Festiválatipsat

Leatgo vuohččan festiválii dán geasi, it ge riekta dieđe maid váldit mielde? Vai leat go don juohke jagi festiválas, muhto it goassege máhte riekta páhkket? Ále heađástuva. Mis leat rávvagat dutnje!

1.      Liegga bivut! Vaikke lea báhkka go beaivi goardá, de sáhttá ihkku leat oalle čoaskkis. Dohppe ullobáiddi ja ullosisbuvssaid mielde, de don birget bures. Muđui ávžžuhit váldit mátkái maiddái ulloliinni, luhka ja gahpira. Oađđinseahkka ja duolji leat maid dehálaččat festiválas.

2.      Buorre mokta. Buori movtta galggat ovddemužžan váldit fárrui go vuolggát. Ii oktage gille bahás diŋggain hervvoštallat.

3.      Ale váldde koaffara mielde. Festiválas sáhttá leat stánži ja láiri, de lea buoret coggat visot lávkii dahje bagii.

4.      Powerbank, antibac, njuoskaservieahtat ja kondomat. De it dárbbaš heađástuvvat jus telefovnnas ii leat heagga, hivssegis ii leat sovppá, guhkes ráidu riššui dahje ballat ahte šaddet mánát.

5.      Gákti! Jus leat sámi festiválaide, de lea “must” coggat girjjatgávtti. Girjjatgáktái sáhtát coggat stevveliid, vázzinskuovaid ja gehppesskuovaid.

6.      Buorit skuovat. Muitte, don leat festiválas davvin. Go válddát stevveliid, buriid vázzinskuovaid ja gehppesskuovaid, de leat dus juohke dálkái skuovat.

7.      Jáhkat. Arvejáhka, náhkkejáhka ja uvjajáhka sáhtát matchet buot biktasiiguin mat dus leat mielde, maiddái girjjatgávttiin. 

8.      Stuora lávu dahje tealttá. Vaikke lávvu dahje tealtá orru stuoris buvddas, de fertet muitit ahte dus leat dávvirat maid mielde. Váldde veaháš stuorát lávu/tealttá go maid jáhkat iežat dárbbašit.

9.      Ale váldde divraseamos diŋggaid mielde. Jus it hálit bilidit solju, maid áhkus árbejit dahje láhppit divrras skuovaid maid moarsis ožžot, ale váldde daid mielde. Festiválas eai beroš jus dus leat Europris skuovat, dahje Coopas oston jáhkka.

10.   Borramuš ja juhkamuš, eará go alkohola. Jus galggat veadjit ijat beivviid stálet, de fertet muitit bures borrat, ja juhkat čázi. It don čielgga vaikke jugašitge ovtta bohtala čázi. Ii sáŋgár ge bargga biepmu haga.

11.   Beaivečalbmeláset. De sáhtát suddjet čalmmiid jus lea beaivvádat, dahje čiehkat váiban čalmmiid. Oza kulamus čalbmelásiid mat dus leat, muhto ále daid divrasamosiid gal.

12.   Heahteveahkebusseš. Dása deavddát Aloe Vera gel, skohpalastinloastariid, loastariid, OB:id, oaivebávččasdálkasiid ja allergiijadálkasiid. Allergiijadálkasat sáhttet buorit jus leat gomát!

13.   Campingstuollu. Festiválamanni sáhttá váibat, de lea buorre čohkkedit veaháš. Ii feasta noga vaikko vuoinnastat julggiid, luođi sáhttá rohttestit sihke čohkkut ja čuožžut.

14.   Oasálaste ieš! Galgá dovdot ahte leat leamaš festiválas. Juoigga ja lávllo obbačoddagiin ieš ge, ja earáide maid somá go luohti gullo campas. Jietna gal boahtá fas ovdal go álggát skuvlii dahje bargui.

15.   Čuovo festivála čalmmiiguin, it ge telefovnna čađa. Buot du snap-olbmát eai soaitte gillet geahččat diibmoviissaid konseartafilmmaid. Nahket telefovnna lummii, ja čuovo ieš konsearta.

Muđui mii dieđus ávžžuhit láhttet olmmožin, suohtastallat ja ođđa olbmuiguin oahpásnuvvat! Dohkket jus nubbi lohká “ii”, iige leat mielde. Festiválacampa vávttat veahkehit jus lea mihkke. Loahpas mii sávvat buot lohkkiide buori ja somás festiválageasi! Váldet vara guhtet guoimmisteattet.

Čále cealkámuša

Your email address will not be published. Required fields are marked *