Eai vuollán vel Nussir-áššis

Gonagas stáhtaráđis lea dohkkehan Nussir ASA ruvkedoaibmakonsešuvnna Nussiris ja Gumpenjunis, Riehpovuonas. Sámediggi ja boazodoallit barget ruvkke vuostá ain.

JEARAHALLAN: GLR– Mii go galgat váldit ovddasvástádusa čorget máilmmi ruskkaid? Nussir ruvkedoaibma molle min orohaga ja min boahtteáiggi

CELKKII FIETTAR ORORHAGA OVDAOLMMOŠ NILS UTSI SÁMEDIKKI SÁRDNESTUOLUS.

Su siidaguoibmi lea maid heađástuvvan.

– Mii leimmet gal dieđusge sávvan ahte váldet vuhtii min ja Sámedikki váidaga. Muhto seammás diehtit ahte Ráđđehusas lea vuostebiegga boazodoalloáššiide. Mii balaimet juo ahte manná dan guvlui, lohká Fiettar orohaga nubbijođiheaddji Nils Mathis Sara.

Govven: Silje Karine Muotka

Dáhttut áššáskuhttit stáda

Fiettar orohagas lea sihke geasseorohat, guottetbáiki ja johtolat guovllus, gosa Nussir ASA dál beassá ráđđehusa sivdnádusain álggahit ruvkedoaimmaid. Sii eai dáhto vuollánit, go oidnet doaimma nu stuora vahágin ahte ballet máŋgasiid šaddat heaitit, go ii leat šat ealáhat.

– Eat mii heaitte oktage dan beaivvi go roggagohtet, muhto áiggi mielde de han boađus ealáhusas šaddá nu heitot, ahte ferte vuollánit. Justa gii ja gallis darvánit dan rossui, dan eat dieđe vel odne. Mii massit olu eatnamiid ruvkedoaimmaide dál, ja boahtteáiggis sihkkarit viiddidit doaimmaid vel, go sii leat gávdnan vel viidábut minerálaid. Mii dáhttut dál áššáskuhttit stáda ja vuojehit ášši buot golmma Norgga riekteásahusas ja doalvut vel ášši olggobeallái Norgga jus dárbu, lohká Sara.

Nussir ASA, govven: Ánne Biret Anti

Sávvá doarjaga Sámedikkis

Son sávvá dál ahte Sámediggi, Boazodoalu ovddidanfoanda (BOF) ja eará orgánat ja organisašuvnnat leat gergosat doarjut sin riekteáššis, sihke áššeovddideames ja ruđalaččat. 

– Dát oainnat boahtá guoskat eambbo orohagaide maid. Justa dál lea Fiettar orohat masa guoská, muhto go eiseválddit leat vuos dohkkehan dán ášši, de han gal váldigohtet eatnamiid gokko hal de lea dáhttu. Mii diehtit ahte dát ášši máksá miljovnnaid ja mii sávvat dasa gávdnat ruđa, lohká son.

Su mielas lea bahča go stáda sáhttá rivvet boazodoalu vuoigatvuođaid dainna ákkain ahte Ráđđehus oaidná Nussira barggu dehálažžan dálkkádatbarggus. Maiddái Sámediggi mii gieđahalai ráđđehusa mearrádusa hilgut váidagiid Nussir áššis, lohká ášši bahčan. Sámediggi lei okta dain, geat váide Ealáhus- ja guolástusdepartemeantta mearrádusa addit doaibmakonsešuvnna Nussir ASA:i. Dál lea Gonagas stáhtaráđis hilgon váidagiid ja dohkkehan ruvkedoaimma konsešuvnna. 

– Ledjen sávvan ráđđehusa dohkkehit Sámedikki ja earáid váidagiid, go ruvkedoaimmas leat duođalaš váikkuhusat, lohká sámediggeráđi Silje Karine Muotka. 

Gearggus doarjut

Sámediggi maiddái dáhttu viidáset caggat Nussir ASA ja lea maiddái gearggus doarjut boazosápmelaččaid riektevuogádagas. Ovdal maŋimuš dievasčoahkkima, de Sámediggi lea guovtti dievasčoahkkinmearrádusa bokte stuorra eanetloguin čájehan čielga negatiivvalaš oainnu Nussir ruvkeprošektii. Sámediggi čujuha váilevaš čielggadusaide birrasa ja guolástusa ektui ja ahte eai leat leamaš duohta konsultašuvnnat eiseválddiid ja guovllu boazodolliid gaskka. 

– Mannan vahkus Ráđđehus čilgii ahte sis leat doaimmat, mat galget sihkkarastit boazodoalu boahtteáiggi, muhto dan maid eai nagot albma láhkai vástidit lea ahte doibmetgo duođaid dát doaimmat maid leat plánen. Eai ge nagot vástidit čuohcá go dát boazodoalu ja mearrasámiid ekonomiijai. Ii ráđđehus máhte dáhkidit ahte boazodoallit eai šatta heaitit ealáhusas ruvkedoaimmaid geažil. Leat álbmotrievttálaš gažaldagat mat eai leat vástiduvvon dás, lohká son. 

Sámediggeráđi Silje Karine Muotka lohká Sámedikki gearggusin veahkehit Fiettar orohaga. GOVVA: Ánne Biret Anti  

2009 rájes álggii Nussir ASA bargat dan ovdii, ahte oččošedje doaibmakonsešuvnna Fálesnuoris. Vaikko ráđđehus lea hilgon doaibmakonsešuvnna váidagiid, de lohká Muotka ahte ii Nussir ASA:s galgga šaddat nu álki ahte sáhttet dastán bargagoahtit.

– Dál váilu miljárdda ruvnno ásaheapmái ja dál váilu vel ovttaoaivilvuohta boazodoaluin. Jus eai šatta ovtta oaivilii boazodoaluin, de ferte stáda eksproprieret guovlluid ja dalle fertejit fas ođđasit álggahit proseassa, konsultašuvnnaiguin ja nu ain viidáset. Nu ahte lea ain olu mii galgá čađahuvvot Nussir ASA beales. Ii leat Sámedikki sivva dat. Láhkaaddi dat lea mearridan movt dákkár ášši galgá jođihuvvot, ja dan áššejođiheami dáhttut mii čuovvut, lohká Muotka. 

Duorastaga gieđahalai Sámediggi ášši. Dievasčoahkkin dáhttu ráđi ain vuosttildit Nussir ASA ruvkedoaimmaid.

Leave a Reply

Your email address will not be published. Required fields are marked *