are marked *