Gearggus joatkit fas

Anne Berit Anti geigii fas ruovttoluotta redaktevrapeanna Anne Rasmusii, gii lávkii oahpes virgái jagi álggus.

Sámi ođasmagasiidna lea virgádan fas Anne Rasmusa redaktevran, maŋŋel go Anne Berit Anti mearridii cealkit eret virggistis. Anti lei rievtti mielde virgáduvvon vuos Rasmusa sadjásažžan, go son válddii eadnepermišuvnna, muhto son jotkkii redaktevran guhkit go plánejuvvon.

– Ledjen plánen jagi bargat, muhto bargen guhkit go plánejin. Dál geigen áirruid fas Ánnii. Giittán bargoskihpáriid, sin geaid lean jearahallan ja dieđusge lohkkiid máilmmi gelddolaš áiggis. Dál joatkkán mátkki ja bisánasttán Ávvirii jahkái gelddolaš prošeavtta olis, muitala Anti.

ILLUDA

Rasmus lohká iežas gearggusin ođđa hástalusaide fas ja illuda fas bargat mediasuorggis.

– Ii lean eahpádusge, maid vástidan, go ožžon jearaldaga lávket ruovttoluotta redaktevravirgái. Sámi ođasmagasiidna lea leamaš álggu rájes dego mu mánná, man lean leamaš mielde huksemin ja hábmemin, nu ahte in dárbbašan beare guhká jurddašallat, muitala Rasmus.

Anne Rasmus bázii jagi 2018 geasset eadnepermišuvdnii, iige šat máhccan redaktevravirgái, go háliidii geahččalit iežas fitnodaga jođihit. 

– Dat ii mearkkaš ahte heaittán oalát iežan čábbodatdoaimmaiguin, muhto barggan dušše astoáiggis dainna, čilge son.

GIITEVAŠ

Sámi ođasmagasiinna beaivválašjođiheaddji Jan Skoglund Paltto giitá Ánne Bireha buori barggu ovddas. Son maid sávvá Ánne fas bures boahttin ruovttoluotta.

– Lean hui giitevaš go Ánne lea fas máhccan min lusa, go son lea leamaš mielde álggu rájes huksemin magasiinna. Seammás háliidan giitit Ánne Bireha issoras buori barggus ja sávan sutnje lihku ođđa bargguin ja muđui eallimis. Mis lea álo uksa rabas jus son ovtta beaivvi fas háliida máhccat min lusa, deattuha beaivválašjođiheaddji.

Skoglund Paltto muitala Sámi ođasmagasiinna muhtin muddui rievdat, ja dat vuhttogoahtá Sámi álbmotbeaivvi ávvudeami oktavuođas. Dán jagi vuosttaš magasiidna ilbmá jo ođđa hámis ja maiddái neahttasiiddu oktavuođas bohtet rievdadusat.

– Mii maid čalmmustahttit maiddái min 3-jagi ávvudeami boahtte mánus, čilge son.

Čále cealkámuša

Your email address will not be published. Required fields are marked *