Eiseválddit leat sihkkon báikkálaš rivttiid ja addán ovdamuni Suoma bartaeaiggádiidda

Ráđđehus ja Suoma eiseválddit leat dahkan ođđa šiehtadusa Deanu guolásteami birra, gulahalakeahttá báikkálaš guolástanorganisašuvnnaiguin, Sámedikkiin ja báikkálaš olbmuiguin.

Bargiidbellodaga sámediggejoavkku parlamentáralaš jođiheaddji Ronny Wilhelmsen (BB) ii dohkket mo ráđđehus lea meannudan Deanošiehtadusa. Preassadieđáhusas son muitala iežas suhttat go oaidná mo Norgga ráđđehusbellodagat láhttejit báikkálaš guolásteddjiiguin ja vuoigatvuođalaččaiguin.

Ođđa šiehtadus diktá earret eará Suoma bartaeaiggádiid vuovdit oaggunkoarttaid ja dieinna lágiin goaivut alcceseaset oktasašgotti boađuid.

 
– Mii eat sáhte dohkkehit ahte suopmelaččat váldet min báikkálaš olbmuid vuoigatvuođaid. Joga valljodat gullá báikkálaš guolásteddjiide, ja dan dihte oainnán mun dán rievideapmin, muitala Wilhelmsen preassadieđáhusas.

Tom Sottinen. Preassagovva

Guolásteapmi Deanus ja dan oalgejogain lea leamaš dehálaš oassi sámi kultuvrras ja servodateallimis, goappaš bealde rájá. Sámediggeáirras Tom Sottinen (BB) oaivvilda sámi kultuvrra ja báikkálaš vuoigatvuođalaččaid massit ollu, go ođđa šiehtadus boahtá fápmui.

– Ii galggaše gal nu ahte olbmot, geain ii leat gullevašvuohta guvlui, besset oastit eatnamiid ja dieinna lágiin oažžut vuoigatvuođaid ja bágget báikkálaš olbmuid eret Deanus, muitala Sottinen preassadieđáhusas.

Bargiidbellodaga sámediggejoavku doarju Deanu čázádaga báikkálaš guolástanservviid, mat dál gesset Dálkkádat- ja birasdepartemeanta diggái. Guolástansearvvit oaivvildit ahte stáhta galgá cealkit eret šiehtadusa, ja álggahit ođđa šiehtadallamiid, maidda váldet mielde báikkálaš olbmuid. Nu boahtá ovdán preassadieđáhusas.

Čále cealkámuša

Your email address will not be published. Required fields are marked *