– Gánnáha gusto doarjut buori ášši

SÁMi magasiidna vuorbádii vuoittu ođđa lohkkiid gaskkas, geat ledje diŋgon magasiinna jahkediŋgojumi kampánjas. Tom-Viggo Vårdal vuittii váldovuoittu, 14 olbmo gámme, man árvu lea 25.380 kruvnno.

Tom-Viggo Vårdal ii vástidan telefovnna vuosttaš háve, go SÁMi magasiidna geahččalii sutnje riŋget. Son riŋgii ruovttoluotta ja beasai de gullat ahte lea vuoitán váldovuoittu.

– Mun osten jahkediŋgojumi ovtta skihpára bokte Álttás. Geir Jøran Sara jearai háliidan go doarjut buori ášši ja dan mun háliidin. Gánnáhii gusto doarjut, lohká duhtavaš Vårdal.

Maid áiggut bargat vuoitogámmiin?

– Mun boađán dan varra cegget Supmii, gos mu oappás lea barta.

ÁIBBAŠA FINNMÁRKUI

Son orru máddin Dillingas, Mossa gielddas, diibmobeali geažes Fredrikstada, muhto lea bajásšaddan Girkonjárggas.

– Olles mu váibmu gullá Finnmárkui ja áibbašan dohko. Lean plánemin fárret ruoktot, davás, muhto dan beaivvi go fárren, de fárren Áltái.

LIIKO BIVDIT

Tom-Viggo Vårdal muitala gámme boahtit buori atnui, go son liiko luonddus vánddardit ja lea loddebivdi.

– Mu bearaš láve loddet, nu ahte mun maid dagan dan. Muhto dat mu skibir, gii oaččui mu oastit abonnemeanta, láve bivdit ealggaid ja lean lohkan ahte mun vuorddán sus bovdejumi ealgabivdui. Dál mus lea gámme gos sáhttit idjadit, nu ahte sávvamis dál boahtá dat bovdehus, dadjá son.


Buot vuoittut:

14 olbmo Goahti (arvu 25.380kr), man Arctic Lávvu AS lea sponsen.
Vuoiti: Tom-Viggo Vårdal, Dilling

Apple Watch (arvu 4250kr), man iSámi Press AS lea sponsen.
Vuoiti: Britt Hansen, Guovdageaidnu

Vakuumapáhkkenmašiidna, 2 gpl (árvu 2500 kr), maid K-Market Härkönen lea sponsen.
Vuoitit: Jarle Johnsen, Leavdnja ja Inga Berit S. Skum, Guovdageaidnu

Bacho čoavddaseahtta, 2 gpl (árvu 2500 kr), maid Sarre Oy lea sponsen.
Vuoitit: Kirsten Anne Utsi, Guovdageaidnu ja Nils Ole J. Triumf, Guovdageaidnu

Luhkka (árvu 1950 kr), man RavenWings lea sponsen.
Vuoiti: Anders Broderstad, Tromsa

Leave a Reply

Your email address will not be published. Required fields are marked *