– Dál ii leat go jurddašit boahtteáiggi birra

Fred René Buljo áhčči Klemet Anders Buljo lea Tel Avivas. Son lea nu gealdagasas ovdalaš semifinála ja jáhkká KEiiNO joavdá finalai ja vuoitá vel olles Eurovision Song contest gilvvu.

JEARAHALLAN: GLR, NILS MARTIN KRISTENSEN – HEIVEHAN JA ČÁLLÁN: MÁRGGET JON BIRET ÁMMUNA ÁNNE BIRET, ÁNNE BIRET ANTI

– Vaikko leat veahá váiban, de mii leat ožžon oba olu energiija ja ráhkesvuođa guldaleddjiin. Juohke sajis oažžut rámi ja juohke sajis gos leat lágidan konseartta de leat olbmot juoigan fárrolagaid minguin. Dál jurddašit dušše boahtteáiggi birra ja mis lea rievtti mielde eambbo energiija go goassege ovdal, illuda Fred René Buljo, gii juoigá KEiiNO-joavkkus.

Duhát jurdaga jienasteami áigge

Vahkku ovdal stuora Eurovision Song Contest -gilvvuid máŋggas einnostedje KEiiNOin mannat hirbmat bures. Soapmásat navde sin vel vuoititge máilmmi stuorámus musihkkagilvvuid. Olles sála Tel Avivas juige fárrolágaid Fredain lávvardateahkeda, go KEiiNO ovdanbuvttii luohtelávlaga “Spirit In The Sky”. Visot orui manname rievttes guvlui, gitta dassái go fágaduopmárat juohkigohte čuoggáid. Dan botta go 200 miljovnna olbmo gehčče dutnje ja go dus lei doaivva beassat buoremusaid searvái, mo de lei go Eurovision Song Contesta fágaduopmárat čurvo 12 čuoggá aivve fal earáide, eaige dutnje?

– Mii čohkohalaimet greenroomas ja leimmet hirbmat gealdagasas, ahte movt son dat dát galggašii mannat. Ledje vaikko makkár jurdagat. Go de čuorvugohte čuoggáid ja mii eat ožžon bálljo čuoggáid, de ledje oba máŋggalágan dovddut. Ledjen veahá beahtahallan EBU:i go eai dohkkehan min váidaga go ledje teknihkalaš váttisvuođat sáddagis maid jury oinnii. Jurddašin veahá ahte teknihkalaš váttisvuođat sáhtte sivvan go fágaduopmárat eai jienastan min, muhto dattege ferte luohttit sidjiide ahte fágaduopmárat eai divtte teknihkalaš váttisvuođaid čuohcat midjiide. Dan mađe profeššunealla galget. Dieid jurdagiid fertejin duvdilit eret, go nie ii sáhte jurddašit. Maŋŋel aŋkke čájehuvvui goit ahte min lávlla lihkastahtii álbmoga, illuda Fred René.

Šadde loahpas viđádin

47 čuoggá ožžo sii fágaduopmáriin ja ledje oba vuollin listtus ovdalgo álbmotjienat bohte. Go Eurohpá álbmoga jienat almmuhuvvoje de gávcci riikka álbmoga ledje addán 12, stuorámus čuokkeslogu KEiiNOi. Sámi ja Norgga ovddasteaddji faskii 291 jiena, mii lei olu eambbo go maid oktage eará joavku fidnii álbmogis. Daid čuoggáin beasai vuos gitta bajimussii. Go buot álbmoga jienat ledje lohkan, de gárte loahpas guđádiin.

– Mii dovdat lihkká iežamet vuoitin go álbmot válljii min, illudedje joavkku miellahtut njuolgga maŋŋel Eurovision Song Contest -gilvvuid.

Čuojahuvvo miehtá Eurohpa

KEiiNO lea ain otnege goalmmádin Norgga Spotifys, dušše Justin Bieber ja Billie Eilish leaba ovddabealde. Joavku lea maid 13. eanemus čuojahuvvon lávlla Israela Spotifys. Njuolgga maŋŋel Eurovision Song Contesta KEiiNO lei eanemusat čuojahuvvon musihkka Norggas ja joavku lei maid máŋgga Eurohpá riikkas eanemusat čuojahuvvan lávlagiid searvvis. Vaikko leat beassan veahá dál bosihit, de KEiiNO musihkkakarrieara ii vissa nohkan Tel Avivii.

– Mii galgat leat olu TV:s ja lávvardaga čuojahit Telenor Arenas mánáid Grand Prixas. Dasa lassin leat olu konsearttat. Musihkkabuvttadeapmi lea maid jođus, ja KEiiNOs lea earet eará Lady Gagain coverlávlla, masa leat heivehan luođi. Mis leat maid njeallje lávlaga, mat leat masa gárvásat ja dat almmuhuvvojit singelin dál moatti vahku geahčen. Konseapta-albuma, masa čohkket eamiálbmotlávlagiid, almmuhit maid dán jagi, eamiálbmotgiellajagi oktavuođas. Mii fertet gal maid Guovdageainnus lágidit konseartta. Sávvamis beassat dan ge vásihit. Mis han lea čakčafestivála dahje ainjuo beassášfestivála fas.

Luohti Eurohpái

Fred René lea bures vuostáiváldon miehtá. Norgga stuorámus aviisa VG čálii ahte Fred haga ii livčče Spirit In The Sky leamaš nu bivnnut. Maŋŋel go KEiiNO vuittii Norgga Grand Prix loahppavuoru, joavku lea fitnan oba máŋgga sajis konsearttaid doallame ja Eurohpás ge leat bures váldán sin vuostá. Eanemusat Fred illuda, go diehtá makkár beroštupmi Eurohpás lea Sápmái.

– Mun lean ipmirdan nu ahte daid guovlluin maid leat galledan, olbmot dihtet eambbo min sámiid birra go maid sáhtašeimmet oba jáhkkit ge. Ollugat leat boahtán muinna háleštit ja máŋggas dovdet min kultuvrra ja soames dovdá min kultuvrra buorebut go mun ge. Lea leamaš hui somá, ja lean geavahan liigeáiggi čilget olbmuide min birra. Dál dušše illudan joatkit musihkain, lohká son.

Boahtte vahkus Fred René boahtá Guovdageidnui ja sátnejođiheaddji lohpida ávvudoaluid.

Čále cealkámuša

Your email address will not be published. Required fields are marked *