Duohtavuođa- ja soabahankommišuvdnii sierraláhka

Ovttajienalaš Stuorradiggi lea mearridan kommišuvnna várás sierralága, mii addá kommišuvdnii lobi viežžat suollemas dieđuid. Láhka sihkkarastá ahte buohkat sáhttet addit kommišuvdnii dieđuid dáruiduhttimis ja vearrivuođain. Kommišuvdna oažžu maid 100 jagi jávohisvuođageatnegasvuođa.

Duohtavuođa- ja soabahankommišuvdna, mii guorahallá dáruiduhttinpolitihka ja vearrivuođaid sápmelaččaid, kvenaid ja Norgga suopmelaččaid vuostá, lea ávžžuhan Stuorradikki mearridan sierralága, mii regulere kommišuvnna barggu. Dan lea Stuorradiggi dál dahkan. Láhka galgá álkidahttit kommišuvnna guorahallama ja veahkeha almmolaš bargiid ja earáid juohkit kommišuvdnii dieđuid, maidda guoská jávohisvuođa geatnegasvuohta. Maŋŋebárgga njukčamánu 3. beaivvi 2020 Stuorradiggi gieđahalai láhkaevttohusa, ja ovttajienalaš Stuorradiggi dohkkehii lága.

ULBMIL

Lága ulbmilin lea addit kommišuvdnii, man Stuorradiggi nammadii geassemánu 14. beaivvi 2018, vejolašvuođa viežžat dárbbašlaš dieđuid, vuoi sáhttet čađahit guorahallama nu mo mandáhtas celko.

– Mun oainnán lága áibbas dárbbašlažžan guorahallama čađaheapmái. Vai kommišuvdna sáhttá ollislaččat guorahallat historjjá ja oažžut doarvái vuođu bargui, de ferte dat oažžut vejolašvuođa oažžut dieđuid, maidda jávohisvuođa geatnegasvuohta gusto. Ii leat ulbmillaš iige doarvái ahte guorahallan dahkkojuvvo dušše miehtama vuođul, dadjá kommišuvnna jođiheaddji Dagfinn Høybråten láhkaevttohusa birra.

Láhka mielddisbuktá ahte juohkehaš sáhttá addit kommišuvnna bargui dárbbašlaš dieđuid, jávohisvuođageaskku dan cakkakeahttá. Láhka guoská erenomážit dieđuide, mat kommišuvdna viežžá gielddain, fylkkagielddain ja Arkiivadoaimmahaga arkiivvain. Dán rádjái kommišuvdna lea ferten ohcat lobi vai oažžu dokumeanttaid Arkiivadoaimmahagas. Ođđa lágain kommišuvdna oažžu dieđuid álkibut ja jođánabbot.

– Mii dárbbašit lága, mii addá kommišuvdnii lobi viežžat dárbbašlaš dieđuid, vuoi sáhttet bargat buori ja vuđolaš barggu, dadjá Høybråten preassadieđáhusastis. 

Kommišuvnna jávohisvuođageatnegasvuohta ii noga ovdal go 100 jagi geažes dan rájes go kommišuvdna lea loahpahan barggustis. Lágas nannejuvvo maiddái ahte dieđut maid kommišuvdna oažžu, eai sáhte geavahuvvot rihkusáššiin dahje siviilaáššiin.

DUOGÁŠ

Dagfinn Høybråten jođiha duohtavuođa- ja seanadankommišuvnna, mii guorahallá dáruiduhttinpolitihka ja vearrivuođaid sápmelaččaid, kvenaid ja Norgga suopmelaččaid vuostá. Kommišuvnnas leat 11 fágaolbmo mielde. Sin lea Stuoradiggi nammadan.

Miessemánu 9. beaivve dulkui kommišuvdna ahte meahccesuopmelaččat leat oassin mandáhtas. Guorahallama ulbmil lea láhčit vuođu dasa ahte sápmelaččaid ja kvenaid/Norgga suopmelaččaid vásáhusat Norgga eiseválddiid politihkain, ja váikkuhusat mat vásáhusain leat leamaš sidjiide joavkun ja indiviidan, váldojuvvojit duođas.

Mandáhta čilge golbma barggu, maid kommišuvdna galgá čađahit:

Dahkat historjjálaš kártema, mas čielggadit Norgga eiseválddiid politihka ja doaimmaid sápmelaččaid ja kvenaid/Norgga suopmelaččaid hárrái sihke báikkálaččat, regionálalaččat ja našuvnnalaččat.

Dáruiduhttinpolitihka váikkuhusat galget nappo guorahallojuvvot. Kommišuvdna galgá geahčadit movt dáruiduhttinpolitihkka váikkuhii eanetloguálbmoga oainnuide sápmelaččaid, kvenaid/Norgga suopmelaččaid hárrái, ja árvvoštallat dáruiduhttima mearkkašumi gitta otnážii.

Evttohit doaibmabijuid mat ain nannejit seanadeami.

Kommišuvdna galgá gárvvistit iežas barggu ovdal čakčamánu 1. beaivvi 2022 ja geige raportta Stuoradikki presideantagoddái. Duohtavuođa- ja soabahankommišuvnna čállingoddi lea ásahuvvon UIT Norgga árktalaš universitehtii.

Ášši joatkašuvvá gova vuolde.

Sámedikke presideanta Aili Keskitalo. Preassagovva

– BUORRE GO DORJOT

Sámedikke presideanta Aili Keskitalo mielas lea buorre ahte sierraláhka lea mearriduvvon, vaikko son ii dovdda ášši nu čiekŋalit. – Kommišuvdna lea ieš lokten dán dárbbu ja lea buorre go Stuorradiggi doarju dan. Dathan galget duohtavuođa čielggadit ja soitet dalle dárbbašit dieđuid, mat eai leat almmolaččat. Kommišuvdna lea dieđusge de geatnegahtton dieid dieđuid hálddašit nu ahte eai boađe albmosii, dadjá Keskitalo.

Leave a Reply

Your email address will not be published. Required fields are marked *