Dáhttu šaddat buoremus FESTIVÁLAN juohke láhkái

Riddu Riđu jođiheaddji Sandra Márjá West lea hirbmat gealdagasas. Sus lea ulbmilin čađahit buoremus eamiálbmotfestivála obanassiige, sihke prográmma ja luonddugáhttema ektui.

– Lea hirbmat hušša dál.  Leat ain máŋga smávva ášši maid fertet čoavdit ovdal go leat áibbas gergosat, lohká Sandra Márjá West, Riddu Riđu jođiheaddji.

Šávihit máŋga duhát guossi

Gaskavahku rájes de šávihišgohtet olbmot Riddu Riđđui. Olmmáivákki Sámi festivála leat riikkamediatge ávžžuhan olbmuid galledit ja festivála vásiha ge dál ahte vuvdet eambbo bileahtaid ovddalgihtii, go goassege ovdal. Maŋimuš logut čájehit ahte leat vuovdán 47,43 % eambbo bileahtaid ovddalgihtii go maid goassege ovdal leat dahkan.  

Buffy Sainte-Marie. Preassagovva

– Mii eat leat goassege vuovdán ná olu. Dat gal lea erenoamáš somá. Olbmot liikojit min prográmmii. Buffy Sainte-Marie lea dieđusge min stuorámus násti ja ollugat bohtet su vásihit. Dattetge lea mis hui buorre prográmma obbalohkái, nu ahte jáhkán min fálaldaga geasuha. Mis leat 70 lágideami moatti beaivvis. Leat nu olu dehálaš áššit maid háliidat fállat ja čalmmustahttit ja dat geasuha juohkehačča. Mii leat maid heivehan nu ahte ahte kurssat dáhpáhuvvet máŋga beaivvi. Jus dus ii leat dilli searvat duon beaivvi, de lea maŋit beaivvi ge vejolašvuohta, čilge West.

– Luonddugáhtten álo leamaš guovddážis 

Riddu Riđđu dáhttu máŋgga láhkai šaddat buoremus festiválan. Sii dáhttot sihke šaddat deháleamos eamiálbmogiid lávdin ja festiválan mii buoremusat váldá vuhtii ceavzilvuođa. Riddu bargiide lea luonddugáhtten álo leamaš guovddážis. Sii leat 2004 rájes bargagoahtán luonddu gáhttemiin. Sii leat lágidan sihkkelastimiid ovdal ja dán jagi ges leat Troms Fylkestrafikk -johtolatfitnodagain šiehttan ahte eambbo busset vudjet Gáivutnii, vai olbmot ovttas vánddardit ovdalii go iežaset biillain.

– Eai leat sihkkelastimat dál, muhto luonddugáhtten lea dehálaš. Mis lea earet eará seminára Riehpovuona ruvkedoaimmaid birra ja mii digaštallat luossahálddašeami. Mii maid ovttasbargat luonddugáhttenlihtuin, geat leat veahkkin midjiide árvalan movt jurddašit buorrin birasfestiválan. Sii leat maid festiválas veahkkin ja galget de maŋŋel evttohit movt velá buoridit festivála luonddugáhttema ektui, muitala West.

Boikohtte CocaCola ja ávžžuha gussiid sirret doabbariid

Riddu Riđđu festivála lei vuosttaš festiválaid searvvis Norggas, mat dohkkehuvvojedje birasčuovgadoardnan (2004). 

– Dál mii leat ođđasit dohkkehuvvon ja mii leat dál bidjan alcceseamet mihttun šaddat Norgga buoremus birasfestiválan. Juohke jagi mii buoridit doabbariid sirrendási ja oastit eanet birasdohkkehuvvon gálvvuid. Mii gávppašit eanas báikkálaččat, ja guossohit nu olu báikkálaš biepmu go vejolaš. Dál eai leat plastihkkavuolaglásat. Dál juhket vuola njuolgga bovssas. Mii maid heaitit bohtalčáziid vuovdimis, muhto lasihat čáhce-stašuvnnaid. Mii eat vuovdde Coca-Cola ja nu cuiggodit Coca-Cola Company čázi privatiserenproseassa, mii áitá álgoálbmogiid vejolašvuođa oažžut juhkančázi. Guossit ožžot biepmu lihtiin mat leat dahkkon pálbmalasttain, ja geavahit boradanneavvuid, mat ollásit suddet lundui. Buvddas vuovdit birasseasti T-báiddiid ja gahperbuseriid. Dán jagi mii leat maid unnidan deaddiluvvon plakáhtaid ja leat bures plánen artisttaid ja gussiid fievrrideami vai eat dárbbat vuodjit nu olu Romssa ja Olmmáivákki gaskkas, muitala West.

Riddu Riđđu maid ávžžuha gussiid sirret doabbariid ja mátkkoštit kollektiiva fievrruiguin festiválii. 

Leave a Reply

Your email address will not be published. Required fields are marked *