Diŋgo donge! 
FERTET GÁHTTET: – Eurohpas leat gottit measta duššefal Norggas. Mis lea earenoamáš riikkaidgaskasaš ovddasvástádus seailluhit dan, dadjá dálkkádat- ja birasministtar Sveinung Rotevatn. Govva: Ráđđehus
Min ovddasvástádus lea gáhttet gotti ja luosa, cealká Norgga dálkkádat- ja birasministtar. Dilli lea duođalaš, go dát šlájat sáhttet šaddat rukseslistui.
Norgalaš goddi ja luossa sáhttet šaddat rukseslistui, maŋŋilgo Šládjadiehtobáŋkku (Artsdatabanken) gaskaboddasaš raporta evttoha ođasmahttit listtu nu, ahte dát guokte šlája sirdojuvvojit eret elešis elliid gaskkas elliid gaskii mat leat lahka áitatvuložat.
HUKSEMAT ÁITET GOTTI
Huksemat ja doaimmat duoddaris leat dat, mat áitet gottiid. Lassin leat velá máŋga duhát gotti goddojuvvon maŋimuš jagiin bissehan nammii CWD-dávdda.
– Ráđđehus lea mearridan kvaliteahttanorpma gottiid várás, man vuođul mii vákšut goddemáddodagaid dili vai sáhttit suodjalit gottiid eallinguovlluid ja eallineavttuid, dadjá dálkkádat- ja birasministtar Sveinung Rotevatn (Gurut).
PLÁNA LUOSA VÁRÁS
Luondduluosa dili hárrái čuvgeha ministtar, ahte galgá doaibmaplána ráhkaduvvot. Lassin lea muhtin jagi dás ovdal ásahuvvon johtalusčuovgavuogádat, mii galgá reguleret luossabiebmama vuonain.
(©NTB)
Fáktá gaskaboddasaš Norgalaš rukseslisttus 2021
Loahpalaš listu boahtá skábmamánus. Rukseslistu ođastuvvo juohke guđát jagi. Listu čájeha, guđe šlájat evttohuvvojit sirdojuvvot bajit dahje vuolit kategoriijii 2015 rájes 2021 rádjai.
Guolit: Alitstáinnir: Lahka áitatvuloš dilis elešis dillái Geađgenjuorju (Svalbárddas): Rašis dilis lahka áitatvuloš dillái Luossa: Elešis dilis lahka áitatvuloš dillái Biikaháia (pigghå nammasaš háia): Sakka áitatvuloš dilis rašis dillái. Dábálaš háhká/vuoskku: Sakka áitatvuloš dilis lahka áitátvuloš dillái
Reabbáeallit: Hummar: Elešis dilis rašis dillái
Guobbarat: Čátná (flammekjuke nammasaš čátná/nivssat): Sakka áitatvuloš dilis lahka áitatvuloš dillái
Divrrit: Gáicavievssis (geithams nammasaš stuorra vievssis): Lahka áitatvuloš dilis elešis dillái
Njiččehasat: Njálla: Birzzehas áitatvuloš dilis sakka áitatvuloš dillái Njoammil: Elešis dilis lahka áitatvuloš dillái Goddi: Elešsis dilis lahka áitatvuloš dillái Gumpe: Rievddakeahttá birzzehis áitatvuloš dilis
Lottit: Giron: Lahka áitatvuloš diliš elešis dillái Stuorraskárfa: Elešis dilis lahka áitatvuloš dillái Rievssat: Lahka áitatvuloš dilis elešis dillái
Kategoriijat:
Rukseslistejuvvon ja áitatvuloš: Guvllolaččat sogahuvvan
Birzzehas áitatvuloš
Sakkar áitatvuloš
Rašši
Rukseslistejuvvon: Lahka áitatvuloš
Rukselisttu olggobealde: Eleš Šládjadiehtobáŋku (Artsdatabanken) lea árvvoštallan sullii 23.000 šlája. Kategoriija rievdá máŋgga šlája dáfus. Gaskaboddasaš evttohusat listui leat almmuhuvvon. Cealkámušat sáhttet buktojuvvot gitta miessemánu 2. beaivvi rádjai.