Duđavaš duojárat

Olles mannan vahkku ledje sámemárkanat Romssas, Sáme álbmotbeaivvi ávvudeami oktavuođas. Guokte beaivvi ledje sámi duojárat čoahkkanan Šoop Šoop – Sámi Design Days 2020 doaluide.

Maŋŋebárgga ja gaskavahkku ledje duojárat ja designárat čoahkkanan Tromsii čájehit iežaset dujiid ja gálvvuid.

Lágideaddjit čilgejit doaluid ulbmilin leamaš ráhkadit designeriidda, buvttadeddjiide, árbevirolaš duojáriidda ja ostiide ođđa arena ja deaivvadanbáikki, mii lea miehtá riikka guovdu Sámi stuorámus gávpoga, Tromssas.

– Sámi designbeaivvit galget ovddidit sihke stuorra ja smávva designaktevrraid ja buvttadeddjiid Norggas, buktin dihtii olámuddui sin buktagiid mohtabuvddaide, interiørbuvddaide, galleriijaide, museaide ja earáide. Dan oktavuođas go ovddidit dan movt sámi design galgá leat oidnosis árbevirolaš turistamárkana olggobealde, de čájehit sámi designbeaivvit sámi identitehtadovdomearkkaid riggodaga hávskes ja urbána birrasis ja seammás gudnejahttet árbevirolaš kultuvrra ja identitehta, muitaluvvo doaluid facebook-siiddus.

Prošeavtta barggaheaddji lea leamaš Sámediggi ja teknihkalaš joavkkus leamaš Árvu, Kreativ Industri ja Være.

Sámi magasiidna guovlladii doaluiguin hálešteamen muhtin duojáriiguin.

Ášši joatkašuvvá gova vuolde.

Jorunn Løkvold lea eret Olmmáivákkis, Davvi-Tromssas ja lei boahtán čájehit iežas mearrasámi duoji.

– SOMÁS BEAIVVIT

Jorunn Løkvold lea eret Olmmáivákkis, Davvi-Tromssas ja lei boahtán čájehit iežas mearrasámi duoji.

Son láve goarrut earet eará gávttiid. Son válddii 2014:s tekstiiladuojára fágareivve ja goarru dán áigge sihke gávttiid ja eará árbevirolaš dujiid.

– Leat leamaš issoras somás beaivvit ja ollu olbmot. Mu mielas leamaš dát hui dehálaš lágideapmi sihke midjiide duojáriidda ja maiddái gávppašeddjiide. Leamaš somá oahpásmuvvat eará duojáriin ja oaidnit buot daid čáppa dujiid mat leat ráhkaduvvon, muitala Jorunn Løkvold.

Ášši joatkašuvvá gova vuolde.

Lill-Eli Jørgensen-Dahl lei vuolgán Álttás čájehit fitnodagas, LilleLi, silbačiŋaid.

OAIDNÁ ÁVKKÁLAŽŽAN

Lill-Eli Jørgensen-Dahl lei vuolgán Álttás čájehit fitnodagas, LilleLi, silbačiŋaid.

–  Mu mielas leat leamaš hui miellagiddevaš beaivvit, erenomážit vuosttaš beaivi, goas ollu fitnodagat fitne dáppe. Mun lean ožžon eambo buvddaid geat háliidit vuovdit mu čiŋaid, nu ahte munnje lea leamaš hirbmat ávkkálaš leat dáppe, dovddasta Jørgensen-Dahl.

Su mielas lea buorre go Sámediggi lea váldán ovddasvástádusa lágidit fiinna meassuid sámi designeriidda ja duojáriidda. Son sávváge ahte dákkár doaluid lágidit nuppes maid.

– Dat mearkkaša ahte sámi čiŋaide rahpasit eambo bálgát ja mun gal illudan jo jus boahtte jagi fas šaddet dákkár meassut, dadjá Lill-Eli duhtavaččat.

Ášši joatkašuvvá gova vuolde.

LilleLi silbačiŋat.

Son lohká iežas vuovdán beallječiŋaid buot eanemus dán guovtti beaivvis.

– Lean gal maiddái vuovdán hui ollu čeabetčiŋaid. Láve hui váttis árvvoštallat man ollu galgá ráhkadit iešguđet buktagiid, go vuolgá dákkár meassuide. Muhto mu čiŋat leat mannan maiddái olgoriikii dáid beivviid, go turisttat leat fitnan, earet eará Itálias ja Šveicas, muitala son.

Ášši joatkašuvvá gova vuolde.

Inger Lise Røsberg lei maiddái boahtán Álttás iežas litnadujiiguin.

– MIELLAGIDDEVAŠ

Inger Lise Røsberg lei maiddái boahtán Álttás iežas litnadujiiguin.

Son lea jođihan iežas unna fitnodaga jo badjel 30 jagi ja designe veaháš maidge, earet eará luhkaid ja náhkkegahpiriid.

– Leat leamaš hui miellagiddevaš beaivvit ja mun lean hui duhtavaš. Mu mielas leamaš hui buorre kvalitehta daid buktagiin mat leamaš dáppe. Mun lean jođihan veaháš maid, nugo jo láven. Ja mu buktagat geasuhit álo olgoriikkalaččaid. Okta luhkka lea mannan Berlinii ja ovttat fáhccat manne vel guhkkelii, čilge son.

EARÁ DUOJÁRAT

ALVA FORM – Geir Anders Hætta Berg.
NORDLYSDESIGN: Gretha Johannesen.
Gullsmed Silvia Rehnlund.
Gullsmed Silvia Rehnlund.
LAŠ – Kajsa Kvernmo.
ILLU – Karoline Olaussen.
Marja Susanne Hætta.
Pia Jannok.
Sara Ellen Anne Buljo Eira.
Sara Ellen Anne Buljo Eira.
Sara Ellen Anne Buljo Eira.
Sámi Stories.
BOBLE GLASHYTTE: Tonje Tunold.

Čále cealkámuša

Your email address will not be published. Required fields are marked *