– Dehálaš doarjja

Sámediggi lea juolludan doarjagiid kulturprošeavttaide maid ulbmil lea čohkket ja gaskkustit Sámi lagas historjjá. Riddu Duottar Musea lea ožžon 200.000 kruvnnu iežaset vuorkká digitaliseremii.

RiddoDuottarMuseaid direktevra Anne May Olli lea hui movtta doarjagis ja illuda álggahit prošeavtta, man ollislaš bušeahtta lea badjelaš 700.000 kruvnno. Son sávvá sin beassat álgit čakčat. Priváhta govva

Riddu Duottar museai lea ges juolluduvvon 200 000 kruvnno digitaliseret arkiivvaset, sihke dávvir- ja doaibmaarkiivva.

Riddu Duottar Musea direktevra Anne May Olli lea hui ilus doarjagis ja illuda beassat álggahit prošeavttain, man ollislaš bušeahtta lea badjelaš 700.000 kruvnnu. Son sávvá sin beassat álgit čakčat.

– Mii leat hirbmat giitevaččat doarjagis. Dat dagaha ahte mii beassat digitaliseret min boares vuorkká. Beaivválaš doaimmas lea áibbas dárbbašlaš ahte mii galgat sáhttit ohcat dieđuid ovttaskas diŋggain ja muđui maiddái musea historjjá birra. Dat ahte mii sáhttit ohcat digitála, veahkeha min gávdnat dieđuid jođáneappot. Otná beaivvi fertet mii njulgestaga vuorkái bláđet gieđain, čilge Olli SÁMi magasiidnii.

EFFEKTIFISERE

Anne May Olli dadjá dán buorrin álgun sidjiide ja sii áiggošedje olahit ollu jagis. Son sávvá maiddái ahte digitaliseren addá leavttu sin boahttevaš buvttademiide. Son ii loga vuorkká šaddat vuosttaš vuorus almmolažžan, nu ahte buohkat sáhtašedje das ohcat neahtas, danin go sii fertejit čuovvut lágaid persovdnadieđuid suodjaleami birra.

– Mii álggahit nu gohčoduvvon gáiddusarkiivvain, mii lea boarráseamos vuorká. Mii fertet oaidnit man guhká joavdat vuosttaš vuorus. Arkiivvas lea ollu, man birra iežage eat dieđe dán muttos, muhto mii oažžut eambo dieđuid albmosii dađistaga go bargagoahtit dainna. Šaddá issoras gelddolaš boahtit johtui. Doarjja veahkeha min loktanit ođđa áigebadjái, go mii sávvat ásahit vuogádaga, mas sáhttá ohcat maiddái sámegiel ohcansániiguin, loahpaha duđavaš museadirektevra.

RiddoDuottarMuseat lea museaovttastus, masa gullet njeallje musea, mat leat Oarje-Finnmárkku gielddain; RDM-Jáhkovuona mearrasámi musea, RDM-Porsáŋggu musea, RDM-Sámiid Vuorká-Dávvirat Kárášjogas ja RDM-Guovdageainnu gilišillju.

ÁLKIDAHTTÁ

Digitaliseren buktá olámuddui ollu dieđuid, mat muđui eai livčče nu sadjosis. Nu šaddá álkibun gávdnat buot, mii lea RiddoDuottarMuseaid vuorkkás, sihke musea bargiide ja maiddái earáide.

– Lea dehálaš ahte sámi museat besset ávkkástallat ođđa teknihkain nu ahte šaddá álkit arkiveret ja ávkkástallat arkiivvain, dadjá sámediggeráđi Henrik Olsen (NSR) preassadieđáhusastis.

DUOĐAŠTIT JA GASKKUSTIT

Sámi lávddi prošeakta, mas dokumenteret ja gaskkustit sámi teáhtera ja lávdedáidaga álggu kulturpolitihkalaš ja  dáiddalaš ovdáneami čalmmiin, lea ožžon 150 000 kruvnno prošeavtta nuppi oassái.

Ovcci lávdedáiddára leat filbmejuvvon prošeavtta vuosttaš oasis. Prošeavtta nuppi oasis, maid leat gohčodan Sámi lávdedáiddainstituhtta, galgá prošeakta gárvvistuvvot dainna ulbmiliin ahte dát bargu šattašii boahtteáiggis fápmoguovddážin boahttevaš lávdedáiddáriid buolvvaide. Čohkkejuvvon dieđut vurkejuvvojit Sámi arkiivii.

Sámediggeráđi Henrik Olsen (NSR). Govva: Åse M.P. Pulk/Sámediggi

FINNMARK 2020

Susanne Hætta Foto lea ges ožžon 200 000 kruvnno doarjaga prošektii Finnmark 2020. Prošeavtta olis son áigu govvidit dán áiggi finnmárkulaččaid. Áigumuš lea čájehit finnmárkulaččaid identitehta muitalusaid, govaid ja musihka bokte. Ulbmil lea ahte sii geat orrot Finnmárkkus ieža besset muitalit geat sii leat. Barggu loahpas Susanne Hætta áigu maid ráhkadit girjji identitehta birra.

– Lea dehálaš ahte finnmárkulaččaid identitehta čilgejit sii geat orrot dan guovllus. Muđuihan dan čilgejit dávjá earát geat eai gula deike, ja máŋgii sáhttá dat šaddat áibbas boastut, loahpaha Olsen.

Muđui leat čuovvovaš prošeavttat ožžon doarjja:

  • Riddu Riđđu – Reaškkas – sámi stand-up: 200.000,-
  • Johan Sara Jr – Ambient Yoik: 90.000,-
  • Unjárgga gielda – Várjjatvuona luođit fas gullogohtet: 125.000,-


Doarjagat leat juolluduvvon doarjjaortnegiin Doarjja kulturdoaimmaide ja Ásahusovddideapmi.

Čále cealkámuša

Your email address will not be published. Required fields are marked *