Gámasuinniid čuohppat ja suidnet

Dán vahku beasat lohkat mo Erkke Niillas Iŋggá Niillas Ánde (Nils Anders Rasmus) rávve gámasuinniid čuohppat. Gámasuoinnit leat lieggasat sihke goikkeha ja gumme-gápmaga siste. Dat njammet láktasa juolggis ollu buorebut go suohkku.b

Gámasuoinnis leat guojat (njiŋŋelas suoinnit), mat leat garrasat. Daid ferte gaikut eret. Dušše duolba varrissuoinnit geavahuvvojit.
Čuohpa sullii gieđa gassosaš lána suinniid ja bija máddagiid ovtta guvlui, ovtta dási. Dan maŋŋá bonjat gierragiid suoidnedukku birra, vuos loažža oktii birra, ja de gežiid čavga. Olgeš belggiin vel deaddilat suoidnegežiid daid suinniid vuollái, mat mannet birra, seammás go daid gaikkut gurot gieđain vulos gežiid ala. 
Jos vieččat bonjaldagaid guhkkin ja gárttat gurput daid, de Niillas Ánde čájeha mo guovttesuorat lánjás (áinnas sieđggas) ráhkadat gurpunbiestaga. Bonja goappáge suori nuppi birra nu ahte šaddá mohkki. 
Mohkkebiestaga ala de barddát bonjaldagaid goappat guvlui, vai bures bissot. De cokkat máddaga mohki čađa ja čavget. Govas oainnát ahte soahki doddjui, sieđga lea sakka soddjilut!
Suoidnegurpi heive vuohkkasit sealgái, dego lávka de.
De lea áigi cápmit suinniid, vai dipmet. Jos dus ii leat muorrašluppot, sáhtát geavahit merresa dahje ákšu. Bija bonjaldaga duolba geađggi ala ja cáme vuos suoidnemáddagiid. 
Ruvvestala suinniid bures vai dipmet.
Jorat bonjaldaga geađggi vuostá nu ahte suoinnit čavggehit, go cámát.
Niillas Ánde čájeha mo bonjaldaga galgá «rahpat», nu ahte siskkimuš suoinnit bohtet olggumužžii, vai datge dipmet.
Dasto mii čatnat bonjaldaga oktii mottiin suinniin (boahkánastit). De lea buorre jorahit bonjaldaga oktii vel geađggi vuostá ja cápmit. 
Go leat beallemuddui cápmán, de giesat gierragiid bonjaldaga birra, ja cámát gierragiid merresa gilggain. Loahpas heŋget gámasuinniid goikat holgii.
Go gámasuoinnit leat goikan de daid sáhttá ráhkadit fierran. Dalle bijat guokte bonjaldaga, nuppi nuppi joatkkan vehá badjálagaid, ja de bonjat. Ja ain lasihat bonjaldaga ja bonjat.
Go leat máŋga bonjaldaga bidjan maŋŋálaga, giesat daid gierdun, ja go bonjat viidáseappot de cokkat ain geaži fiera čađa
Loahpas fierra lea nu gassat ahte giehta ii šat mana čađa. De lea gárvvis ja das lea álki ain váldit nu ollu suinniid go dárbbašat. Vurkkot fiera áittis čoaskásis. Stohpolieggasis ja goikeáimmus suoinnit  goiket ja šaddet moallasat.
Go de áiggut suidnet gápmagiid, de čoavddát buot čuolmmaid ja ruvvestalat suinniid. Dasto don dállet (lutket) suinniid, nu ahte geažit gártet iešguđet guvlui ja šaddá áibmu suinniid gaskii.
De ii leat go suidnet, álgge vuos gámanjuniin, ja cokka dássidit nu ahte eai šatta guoros sajit, gitta jozzaga rádjai. Jos skuovat leat baskkit sáhttá suoinni bidjat dušše gámavuđđui.
De ii leat earágo meahccái viehkalit!Loga eanet: Gámasuidnen, John Isak Sara 

Čále cealkámuša

Your email address will not be published. Required fields are marked *