Eahpesihkarvuohta ii baldán

Synnøve Olsen dolkkai vuodjimis ovddos maŋás Levdnjii bargui ja das vulggii jurdda ásahit iežas fitnodaga. Nu son celkkii eret iežas virggi ja njuikii oadjebasvuođas njuolga eahpesihkarvuhtii.

Namma: Synnøve Olsen
Ahki: 53
Guovlu: Kárášjohka
Ámmát: Elektroinstallatevra ja beaivválašjođiheaddji Márkan El AS -fitnodagas.
Duogáš: Fágareive elektrihkárin, inšenevra ja installatevra. 
Lea bargan 14 jagi ossodatjođiheaddjin Elektro Nord fitnodagas Kárášjogas.Son lei jurddašan ođđa el-fitnodaga álggaheami jo máŋga jagi. Diimmá gease Synnøve Olsen de álggii guvttiin ovddeš bargoskihpáriin álggii ollášuhttit plánaid. Moatti mánus lei buot sajis ja sii ledje gergosat álgit, go fitnodaga jođihit Synnøve gal máhttá. Nu riegádii Kárášjohkii ođđa el-fitnodat, mii oaččui namman Márkan El.


Olsen muittaša ahte lea 37 jagi áigi dassá go son njuikii elektrihkársuorgái ja čađahii fágareivve.

Ovdal go Olsen álggii Luostejok Kraftlagii, de barggai son ossodatjođiheaddjin Elektro Nordas, Kárášjogas, gosa álggii 20 jagi áigi ja barggai doppe 14 jagi oktiibuot.

OADJEBASVUOĐAS EAHPESIHKARVUHTII

Olsen muitala plánaid ovdánan jođánit dan rájes go álge ieža gaskaneaset hállat daid birra. Suoidnemánus ásahuvvui fitnodat, moatti mánu maŋŋel fitnodat osttii vistti guovdu márkana ja bargit ledje gergosat njuiket ođđa hástalusaide čakčamánu 1. beaivvi.

– Mun celken eret sihkaris barggu ja njuikejin eahpesihkaris gründárdillái. Ja dát visti, mii lea guorusin čužžon ollu jagiid, lei dego vuordimin min. Dán čavčča leat vuoruhan veahá divođit ja ođasmahttit, muitala Olsen.

VUOSTTAŠ ÁVVUDEAPMI

Čakčat fitnodat ávvudii vuosttaš jagi ja Olsen muitala álbmoga bures sin vuostáiváldán. Son lohká sis lea leamaš doarvái bargu dan rájes go álggahedje.

– Mii eat gal leat dárbbašan joavdelastit. Ja go vuos beasaimet johtui vuosttaš vahkku maŋŋel, de lea mannan hui bures. Diehttelasat lea mus eanemus bargu, go mus lea fágalaš ovddasvástádus. Rehkenasttán buot fálaldagaid ja sádden rehkegiid bargguid ovddas. Ferten diŋgot buot dárbbašlaš ávdnasiid, ordnet bálkkáid ja čuovvut rehketdoalu. Mus šaddet oalle guhkes beaivvit muhtimin, čilge Olsen.

HÁLIIDIT HÁRJEHALLIID

Fitnodagas, mii lea dohkkehuvvon oahpahit hárjehalliid, leat vihtta bargi, okta sis lea hárjehalli.

– Fitnodat lei dohkkehuvvon hárjehalliid vuostáiváldit measta ovdal go álggaheimmet. Mun háliidin hárjehalliid go ferten jurddašallat boahtteáiggi. Hárjehallit leat veahá hástalussan ja sis lea veahá eará oaidnu áššiide, mii fas oažžu min jurddašallat. Sii buktet maiddái ođđa vuoimmi fitnodahkii ja fuolahit ahte min muitu ođasmahtto varas oahpuin, čaimmiha son.

Vaikko fitnodat lea ovdánan olles leavttuin das rájes go álggahedje, de eai leat Olsenis dál vuos plánat stuoridit dan, eaige leat plánat ásahit ossodagaid eará gielddaide.

Sii goittot váldet bargguid gieldda olggobealde.

– Váldovuoruheapmi lea Kárášjogas ja áiggi mielde veahá stuorrut ja viiddidit. Muhto eat sáhte šaddat menddo máŋggas, go dat gáibida de fas hui ollu mus, dovddasta Olsen.

DIĐII MASA SEARVVAI

Ronny Peltoperä ii dárbbašan máŋgii smiehtastit ovdal go searvvai ođđa el-fitnodaga ásahanplánaide ja celkkii bisttevaš virggi eret. Son doaibmá stivrajođiheaddjin fitnodagas ja bargá elektrihkárin. 

ÁLKI GÁVDNAT: Márkan El osttii vistti Skuvlaluottas, moatti mánu dan maŋŋá go ásahuvvui. Visti lea guovdu márkana ja dan lea álki gávdnat. 

– Mun lean bargan Synnøvein ovdal ja dihten masa searvvan. Dihten ahte son lea buorre ja čeahpes jođiheaddji. Mus lei jáhkku dán fitnodahkii inge leat gáhtan beaivvige ahte serven plánaide, čilge Peltoperä.

GELDDOLAŠ SUORGI

Peltoperä bargagođii elektrihkkárhárjehallin 2011 ja nagodii fágareivve 2015:s. Son válljii dán suorggi, go su mielas lei dat nu gelddolaš fága ja suorgi, mii ovdána johtilit. 

– Ii oktage beaivi leat seammalágan ja beassá oahppat juoidá ođđa measta juohke beaivvi. Dán suorggis boahtá čađat juoga ođđa, jus čuovvu ovdáneami. Mun rievtti mielde balan el-rávnnjis, nu ahte bárttit eai leat geavvan, várra danin go lean nu várrugas, mojohallá son.

Son sávašii maiddái ahte eambo nuorat oidnet árvvu dán miellagiddevaš ja gelddolaš suorg

Čále cealkámuša

Your email address will not be published. Required fields are marked *