Dál son ráhkkana Miss Universe-gilvvuide

Justa dál lea áiddo šaddan Miss Norway Susanne Næss Guttorm (21) bosihan ruovttus. Dál čavge sámenieida Osloi ráhkkanit ovddastit olles Norgga Miss Universe-gilvvuin.

– Leamaš nu máilmmi buorre leat ruovttus oanehisáigge. Ledjen nu hirpmahuvvan go Leavnnja girdišiljus vurddii olles joavku mu, go jovden Oslos beaivvi maŋŋel Miss Norway gilvvuid. Dál lean guokte vahku leamaš ruovttus Kárášjogas ja illudan fas Osloi ráhkkanit stuora loahppagilvvuide, lohká sámenieida Susanne Næss Guttorm.

Vuolgá Osloi ráhkkanit

Ráhkkananbargui lea sus veahkkin 2016 Miss Norway vuoiti. Guovvamánus son galgá gilvalit buot máilmmi riikkaid miss-gilvvu vuitiiguin. Máŋga miljovnna tv-geahčči čuvvot gilvvuid. Sámenieida ovddasta Norgga gilvvuin. Dan ii leat oktage sámenieida dahkan ovdal su.

Stuora illubeaivi lei Susanne Næss Guttormii go čurveje su vuoitin Miss Norway gilvvuin. – Lei duođaid stuora vásáhus gullat go almmuhedje mu vuoitin. In nagot oba čilget ge dan, lohká son. Govven. Daniel Millan

– Šaddá gelddolaš čájehit sámevuođa eará arenain. Vaikko lean olu johtán ja fitnan gitta Los Angelesis ja Las Vegasis, de in leat goassege fitnan Bangkokas, Thailandas, gos loahppagilvvut leat. Doppe galggan mánu leat ja loahppagilvvut leat dán jagi skábmamánus. Dan boahttevaš jagi šaddá olu johtin, ja dasa illudan. Dát ii dáhpáhuva go oktii eallinagis, ja šaddá gelddolaš vásihit olu ođđa áššiid. Dál ferten ollu hárjehit iežan vázzit alla jozzagiiguin, go dat ii leat dat álkimus.

Illá jáhkii vuoitán

Go čurveje Susanne nama Miss Norway vuoitin, Susanne illá jáhkii iežas beljiide. Seamma beaivvi ja beivviid maŋŋel čálle buot Finnmárkku mediat ja riikamediat su birra.

– Lei duođaid stuora vásáhus gullat go almmuhedje mu vuoitin. In nagot oba čilget ge dan. Go maiddái šadden álbmoga favorihttan, de in diehtán šat maid galgen lohkat. Nu somá lei. Mearkkaša maid nu olu go Kárášjogas válde mu nu bures vuostá.

Čále cealkámuša

Your email address will not be published. Required fields are marked *