Heastafeasta Kárášjogas

Sii deddet 10-20 geardde unnit go heasta ja illá ollet dan gáibbe vuollai ge. Kárášjoga nieiddat eai bala gal jiehtanaseallis ja áinnas čájehit SÁMi ođasmagasiidnii movt sin heastabiras lea.

Vuolggán stálla lusa gos dievva Kárášjoga nieiddat viegadit guovtte guvlui. Juohke áidna beaivve dikšot ja hárjehallet sii heasttaid. Kárášjoga heastabiras lea oalle stuoris ja lea okta Norgga stuorámus heastaservviin. Dáppe leat maid eanemus heasttat, mat dohkkejit leat mielde doalvegilvvuin.

– Kárášjoga doalvebirassearvvis leat 179 miellahtu, muhto diehttelasat eai leat ollinge buohkat aktiiva heastavuoddjit. Mis lea okta ponni ja badjel logi stuorra heastta mat, leat dohkkehuvvon vuodjit doalvegilvvuin. Muđuid leat olu olu heasttat dáppe maiguin riidejit ja hárjehallet. Finnmárkkus eai leat eará sajiin ná olu heasttat go dáppe, lohká Kárášjoga doalvesearvvi jođiheaddji Lill Tove Somby.

Madelen Johnsen Dervola (16) čájeha iežas heastta Dalums Vinni. Madelen ii oba muitte ge movt lei go vuosttaš geardde riidii. Son ii lean go njealjejahkásaš dalle. Govva: Ánne Biret Anti

Leaktu heasttain

Knights Tia, Anina Knows Best, Tanni Mosebo, Sjøvoll Tyra, Mira Mant, MC Balder, Lindy Match, Federal Genius, Living Forrest ja Sweet Starlight. Heasttaid namat leat dego vižžon Amerihká actionfilmmain.

The Michelle Somby (11) lea nu buorre iežas hestii ja dikšu dan bures. Govva: Ánne Biret Anti

Leaktu láve Kárášjogas ge šaddat, muitalit Stine Emilie Siri Broks (15), The Michelle Somby (11) ja Madelen Johnsen Dervola (16). Oktii ribahedje mannat heastta, mas lei vovdna vel maŋis. Manai márkanii ja nieiddat ledje suorganan. Balle juoga dáhpáhuvvat, jus olbmuid njeaiga dahje biillain beaškkeha oktii. Muhto manai bures. Eanaš gal lea mannan viehka bures, vaikko stuorámus heasttat deddet sullii 500 kilo.

Dá Stine Emilie Siri Broks (15) heasttainis, Sweet Starlightain. Priváhta govva

­– Gahččen oktii heasttas, ja massen vuoiŋŋahaga. Dalle gal ledjen veahá ballán. In vuollánan ja njuikejin fas heastačielggi ala. Máŋgii lea heasta duolmmastan juolgesuorpmaide maid, ja dat gal maid veahá bávččaga, čaibmá Thea ja čájeha heasttas Anina Knows Best.

Eai bala

Thea lea bajásšaddan heastabirrasis iige loga ballat veaháge. Heasttat leat buoremus maid diehtá. Dasa leat nieiddat áibbas ovtta oaivilis.

– Mun áiggun šaddat heastavuoddjin go stuorun, ja mihttomearri lea šaddat buorre ja olu vuoitit, lohká Thea.

– Lea somá bargat heasttaiguin, lean 8-9 jagi bargan heasttaiguin. Mu stuorámus ovdagovva lea Sandra Bueng, gii lea nu čeahppi. Illudan joatkit dáinna, lohká Stine Emilie.

16-jahkásaš Madelen ges ii oba muittege balai go vuosttaš geardde go heasttain riidii.

– Ledjen 4 jahkásaš go ožžon vuosttaš heastta. In oba muittege ballengo vuosttaš geardde go riidejin. Dá lea mu eallin ja dáinna áiggun dieđusge joatkit. Heasta lea dat buot buoremus, lohká son.

Buorre biras

Doalvebiras Kárášjogas lágida iežas gilvvuid ja johtá miehtá Norgga gilvvuide ja eará doaluide. Mannan vahku ledje Hársttáin, ponnileairras.

– Mis ii leat iežamet bána, gos hárjehallat ja šaddat hárjehallat doppe gos sihkkelastit ja vázzit vánddardit. Dat ii leat buoremus čoavddus ja mis lea dáhttu iežamet bána ráhkadit, go de báhpirat vel šattašedje ortnegii. Beroštupmi lassána ja mii geahččalit johtit doaluid mielde. Dál leimmet Hársttáid gávpogis ja doppe besse nieiddat oahppat sihke doalvevuodjima, teoriija ja searvat gilvvuide, muitala Lill Tove Somby.

Nieiddat leat fargga gergosat vuolgit heasttaiguin vuodjit meahccemáđidja mielde. SÁMi ođasmagasiidna govve várrugasat, amas hárdit jiehtanaselliid.

– Ii leat váralaš. Beare boađe lagabui, boagustit nieiddažat ja buorrestit vel heastta.

Sii čevllohallet dainna go sis lea buorre biras ja go sáhttet čájehit máilbmái ahte maiddái ná davvin lea vejolaš lihkostuvvat doalvevuodjimiin. Kárášjoga heasttat oainnát vuitet oalle dávjá gilvvuin.

Govat Ponni-leairras, Kárášjoga Doalvesearvvi govat.

Čále cealkámuša

Your email address will not be published. Required fields are marked *