Gozihit studeanttaid loaktima

Gieku RS lea sáme searvi Oulus Suomas, mas leat birrasii 30 miellahttu ja lea oaivvilduvvon studeanttaide, geat lohket Oulu universitehta Giellagas instituhtas.

Piritta Laiti lea Vuovdaguoikkas Ohcejot gielddas bajásšaddan, muhto lea orron Oulus maŋimuš 20 jagi ja lea studeren sámegiela mannan čavčča rájes. Son lea eaiddo válljejuvvon Gieku RS searvvi jođiheaddjin ja illuda ođđa hástalusaide.

Ovttastahttit 

Laiti muitala Gieku searvvi oaivvilduvvon studeanttaide, geat lohket Oulu universitehta Giellagas instituhtas sámegiela ja sámi kultuvrra, ja sápmelaš studeanttaide geat lohket Oulu universitehtas.

– Sáhttá maiddái leat miellahttu doarjun dihte ja sáhttá oassálastit min doaimmaide, muhto ii leat jienastanvuoigatvuohta, čilge son.

Searvvi ulbmil lea ovttastahttit Oulu universitehta sápmelaš stundeanttaid ja Giellagas-studeanttaid.

– Mii galgat maiddái doarjjan studeanttaide, geahččalit ovddidit Giellagas-instituhta oahppuid ja ovdanbuktit studeanttaid oaiviliid. Mii galgat maiddái gozihit sin birgejumi oahpuiguin ja mo sii loktet Oulus.

Aktiivalaš searvi

Laiti govvida searvvi hui aktiivalažžan ja lohka sin geahččalit lágidit iešguđet astoáiggedoaimmaid ja doaluid nu dávjá go vejolaš.

– Mii lávet lágidit doaimmaid, gos mii ovdamearkka dihte čoahkkanit speallat lávdespealuid. Dasa lassin lágidit mii álo sámefeastta álbmotbeaivvi oktavuođas. Feasta lea Oulu guovddážis ja gárvodankoda lea gákti, dahje nu gohčoduvvon “Smart casual”. Dohko gal beassá boahtit gii beare gii lea oastán bileahtta. Dán jagi feasta lágiduvvo ođđajagimánu 29. beaivvi ja eambo dieđuid gávnnat dan birra min Facebook-siiddus.

Jođiheaddji muitala sin Válbora áigge lágidit maiddái doaluid. Dasa lassin lágidit čakčat feastta, gos sávvet ođđa studeanttaid bures boahtin. Ávvudit maid smávvajuovllaid.

– Gal mis leat oalle ollu doaimmat jagis. Dasa lassin mii lágidit doaluid ovttas Oulu universitehta eará studeantaservviiguin. Mii maiddái ovttasbargat Oulu Sámit -servviin ja Suoma Sámi Nuorat -servviin.

Iešguđet vuordámušat

Piritta Laiti lohká alddis leat iešguđet vuordámušat ođđa jahkái jođiheaddjin.

– Mis lea hui buorre stivra leamaš ja mis lea buorre bargojuohkin. Mun illudan deaivat ja oahpásnuvvat ođđa olbmuiguin ja hukset alccen fierpmádaga. Dán jagi lea mis maiddái stuorra ávvudeapmi go searvi deavdá 15 jagi. Dat šaddá varra čakčat. Gal mun oainnán ahte mis lea buorre dilli searvvis.

Makkár vuordámušat dus leat dán jahkái?

– Beassat bargat studeanttaid buresbirgejumi ja loaktima ovdii. Ahte mis leat miellahtut ja sii oassálastet min doaimmaide ja doaluide.  

Čále cealkámuša

Your email address will not be published. Required fields are marked *