Doarjja ođđa sámi mánáidgárdeossodahkii Romssas

Sámediggeráđđi lea juolludan 200.000 ruvnnu Sjømannsbyen mánáidgárdái Romssas. Dohko plánejit ođđa sámi ossodaga ásahit.

– Dát lea duohta illuášši. Romssa suohkan lea viiddidan sámegielat mánáidgárdefálaldaga gávpogis, ja eanet mánát ožžot mánáidgárdefálaldagas mii váldá vuolggasaji sámi gielas ja kultuvrras. Go dál lea ásahuvvon ođđa sámi ossodat Sjømannsbyen mánáidgárddis, de nannejuvvo sámi mánáidgárdefálaldat ja fágabiras, dadjá sámediggeráđđi Mikkel Eskil Mikkelsen gii lea movtta.

Sjømannsbyen mánáidgárdi lea Romssa suohkana mánáidgárdi mas leat njeallje ossodaga. Mánáidgárddis rahppojuvvui 2016:s sierra sámi ossodat, muhto sámi ossodaga rahpama maŋŋá oidne johtilit ahte dárbu lea eanet sámegielat mánáidgárdesajiide. 

Sjømannsbyen mánáidgárdi. Govva: Romssa suohkan.

Go dárbu lei stuoris sámi mánáidgárdesajiide de mearridii Romssa suohkan ásahit vel ovtta sámi ossodaga mánáidgárddis, ja čavčča rájes leat leamaš guokte sámi ossodaga mánáidgárddis. Sámi ossodagat galget gozihit sámi giela, kultuvrra ja eallinvuogi, ja ossodagain leat sámegielat bargit.

 – Hui movttiidahtti oaidnit go golmma jagis sámi mánáidgárdesajit leat lassánan njealji sajis 24 sadjái, dadjá Mikkelsen. 

Sámediggeráđđi juolluda 200.000 ru prošektii doarjjaortnegis doarjja prošeavttaide ja ovddidanbargui mánáidgárddiin. 

Leave a Reply

Your email address will not be published. Required fields are marked *